05.10.2022 | 
Կրթություն
ՄԱԳԱՏԷ-Ի ԳԼԽԱՎՈՐ ՔԱՐՏՈՒՂԱՐՆ ԱՅՑԵԼԵԼ Է ԵՊՀ
ՄԱԳԱՏԷ-Ի ԳԼԽԱՎՈՐ ՔԱՐՏՈՒՂԱՐՆ ԱՅՑԵԼԵԼ Է ԵՊՀ
Երևանի պետական համալսարանում Ատոմային էներգիայի միջազգային գործակալության (ԱԷՄԳ) գլխավոր տնօրեն Ռաֆայել Մարիանո Գրոսին միջուկային ֆիզիկայի և միջազգային հարաբերությունների ոլորտի վերաբերյալ դասախոսություն կարդաց:

Մինչ դասախոսությունը Ռաֆայել Գրոսին հանդիպեց ԵՊՀ ռեկտոր Հովհաննես Հովհաննիսյանի հետ՝ քննարկելու երկկողմ համագործակցություն հաստատելու և համագործակցային հարաբերությունները զարգացնելու հնարավորությունները:

 

Քննարկման ժամանակ Ռ․ Գրոսիին ներկայացվեցին ԵՊՀ գործունեության հիմնական ուղղությունները, միջազգայնացմանն ուղղված ծրագրերը, ինչպես նաև ԵՊՀ-ում միջուկային էներգիայի ուղղությամբ տարվող կրթական ու հետազոտական գործընթացները, այդ թվում՝ մագիստրոսական նոր ծրագրի ներդրման աշխատանքները։

 

Մասնավորապես նշվեց, որ ներկայում իրականացվում են «Միջուկային տեխնոլոգիաների կառավարում» մագիստորսական դասընթացի համար ՀՀ ԿԳՄՍՆ-ում լիցենզավորման համար անհրաժեշտ փաթեթի մշակման աշխատանքները: Արդեն իսկ մշակվում են ԱԷՄԳ առաքելության հետ ունեցած հանդիպումների արդյունքում մշակված կրթական ծրագրով նախատեսված դասընթացների պլանները, կրթական նյութերը, լաբորատոր փորձերը:

 

 

ԱԷՄԳ-ի հետ համագործակցությամբ ԵՊՀ միջուկային ֆիզիկայի լաբորատորիան համալրվելու է ժամանակակից նեյտրոնային և գամմա ճառագայթման չափումների և վերլուծության սարքավորումներով, Ռեակտորների ֆիզիկայի վիրտուալ լաբորատորիայով և ԱԷԿ վարժասարքով:

 

ԱԷՄԳ գլխավոր տնօրենը պատրաստակամություն հայտնեց համագործակցելու և միջուկային անվտանգության ապահովման ոլորտում տարաբնույթ ծրագրերի իրագործման համար ԵՊՀ-ին օժանդակելու։

 

ԱԷՄԳ գլխավոր տնօրենը ներկայացրեց գործակալության դերը ներկայիս տարածաշրջանային և գլոբալ մարտահրավերների հաղթահարման համատեքստում, խոսեց նաև միջուկային էներգետիկայի դերակատարմանը, էներգետիկ անվտանգության ապահովման և կլիմայական փոփոխությունների հաղթահարմանը վերաբերող հարցերից:

 

 

Ռ. Գրոսին ԵՊՀ ուսանողներին և պրոֆեսորադասախոսական կազմին ներկայացրեց միջուկային գիտության դերը մարդու առողջության, մասնավորապես քաղցկեղի դեմ պայքարի ոլորտում, անդրադարձավ նաև միջուկային անվտանգության և միջուկային զենքի տարածումը կանխելու հարցերին։

 

 

Դասախոսությունն ամփոփվեց հարցուպատասխանով:

 

Նշենք, որ Ռ. Գրոսին Ատոմային էներգիայի միջազգային գործակալությունը (ԱԷՄԳ) գլխավորում է 2019 թվականից:

Այլ նորություններ
«ԹՎԱՅԻՆ ՄԱՐՔԵԹԻՆԳԻ ԴԵՐԸ ԲԻԶՆԵՍՈՒՄ» ԽՈՐԱԳՐՈՎ ՎԱՐՊԵՏՈՒԹՅԱՆ ԴԱՍ ԵՊՀ-ՈՒՄ
ԵՊՀ տնտեսագիտության և կառավարման ֆակուլտետում կառավարման և գործարարության ամբիոնի և «SSB Academy»-ի նախաձեռնությամբ անցկացվեց վարպետության դաս, որի հիմնական նպատակն էր ուսանողներին տալ պրակտիկ գիտելիք և հմտություններ:
ԿԱՅԱՑԵԼ Է «ՀԱՅԱՍՏԱՆԸ, ՄԻԱՑՅԱԼ ՆԱՀԱՆԳՆԵՐԸ ԵՎ ՏԱՐԱԾԱՇՐՋԱՆԱՅԻՆ ՓՈԽԱԿԵՐՊՈՒՄՆԵՐԸ ԵՎՐԱՍԻԱՅՈՒՄ. ԱՆԴՐԱԶԳԱՅԻՆ ՓՈԽԸՄԲՌՆՄԱՆ ԸՆԴԼԱՅՆՈՒՄ» ԽՈՐԱԳՐՈՎ ԳԻՏԱԺՈՂՈՎԻ ԵՐԿՐՈՐԴ ՆԻՍՏԸ
Ս․թ․ դեկտեմբերի 3-ին ԵՊՀ գիտխորհրդի նիստերի դահլիճի նախասրահում տեղի է ունեցել կլոր սեղան-քննարկում ԵՊՀ-ի և Արիզոնայի պետական համալսարանների կազմակերպած և ԵՊՀ Ամերիկյան հետազոտությունների կենտրոնի գործունեության շրջանակում իրականացվող միջազգային գիտաժողովի շրջանակում։