13.04.2007 | 
Կրթություն
ՓՈՐՁԻ ՓՈԽԱՆԱԿՈՒՄ
ՓՈՐՁԻ ՓՈԽԱՆԱԿՈՒՄ
«Եթե դուք որոշեք նոր խումբ ձեւավորել, ի՞նչ անհրաժեշտ քայլեր կձեռնարկեք դրա համար»:

Այս առաջադրանքը տրվեց Երեւանի պետական համալսարանի փիլիսոփայության եւ հոգեբանության ֆակուլտետի հոգեբանության ամբիոնի մագիստրատուրայի ուսանողներին: Ապրիլի 12-ին «Խմբային թերապիայի եւ խմբային խորհրդատվության խնդիրներն ու առանձնահատկությունները» թեմայով դասախոսություն էր կարդում ԱՄՆ Ջորջիայի համալսարանի պրոֆեսոր Արթուր Հորնը:

Բաց հասարակության ինստիտուտի բարձրագույն կրթության աջակցման ծրագրի Ակադեմիական կրթաթոշակներ ծրագրի (ԱԿԾ) շրջանակներում ֆակուլտետի կիրառական հոգեբանության ամբիոնի նախաձեռնությամբ սեմինար-քննարկումների շարք էր կազմակերպվել: Այն նվիրված էր խմբային թերապիայի եւ խմբային խորհրդատվության հարցերին:

Սա պրոֆեսոր Հորնի երրորդ այցելությունն էր ԵՊՀ: Նախորդ սեմինարների ընթացքում ներկայացվել եւ քննարկվել էին ընտանեկան թերապիայի, ընտանեկան կոնֆլիկտների դեպքում հոգեբանական միջամտության տեսությունների եւ մոդելների վերաբերյալ հարցեր: Վերջին սեմինարը նախորդների տրամաբանական եւ թեմատիկ շարունակությունն էր:

Փիլիսոփայության եւ հոգեբանության ֆակուլտետի մագիստրատուրայի ուսանողուհի Սեդա Արշակյանն այնքան էլ խանդավառված չէր այս սեմինարով. «Մենք առաջին անգամ ավելի հաճույքով մասնակցեցինք. ակնկալիքները մեծ էին: Սակայն ավարտից հետո պարզ դարձավ, որ ըստ արտասահմանցի դասախոսների` մենք տեսականի կարիք ունենք: Այնինչ մենք ուզում ենք գործնական մասի վրա կենտրոնանալ եւ հրավիրված դասախոսներից պրակտիկ գիտելիքներ ստանալ»:

Արթուր Հորնը հոգեբանության երկու` կիրառական հոգեբանության ու հոգեբանության տեսության եւ պատմության ամբիոնների դասախոսների ու աշխատակիցների համար ներկայացրել է կրեդիտային համակարգի մասին ուսումնասիրություն, որին հաջորդել է ակտիվ քննարկում ուսումնական ծրագրերի գնահատման, պարտադիր եւ ընտրողական առարկաների համատեղության, դասախոսի աշխատանքային ծանրաբեռնվածության, ուսուցման եւ հետազոտման համակցման կարեւորության եւ այլ խնդիրների շուրջ:

Հյուրը ԵՊՀ փիլիսոփայության եւ հոգեբանության ֆակուլտետին որոշ տեսաերիզներ եւ մասնագիտական գրքեր նվիրեց:

Այլ նորություններ
ԵՊՀ ՌՈՒՍ ԲԱՆԱՍԻՐՈՒԹՅԱՆ ՖԱԿՈՒԼՏԵՏՆ ԱՆՈՒՄ Է ԱՄԵՆ ՀՆԱՐԱՎՈՐԸ՝ ՀԵՌԱՎԱՐ ՈՒՍՈՒՑՈՒՄԸ ՊԱՏՇԱՃ ԻՐԱԿԱՆԱՑՆԵԼՈՒ ՀԱՄԱՐ
ՀՀ տարածքում արտակարգ դրություն հայտարարելու որոշմամբ պայմանավորված՝ ԵՊՀ ֆակուլտետներն իրականացնում են առցանց ուսուցում՝ ուսումնական գործընթացի երկարատև ընդհատումից խուսափելու համար։
«ՖԱԿՈՒԼՏԵՏՈՒՄ ԱՄԲՈՂՋ ԾԱՎԱԼՈՎ ԻՐԱԿԱՆԱՑՎՈՒՄ ԵՆ ՆԱԽԱՏԵՍՎԱԾ ԲՈԼՈՐ ԴԱՍԵՐԸ». ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՆ ԱՄՓՈՓԵԼ Է ՆԱԽՈՐԴ ՇԱԲԱԹՎԱ ԸՆԹԱՑՔՈՒՄ ԻՐԱԿԱՆԱՑՎԱԾ ՀԵՌԱՎԱՐ ՈՒՍՈՒՑՄԱՆ ԳՈՐԾԸՆԹԱՑԸ
Այսօր տեղի է ունեցել ԵՊՀ իրավագիտության ֆակուլտետի դեկանատի ընդլայնված հեռավար նիստ՝ դեկանի, դեկանի տեղակալների, ամբիոնների վարիչների, լաբորանտների, առկա և հեռակա ուսուցման բակալավրիատի և մագիստրատուրայի բոլոր կուրսերի ու խմբերի ավագների մասնակցությամբ։