08.11.2018 | 
Հասարակություն
«ԴՈՒՔ ՄԵԾ ՆԵՐՈՒԺ ՈՒՆԵՔ, ՊԱՀԱՆՋՎՈՒՄ Է ՄԻԱՅՆ ԱՇԽԱՏԱՍԻՐՈՒԹՅՈՒՆ». N 105 ԴՊՐՈՑԻ ԱՇԱԿԵՐՏՆԵՐԸ ԵՊՀ-ՈՒՄ
«ԴՈՒՔ ՄԵԾ ՆԵՐՈՒԺ ՈՒՆԵՔ, ՊԱՀԱՆՋՎՈՒՄ Է ՄԻԱՅՆ ԱՇԽԱՏԱՍԻՐՈՒԹՅՈՒՆ». N 105 ԴՊՐՈՑԻ ԱՇԱԿԵՐՏՆԵՐԸ ԵՊՀ-ՈՒՄ
ԵՊՀ մինչհամալսարանական վարչությունն այսօր կազմակերպել էր Երևանի N 105 ավագ դպրոցի 10-րդ դասարանի աշակերտների այցը համալսարանի Տնտեսագիտության և կառավարման ֆակուլտետ:

ysu.am-ի հետ հարցազրույցում Երևանի N 105 ավագ դպրոցի 10-րդ դասարանի տնտեսագիտական հոսքի դասղեկ Շուշան Իսրայելյանն ասաց. «Մեր աշակերտները եկել են ԵՊՀ իրենց մասնագիտական կողմնորոշումն ավելի ճշգրիտ ձևավորելու նպատակով»:

Տիկին Իսրայելյանը նշեց, որ ցանկանում են նաև գործնականում ծանոթանալ ինչպես համալսարանի, այնպես էլ ֆակուլտետի հետ:

Ավագ դպրոցի աշակերտներին ողջունեց Տնտեսագիտության և կառավարման ֆակուլտետի դեկան Հայկ Սարգսյանը: Նա խոսեց ֆակուլտետի անվանափոխության մասին. «Ժամանակակից տնտեսագիտությունն էապես կարևորում է կառավարման համակարգը, այդ պատճառով ֆակուլտետը վերանվանվեց Տնտեսագիտության և կառավարման ֆակուլտետի»:



Դեկանը կարճ ներկայացրեց ֆակուլտետի կառուցվածքը, գործունեությունը և ուսուցման ծրագրերը: «Կառավարումը կարևորագույն հանգույց է արդյունավետ տնտեսություն ունենալու համար»,- հավելեց նա:

Ֆակուլտետի դեկանը հաջողություն մաղթեց աշակերտներին, պատրաստակամություն հայտնեց մշտապես աջակցելու դպրոցականներին յուրաքանչյուր հարցում և խոսքը փոխանցեց ֆակուլտետի Կառավարման և գործարարության ամբիոնի վարիչ Կառլեն Խաչատրյանին:

Պարոն Խաչատրյանը ողջունեց աշակերտներին. «Ուրախ եմ տեսնել ձեզ Երևանի պետական համալսարանում: Վստահեցնում եմ, որ ԵՊՀ-ն, հատկապես Տնտեսագիտություն և կառավարման ֆակուլտետը, միշտ բաց է նմանատիպ հանդիպումներ կազմակերպելու համար, և պատրաստ է քննարկելու աշակերտներին հուզող տարբեր հարցեր, որովհետև մենք կարևորում ենք ապագա դիմորդների հետ աշխատանքը՝ անկախ նրանից, թե որ համալսարանում նրանք կորոշեն սովորել»:



Պարոն Խաչատրյանն ինտերակտիվ դասի միջոցով N 105 դպրոցի աշակերտների հետ խոսեց ձեռնարկատիրությանն անհրաժեշտ որոշակի հմտությունների, գիտելիքների ու ունակությունների մասին:

Նա դասախոսությունը սկսեց հետաքրքիր մի փաստով. Համաշխարհային բանկը վերջերս մի հետազոտություն է կատարել, ըստ որի՝ աշխարհի բնակչության միայն 6 տոկոսն է օժտված ձեռնարկատիրական ունակություններով:

Ուսանողներն այս դասի միջոցով ծանոթացան ձեռնարկատիրության տարբերակիչ հատկանիշներին, որոնք են նախաձեռնողականությունը, ռիսկի դիմելու քաջությունը, նորարարությունները, արագ կողմնորոշվելու ու ճիշտ որոշում կայացնելու ունակությունները: Կառավարման և գործարարության ամբիոնի վարիչն առանձին-առանձին ներկայացրեց այդ հատկանիշները, օրինակների միջոցով բացատրեց դրանք, պատասխանեց աշակերտների հարցերին:

«Դուք մեծ ներուժ ունեք, պահանջվում է միայն աշխատասիրություն: Իմ խնդիրն է ձեզ մատուցել մտածելու որոշակի ազդակներ: Դուք պետք է որոշակի աշխարհայացք ձևավորեք. դա է կարևորը»,- դասախոսությունը եզրափակեց նա:

 

Մարինե Առաքելյան

Այլ նորություններ
«ՀԱՅՈՑ ՑԵՂԱՍՊԱՆՈՒԹՅԱՆ ԱՆԴՐԱԴԱՐՁՆ ԱՄԵՐԻԿՅԱՆ ՄԱՄՈՒԼՈՒՄ»․ ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԵՊՀ-ն այսօր հյուրընկալել էր «The Armenian Genocide: Prelude and Aftermath. As reported in the U.S. Press - The New York Times» գրքի հեղինակներին՝ Վենետիկի Մխիթարյան միաբանության միաբան, գերաշնորհ հայր Վահան ծայրագույն վարդապետ Օհանյանին և ավստրալահայ գործիչ Արա Քաթիբյանին, որոնք նախ հանդիպեցին ԵՊՀ ռեկտոր Արամ Սիմոնյանի հետ, այնուհետև Պալեանների անվան դահլիճում հանդես եկան գրքի կազմման և հրատարակման մասին ելույթով։
ՏՆՏԵՍԱՊԵՍ ԶԱՐԳԱՆԱԼՈՒ ՀԱՄԱՐ ՀԱՄԱՐՁԱԿՈՒԹՅՈՒՆ Է ՊԵՏՔ. ԱՀ ՆԱԽԿԻՆ ՎԱՐՉԱՊԵՏԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
ԵՊՀ տնտեսագիտության և կառավարման ֆակուլտետում այսօր տեղի ունեցավ «Հայաստանի տնտեսական զարգացման հեռանկարները» թեմայով դասախոսություն, որի բանախոսն էր Արցախի Հանրապետության նախկին վարչապետ Արայիկ Հարությունյանը: