05.09.2019 | 
Քաղաքականություն
«ԱՐԳԵՆՏԻՆԱՅՈՒՄ ՄԵԾ Է ՀԱՄԱԿՐԱՆՔԸ ՄԵՐ ԱԶԳԻ ՆԿԱՏՄԱՄԲ». ԱՐԳԵՆՏԻՆԱՅԻ ՀԱՆՐԱՊԵՏՈՒԹՅՈՒՆՈՒՄ ՀՀ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆ ԷՍԹԵՐԱ ՄԿՐՏՈՒՄՅԱՆ
«ԱՐԳԵՆՏԻՆԱՅՈՒՄ ՄԵԾ Է ՀԱՄԱԿՐԱՆՔԸ ՄԵՐ ԱԶԳԻ ՆԿԱՏՄԱՄԲ». ԱՐԳԵՆՏԻՆԱՅԻ ՀԱՆՐԱՊԵՏՈՒԹՅՈՒՆՈՒՄ ՀՀ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆ ԷՍԹԵՐԱ ՄԿՐՏՈՒՄՅԱՆ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր ընդունել է Արգենտինայի Հանրապետությունում ՀՀ արտակարգ և լիազոր դեսպան Էսթերա Մկրտումյանին:

Հանդիպմանը ներկա էին Միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանն ու Եվրոպական լեզուների և հաղորդակցության ֆակուլտետի դեկան Գևորգ Բարսեղյանը:

Էսթերա Մկրտումյանը ներկայացրեց Արգենտինայի և հավատարմագրված մյուս երկրների հետ համալսարանական համագործակցության հնարավորությունները՝ հատկապես ընդգծելով Բալսեյրոյի ինստիտուտի և Ֆիզիկայի ինստիտուտի համագործակցության արդյունավետությունը:



Ինչպես նշեց դեսպանը, արգենտինական համալսարաններում մեծ տեղ է հատկացվում ոչ միայն բնական գիտություններին, այլև լեզուների ուսուցմանը, գրականության ուսումնասիրությանը: Ինչպես հայտնի է, լատինաամերիկյան գրականությունը երիտասարդ է, բայց բազմաթիվ Նոբելյան մրցանակակիրներ ունի:

Գեղամ Գևորգյանը, խոսելով երկրների ֆիզիկական հեռավորության մասին, շեշտեց, որ կարևոր է հստակ նախագծել և համագործակցության վերաբերյալ քննարկումների, հանդիպումների օրակարգ մշակել՝ ապագա գործուղումներն առավել արդյունավետ դարձնելու համար:

Դեսպան Էսթերա Մկրտումյանն ասաց, որ հատուկ ուշադրություն է դարձրել ԵՊՀ-ի և արգենտինյան, Ուրուգվայի համալսարանների ընդհանուր եզրեր ունեցող ոլորտներին՝ ֆիզիկային, ռադիոֆիզիկային, երկրաբանությանը, իսպաներենի դասավանդմանը:



Նա անդրադարձավ նաև հայերենի՝ որպես օտար լեզվի դասավանդման միասնական մոտեցում ունենալու անհրաժեշտությանը, ինչը կարևոր է ինչպես Լատինական Ամերիկայում գտնվող հայերի, այնպես էլ փոխանակման ծրագրերով Հայաստան եկող ուսանողների համար:

Էսթերա Մկրտումյանը փաստեց, որ թե՛ արգենտինյան, թե՛ հավատարմագրված մյուս երկրների համալսարանները բաց են համագործակցության համար, և պետք է անպայման օգտվել այդ հնարավորություններից:

Միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանը ներկայացրեց «Ցեղասպանագիտություն» մագիստրոսական ծրագիրը, որը մեծ հետաքրքրություն է առաջացնում նաև լատինաամերիկյան երկրներում: Նա նշեց, որ ծրագրին դիմել են նաև Իրաքից ուսանողներ:

Գեղամ Գևորգյանը և Էսթերա Մկրտումյանը քննարկեցին նոր մասնագիտացումներ ներդնելու հարցը, մասնավորապես՝ կրոնական տուրիզմը և գաստրոտուրիզմը սպասարկող մասնագետների պատրաստումը:

Էսթերա Մկրտումյանն իր պատրաստակամությունը հայտնեց ԵՊՀ-ի և լատինաամերիկյան համալսարանների միջև համագործակցությունը զարգացնելու հարցում:

 


Մարի Ռաֆյան

Այլ նորություններ
ԸՆԹԱՑԻԿ ԵՎ ԱՌԱՋԻԿԱ ՀԱՐՑԵՐԻ ՔՆՆԱՐԿՈՒՄ ՈՒ ՊԱՐԶԱԲԱՆՈՒՄ. ՏԵՂԻ Է ՈՒՆԵՑԵԼ ՌԵԿՏՈՐԱՏԻ ՆԻՍՏ
Գիտխորհրդի նիստերի դահլիճում այսօր տեղի է ունեցել ԵՊՀ ռեկտորատի նիստ՝ օրակարգային և ընթացիկ մի շարք հարցերով:
«ԵՊՀ-Ն՝ ՈՐՊԵՍ ՄԱՅՐ ԲՈՒՀ, ՄԵԾ ԴԵՐԱԿԱՏԱՐՈՒՄ ՈՒՆԻ ԵՐԿՈՒ ԵՐԿՐՆԵՐԻ ՄԻՋԵՎ ՀԱՐԱԲԵՐՈՒԹՅՈՒՆՆԵՐԸ ԶԱՐԳԱՑՆԵԼՈՒ ԳՈՐԾՈՒՄ». ԵՊՀ-ՈՒՄ ԷՐ ՀՀ-ՈՒՄ ԻՐԱՆԻ ԻՍԼԱՄԱԿԱՆ ՀԱՆՐԱՊԵՏՈՒԹՅԱՆ ԱՐՏԱԿԱՐԳ ԵՎ ԼԻԱԶՈՐ ԴԵՍՊԱՆ ՍԵՅԵԴ ՔԱԶԵՄ ՍԱՋԱԴԻՆ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր իր աշխատասենյակում ընդունեց ՀՀ-ում Իրանի Իսլամական Հանրապետության (ԻԻՀ) արտակարգ և լիազոր դեսպան Սեյեդ Քազեմ Սաջադիին, որը շուտով ավարտում է իր աշխատանքային լիազորությունները Հայաստանի Հանրապետությունում: