13.12.2021 | 
Հասարակություն
ԱՎԱԳ ԴԱՍԱՐԱՆՆԵՐՈՒՄ ՍՈՎՈՐՈՂ ԱՇԱԿԵՐՏՆԵՐԻ ԱՅՑԵԼՈՒԹՅՈՒՆՆԵՐԸ ԵՊՀ ՇԱՐՈՒՆԱԿՎՈՒՄ ԵՆ
ԱՎԱԳ ԴԱՍԱՐԱՆՆԵՐՈՒՄ ՍՈՎՈՐՈՂ ԱՇԱԿԵՐՏՆԵՐԻ ԱՅՑԵԼՈՒԹՅՈՒՆՆԵՐԸ ԵՊՀ ՇԱՐՈՒՆԱԿՎՈՒՄ ԵՆ
Երևանի թիվ 105, Խ. Դաշտենցի անվան թիվ 114 և Ս. Խանզադյանի անվան թիվ 184 ավագ դպրոցների աշակերտներն այսօր այցելել են Հայ բանասիրության ֆակուլտետ:

ԵՊՀ մինչհամալսարանական կրթության վարչության նախաձեռնությամբ այսօր նրանց համար դասախոսություն կարդաց Հայ բանասիրության ֆակուլտետի հայ գրականության ամբիոնի դոցենտ, բ.գ.թ. Ռուբիկ Էլոյանը:

 

 

«Անկախ ձեր մասնագիտական կողմնորոշումից՝ ազգային մշակույթի իմացությունը պարտադիր է յուրաքանչյուրի համար: Ցանկացած զարգացած մարդ պետք է իմանա իր երկրի մշակույթը, ժողովրդի պատմությունը, ինչն էլ իր արտացոլումն է գտնում գրականության մեջ: Մեր նյութական աշխարհում անչափ կարևոր է հոգևոր սնունդը, որը մարդուն ավելի լիարժեք է դարձնում»,- ողջույնի խոսքում նշեց գրականագետը:

 

Նրա դասախոսության առանցքը Մուրացանի գործերն էին ու Րաֆֆին՝ իր ծրագրային, քաղաքական և պատմական վեպերով. «Այսօրվա հանդիպման թեմաները բավականին բարդ են ու ծավալուն, սակայն, այնուամենայնիվ, դրանք միշտ արդիական են»:

 

 

ԵՊՀ դոցենտը զուգահեռներ անցկացրեց Մուրացանի և այլ անվանի գրողների ստեղծագործությունների միջև, ապա խոսեց Րաֆֆու վեպերում տեղ գտած ազգային-ազատագրական պայքարի գաղափարախոսության և այն դրդապատճառների մասին, որոնք գրողին ստիպել են անդրադառնալ պատմական թեմաներին՝ արձագանքելով ժամանակի քաղաքական իրողություններին:

 

«Մեր՝ ԵՊՀ այցելության նպատակն է աշակերտներին հնարավորություն տալ առավել համապարփակ տեղեկություններ ստանալու դպրոցում ուսումնասիրվող թեմաների շուրջ: Այս տարի նրանք անցնելու են Մուրացան և Րաֆֆի, ուստի դասախոսությունը շատ օգտակար կլինի: Շնորհակալ ենք, որ մեզ այսպիսի հնարավորություն է ընձեռվել»,- նշեց թիվ 184 ավագ դպրոցի հայոց լեզվի և գրականության ուսուցչուհի Մելինե Տիգրանյանը՝ հավելելով, որ դպրոցականները մեծ ոգևորությամբ են այցելում Մայր բուհ:

 

 

Վերոնշյալ դպրոցի աշակերտուհի Էլեն Խաչատրյանն էլ ընդգծեց, որ նմանաբնույթ միջոցառումները շատ կարևոր են իրենց համար. «Ավագ դպրոցում աշակերտը դեռ հաստատ չգիտի, թե ինչ ուղղությամբ է ուզում շարունակել կրթությունը: Իսկ այսպիսի դասախոսությունները մասնագիտական կողմնորոշման լավ հնարավորություններ են»:  

 

 

Այլ նորություններ
ԵՊՀ ՈՒՍԱՆՈՂՆԵՐԸ ՀՆԱՐԱՎՈՐՈՒԹՅՈՒՆ ԿՈՒՆԵՆԱՆ ԱՇԽԱՏԵԼՈՒ ԲԻՈՏԵԽՆՈԼՈԳԻԱՅԻ ՈԼՈՐՏՈՒՄ
ԵՊՀ շրջանավարտների և կարիերայի կենտրոնն ինֆորմատիկայի և կիրառական մաթեմատիկայի ֆակուլտետի ուսանողների համար կազմակերպել էր տեղեկատվական հանդիպում՝ «Բիոտեխ ծրագրային ապահովման ճարտարագիտությունը թվային ճշգրիտ բժշկության մեջ» խորագրով:
ԵՊՀ-ՈՒՄ ԱՄՓՈՓՎԵՑԻՆ «Ի՞ՆՉ Է ՄՏԱԾՈՒՄ ՍՓՅՈՒՌՔԸ 21-ՐԴ ԴԱՐՈՒՄ» ԹԵՄԱՅՈՎ ՀԵՏԱԶՈՏՈՒԹՅՈՒՆՆԵՐԻ ԱՐԴՅՈՒՆՔՆԵՐԸ
Ինովացիոն լուծումների և տեխնոլոգիաների կենտրոնում (ISTC) տեղի ունեցած միջոցառման ժամանակ ծավալվեցին Հայկական սփյուռքին առնչվող առանցքային թեմաների վերաբերյալ քննարկումներ։