19.05.2017 | 
Կրթություն
ՀՈԳԵԲԱՆԱԿԱՆ ՎԵՐՆԻՍԱԺ. ԾԱՆՈԹԱՆՈՒՄ ՈՒ ԾԱՆՈԹԱՑՆՈՒՄ ԵՆ ՀՈԳԵԲԱՆՆԵՐԸ
ՀՈԳԵԲԱՆԱԿԱՆ ՎԵՐՆԻՍԱԺ. ԾԱՆՈԹԱՆՈՒՄ ՈՒ ԾԱՆՈԹԱՑՆՈՒՄ ԵՆ ՀՈԳԵԲԱՆՆԵՐԸ
Արդեն 7-րդ անգամ ԵՊՀ-ում անցկացվեց հոգեբանական վերնիսաժ, որի առանձնահատկությունն այս տարի այն էր, որ մասնակցում էին նաև գործատուները:

Տարիներ առաջ, երբ ԵՊՀ փիլիսոփայության և հոգեբանության ֆակուլտետի ընդհանուր հոգեբանության ամբիոնը նախաձեռնեց հոգեբանական վերնիսաժը, այն ներֆակուլտետային բնույթ էր կրում: Ժամանակի հետ դարձավ համահամալսարանական, իսկ այս տարի այն ավելի ընդլայնել է իր շրջանակները. 21 տարբեր կազմակերպություններ ներկայացնում էին իրենց, իրենց գործունեությունն ու ծառայությունները:

 

«Ուրախությամբ պետք է նշեմ, որ մասնակիցների մեծ մասը գործատուներն են: Դրանք այն կազմակերպություններն են, որոնք առաջարկում են հոգեբանական ծառայություններ կամ ունեն հոգեբանների համար նախատեսված հաստիքներ: Դրանց կեսից ավելիում աշխատում են մեր շրջանավարտները: Առանձին տաղավարներով ներկայացված են նաև մեր ֆակուլտետի երեք ամբիոնները, որպեսզի մեր կրթական ծրագրերի մասին իրազեկումը բարձրացնենք»,- ասում է Ընդհանուր հոգեբանության ամբիոնի վարիչ Հրանտ Ավանեսյանը:

 

 

Պարոն Ավանեսյանի խոսքով՝ սա նաև շատ լավ հնարավորություն է ուսանողների համար տեսնելու, թե ակադեմիական կրթություն ստանալուց հետո իրենց ինչպիսի աշխատաշուկա է սպասում. «Շատ խոշոր գիտաժողովներում այս բանավեճը բացվում է. որ ակադեմիական կրթությունը չի բավարարում շուկայի պահանջները: Այս վերնիսաժը նաև յուրօրինակ երկխոսություն է»:

 

Հոգեբանական վերնիսաժի այս տարվա նորություններից մեկն էլ սպա հոգեբանների մասնակցությունն էր: Ներկա էին հոգեբաններ, ովքեր ծառայություն են անցնում տարբեր զորամասերում ու ԶՈՒ ստորաբաժանումներում:

 

«Զինված ուժերում հոգեբանների ինստիտուտը օր օրի կայանում է: Զինվորական կոլեկտիվներում համալրված են սպա հոգեբանի հաստիքները, սակայն դրանք ավելացնելու կարիք դեռ կա: Երբ այդ ինստիտուտը նոր էր ներդրվում զինված ուժերում, վերաբերմունքը միանշանակ չէր: Իրենք հոգեբաններն էլ պետք է իրենց տեղը «նվաճեին» այդ միջավայրում: Իսկ այսօր ունենք սպա հոգեբաններ, որոնց մատնանշում են որպես շատ լավ օրինակ: Այսօր արդեն նրանց նկատմամբ վստահությունը մեծ է, հրամանատարները որոշումներ կայացնելիս անպայման հաշվի են առնում նաև նրանց կարծիքները»,- ասում է ՊՆ զորքերի հոգեբանական ապահովման բաժանմունքի պետ Սամվել Բարոյանը:  

 

 

Ինչպես և նախորդ տարիներին, այս տարի ևս վերնիսաժի շրջանակներում անցկացվեց վարպետության դաս, որը վարում էր ֆակուլտետի դոցենտ Լաուրա Պետրոսյանը: Կազմակերպիչների հավաստմամբ՝ վարպետության դասերի համար ընտրվում են այնպիսի թեմաներ, որոնք ենթադրում են հենց տեղում գործնական հմտությունների ձեռքբերում, ոչ թե պարզապես տեսական գիտելիքների փոխանցում: 

Այլ նորություններ
ՈՒԽՏԱԳՆԱՑՈՒԹՅՈՒՆ ԴԵՊԻ ԱՐՑԱԽ. ՆՊԱՏԱԿԸ՝ ԻՐԱԿԱՆՈՒԹՅՈՒՆ
Ավարտվեց ԵՊՀ «Վարդանանք» ռազմահայրենասիրական դաստիարակության ակումբի 9-րդ կրթամշակութային մեկշաբաթյա արշավ-ուխտագնացությունը դեպի Արցախ, որն այս տարի ուներ «Ազգ-բանակ» նշանաբանը:
ԱՄՓՈՓՎԵՑ «ՍՓՅՈՒՌՔ» ԱՄԱՌԱՅԻՆ ԴՊՐՈՑ 2017-Ը
Մեկ ամիս շարունակ հայրենիքում վերապատրաստվող սփյուռքահայերը մասնագիտական գիտելիքները համալրելուց և Հայաստանի տեսարժան վայրերն այցելելուց հետո վերադառնում են իրենց բնակության վայր՝ շուտով հայրենիք կրկին վերադառնալու ակնկալիքով: