20.07.2018 | 
Կրթություն
ՄԱԳԻՍՏՐԱՏՈՒՐԱՅԻ ԿՐԹԱԹՈՇԱԿ՝ ՀԱՄԱՅՆՔԱՅԻՆ ԽՆԴԻՐՆԵՐԻ ՆՈՐԱՐԱՐ ԼՈՒԾՈՒՄՆԵՐԻ ՀԱՄԱՐ
ՄԱԳԻՍՏՐԱՏՈՒՐԱՅԻ ԿՐԹԱԹՈՇԱԿ՝ ՀԱՄԱՅՆՔԱՅԻՆ ԽՆԴԻՐՆԵՐԻ ՆՈՐԱՐԱՐ ԼՈՒԾՈՒՄՆԵՐԻ ՀԱՄԱՐ
Այսօր տեղի ունեցավ «Աջակցություն ուսմանը՝ ապագայի ներդրում» խորագրով ծրագրի արդյունքների ամփոփիչ միջոցառումը, որն իրականացվում էր ԵՊՀ շրջանավարտների և կարիերայի կենտրոնի ու «ԱՄՔՈՐ Հայաստան» բարեգործական հիմնադրամի հետ:

Միջոցառման ընթացքում ծրագրին մասնակից ուսանողները ստացան վկայականներ, իսկ 10 ուսանողներ հնարավորություն ստացան անվճար ուսանել մագիստրատուրայում և կյանքի կոչել համայնքային խնդիրների լուծմանն ուղղված իրենց նորարարական ծրագրերը:

«Աջակցություն ուսմանը՝ ապագայի ներդրում» խորագրով ծրագիրը մեկնարկել էր 2018 թ-ի փետրվար ամսին: Ծրագրի շրջանակում ԵՊՀ ռեկտոր Արամ Սիմոնյանի և «ԱՄՔՈՐ Հայաստան» հիմնադրամի միջև կնքվել էր համագործակցության հուշագիր, որի հիմնական նպատակն էր Սոցիոլոգիայի ու Տնտեսագիտության և կառավարման ֆակուլտետների ուսանողներին ներկայացնել, ինչպես նաև իրազեկել ծրագրի մասին:

Այս ֆակուլտետների բակալավրիատի ավարտական 4-րդ կուրսի շուրջ 20 մարզաբնակ ուսանողներ մասնակցեցին ծրագրերի մշակման և իրականացման խնդիրներին նվիրված դասընթացներին: Ուսանողները մշակեցին համայնքային զարգացման ծրագրեր, և գնահատման արդյունքում 10 լավագույն ծրագրերի հեղինակներին մագիստրատուրայում ուսումն անվճար շարունակելու հնարավորություն ընձեռվեց։

«Սկզբում նախատեսված էր, որ հաղթողները պետք է 8-ը լինեին, սակայն ի վերջո հաղթողների թիվը դարձավ 10-ը՝ պայմանավորված ուսանողների կողմից մշակած զարգացման ծրագրերի արդիականությամբ: Ուսանողներն առաջարկում էին առողջապահությանը, գյուղատնտեսության ոլորտներին, ջրամատակարարմանը վերաբերվող ծրագրեր: Դրանք իրականանալի ծրագրեր էին, ուսանողները շատ մանրամասն ուսումնասիրել էին իրենց համայնքների խնդիրները»,- ասաց Շրջանավարտների և կարիերայի կենտրոնի աշխատակից Արմինե Հաջաթյանը:

«ԱՄՔՈՐ Հայաստան» բարեգործական հիմնադրամն աջակցելու է առավել արդյունավետ ծրագրերի իրականացմանը։ Ուսանողների մշակած համայնքային զարգացման ծրագրերը հետագայում կարող են հիմք դառնալ մագիստրոսական թեզերի համար: Դասընթացների արդյունքում ուսանողները ձեռք բերեցին ներկայացման, ֆինանսավորման առանձնահատկությունների հետ կապված հմտություններ:

Խիստ կարևոր էր, որ ծրագրի մասնակիցները մարզաբնակ ուսանողներ էին, ովքեր ուսումը մագիստրատուրայում շարունակելու և իրենց համայնքների զարգացմանը նպաստելու հնարավորություն ստացան: Մասնակցության համար ընտրվում էին սոցիալական որևէ խմբի պատկանող ուսանողներ:

Իսկ ծրագրի վերջնական փուլը չհաղթահարած 5 ուսանողները պարգևատրվեցին պլանշետներով:

«Մենք երկար ժամանակ է համագործակցում ենք «ԱՄՔՈՐ Հայաստան» հիմնադրամի հետ: Այս ծրագրի համակարգումը, տեղեկատվության տարածումը և ուսանողների հավաքագրումն իրականացրեց Շրջանավարտների և կարիերայի կենտրոնը, իսկ հմտություններ զարգացնող դասընթացները կազմակերպեց հիմնադրամը»,- հավելեց Արմինե Հաջաթյանը:

Նա նշեց, որ «ԱՄՔՈՐ Հայաստան» հիմնադրամը տարբեր ծրագրեր է իրականացնում, և այս ծրագրի նպատակներից էր վերհանել մարզերում առկա խնդիրները հենց մարզաբնակ ուսանողների միջոցով:

 

 

Մարի Ռաֆյան

Այլ նորություններ
5 ՄԱԳԻՍՏՐՈՍԱԿԱՆ ԾՐԱԳԻՐ, ՈՐ ԽՈՐՀՈՒՐԴ Է ՏԱԼԻՍ ՌՈՒԲԵՆ ՄԵԼՔՈՆՅԱՆԸ
«Ընտրություն կատարելիս պետք է առաջնորդվել պետական շահով և աշխատաշուկայի տված հնարավորություններով»:
ԵՊՀ ԱՍՊԻՐԱՆՏԸ ՄԱՍՆԱԿՑԵԼ Է ԲԱՐՁՐ ԷՆԵՐԳԻԱՆԵՐԻ ՖԻԶԻԿԱՅԻ ԵՎՐՈՊԱԿԱՆ ԴՊՐՈՑԻՆ
ԵՊՀ ֆիզիկայի ֆակուլտետի միջուկային ֆիզիկայի ամբիոնի ասպիրանտ Էլմիրա Մելյանը մասնակցել է Բարձր էներգիաների ֆիզիկայի եվրոպական դպրոցին, որն անցկացվել է հունիսի 20-ից հուլիսի 3-ն Իտալիայի Մարատեա քաղաքում: Էլմիրան մեզ հետ զրույցում պատմեց իր տպավորությունների և ձեռքբերումների մասին: