05.10.2017 | 
Քաղաքականություն
ՄԵԿՆԱՐԿԵԼ ԵՆ ԵՊՀ ԴԱՍԱԽՈՍՆԵՐԻ ՄԱՐԶԱՅԻՆ ԱՅՑԵԼՈՒԹՅՈՒՆՆԵՐԸ
ՄԵԿՆԱՐԿԵԼ ԵՆ ԵՊՀ ԴԱՍԱԽՈՍՆԵՐԻ ՄԱՐԶԱՅԻՆ ԱՅՑԵԼՈՒԹՅՈՒՆՆԵՐԸ
Հոկտեմբերի 4-ին Մայր բուհի պրոֆեսորադասախոսական կազմի ներկայացուցիչներն այցելել են Գեղարքունիքի մարզի Վարդենիկի կրթահամալիր:

«Համալսարանական օր» խորագիրը կրող այցը կազմակերպվել էր ԵՊՀ մինչհամալսարանական կրթության վարչության կողմից և նպատակ ուներ նպաստել ավարտական դասարանների աշակերտների մասնագիտական կողմնորոշմանը, իրազեկության մակարդակը բարձրացնելուն և դեպի ԵՊՀ ուղղորդելուն:

 

Վարդենիկի կրթահամալիր էին այցելել Ֆիզիկիայի ֆակուլտետի օպտիկայի ամբիոնի ասիստենտ Տիգրան Դադալյանը, Հայ բանասիրության ֆակուլտետի հայոց լեզվի ամբիոնի դոցենտ Աշոտ Տեր-Մինասյանը, Աշխարհագրության և երկրաբանության ֆակուլտետի ռեգիոնալ երկրաբանության, պետրոլոգիայի և օգտակար հանածոների ամբիոնի դոցենտ Սամվել Առաքելյանը, Մաթեմատիկայի և մեխանիկայի ֆակուլտետի դասախոս Արաքսյա Մարգարյանը,  Տնտեսագիտության և կառավարման ֆակուլտետի կառավարման և գործարարության ամբիոնի ասիստենտ Աննա Մկրտչյանը:

 

Այցի շրջանակում ԵՊՀ դասախոսները ոչ միայն դասախոսություն են կարդացել, այլև զրուցել են ուսուցիչների հետ, օգնել մեթոդական և այլ հարցերով, ինչպես նաև պատրաստակամություն հայտնել հետագա համագործակցության համար:

 

Մեզ հետ զրույցում Տիգրան Դադալյանը փաստեց, որ այցն իսկապես արդյունավետ էր. «Ապագա ուսանողներին պատմեցի լույսի հատկությունների մասին: Փորձերի ցուցադրություն էլ անցկացրինք, որին աշակերտները մեծ հետաքրքրությամբ հետևեցին: Նպատակս էր աշակերտներին բացատրել լույսի հետ կապված այն ամենը, ինչին նրանք գրեթե ամեն օր առնչվում են, բայց տեսականորեն չգիտեն»: 

 

Աննա Մկրտչյանն էլ ապագա ուսանողների համար դասախոսություն է կարդացել մարքեթինգի և մենեջմենթի վերաբերյալ:

 

«Միմյանց կապելով երկու առարկաները՝ ներառել եմ նաև մոտիվացիայի, կորպորատիվ կուլտուրայի, լիդերության և անձնակազմի կառավարման հարցերը և այլն: Դասախոսության ընթացքում խոսել ենք նաև որոշ կազմակերպությունների մասին,- մեզ հետ զրույցում նշեց ԵՊՀ ասիստենտը և հավելեց, որ իր տպավորությունները սպասվածից ավելին են,- տնտեսագիտական հոսքում աշակերտները բավականին հետաքրքրված էին, կարծում եմ՝ այսպիսի այցեր պետք է ավելի հաճախ կազմակերպվեն»:

Այլ նորություններ
ԵՊՀ ԴԱՍԱԽՈՍԸ ՆԵՐԿԱՅԱՑՐԵՑ ԲԱՐՈՅԱԿԱՆ ՀԱՍԱՐԱԿԱՐԳ ԿԱՌՈՒՑԵԼՈՒ ՀԱՄԱՐ ԱՆՀՐԱԺԵՇՏ ՍԱՀՄԱՆԱԴՐՈՒԹՅԱՆ ՈՒՐՎԱԳԻԾԸ
ԵՊՀ ֆիզիկայի ֆակուլտետի դասախոս Մերուժան Հարությունյանն այսօր ԵՊՀ-ում հանրային քննարկմանը ներկայացրեց իր կազմած «Բարոյակարգ հաստատելու դրույթները» վերնագրով 18-էջանոց առաջարկությունների ձեռնարկը:
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ԴԵԿԱՆ Է ՎԵՐԸՆՏՐՎԵԼ ԱՐԾՐՈՒՆ ԱՎԱԳՅԱՆԸ
Այսօր ԵՊՀ հայ բանասիրության ֆակուլտետի գիտխորհրդի նիստում փակ, գաղտնի քվեարկությամբ, 32 կողմ և 3 անվավեր ձայների հարաբերակցությամբ ֆակուլտետի դեկան է վերընտրվել բանասիրական գիտությունների դոկտոր, պրոֆեսոր Արծրուն Ավագյանը: