07.02.2019 | 
Կրթություն
ԲՈՒՀ-ԴՊՐՈՑ ՀԱՄԱԳՈՐԾԱԿՑՈՒԹՅՈՒՆԸ ԽԹԱՆՈՒՄ Է ԱՇԱԿԵՐՏՆԵՐԻ ՍՏԵՂԾԱՐԱՐ ՄՏԱԾՈՂՈՒԹՅՈՒՆԸ
ԲՈՒՀ-ԴՊՐՈՑ ՀԱՄԱԳՈՐԾԱԿՑՈՒԹՅՈՒՆԸ ԽԹԱՆՈՒՄ Է ԱՇԱԿԵՐՏՆԵՐԻ ՍՏԵՂԾԱՐԱՐ ՄՏԱԾՈՂՈՒԹՅՈՒՆԸ
«Հերացի» ավագ դպրոցի աշակերտներն այսօր այցելեցին ԵՊՀ կենսաբանության ֆակուլտետ, ծանոթացան ֆակուլտետի պատմությանը և կրթական ծրագրերին:

Նշենք, որ աշակերտների հյուրընկալությունները ԵՊՀ շարունակական բնույթ են կրելու, ինչի նպատակն է նպաստել ավարտական դասարանների աշակերտների մասնագիտական կողմնորոշմանը և վերջիններիս ուղղորդել դեպի ԵՊՀ:

 

Աշակերտները շրջայց կատարեցին Կենսաբանության ֆակուլտետի մի քանի լաբորատորիաներում և ծանոթացան ժամանակակից սարքավորումների աշխատանքին:

 

Նրանց դիմավորեց Բուսաբանության և սնկաբանության ամբիոնի ասիստենտ Նարինե Զաքարյանը, որն աշակերտներին բացատրեց տարբեր բույսերի անատոմիական կառուցվածքը: Աշակերտներին ամբիոնի ասիստենտը բաժանեց տարբեր պատրաստուկներ: Նրանք մանրադիտակով ուսումնասիրեցին ցողունի, տերևի և արմատի անատոմիական կառուցվածքը: 

 

   

Ն. Զաքարյանի խոսքով, աշակերտները մեծ ոգևորությամբ են մասնակցում գործնական աշխատանքներին, մասնավորապես մեծ սիրով կատարում են  մանրադիտակով ուսումնասիրություններ, քանի որ ոչ բոլոր դպրոցներն ունեն այսօրինակ մանրադիտակներ:   

 

Ըստ նրա, այս այցերի արդյունքում աշակերտների մոտ մեծանում է «Կենսաբանություն» առարկայի նկատմամբ հետաքրքրությունը. «Լինում են դեպքեր, երբ նույն դպրոցի աշակերտները մի քանի անգամ են այցելում են մեր ֆակուլտետ՝ իրենց հետաքրքրող լաբորատոր աշխատանքներ կատարելու համար»:

 

 

«Հերացի» ավագ դպրոցի «Կենսաբանություն» առարկայի ուսուցչուհի Ռուբինա Հարոյանը նշեց, որ ավագ դպրոցի կայացման պայմաններից է բուհ-դպրոց համագործակցությունը. «Այսպիսի այցերը նպաստում են տարբեր միջազգային մրցույթներում լավագույնս ներկայացնել Հայաստանի գիտական ներուժը, ինչպես նաև խթանում են աշակերտների ստեղծարար մտածողությունը»:

 

«Հերացի» ավագ դպրոցի աշակերտ Սոֆի Էլիզբարյանն ասաց, որ նմանօրինակ այցերն օգնում են էլ ավելի մանրամասն ծանոթանալու բուհի կրթական ծրագրերին և նորագույն սարքավորումներին:       

 

Նադեժդա Տեր-Աբրահամյան

 

Այլ նորություններ
ԵՊՀ ՎԵՐԱՊԱՏՐԱՍՏՎԱԾ ԴԱՍԱԽՈՍՆԵՐՆ ԻՐԵՆՑ ՍՏԱՑԱԾ ԳԻՏԵԼԻՔՆԵՐԸ ՓՈԽԱՆՑՈՒՄ ԵՆ ԳՈՐԾԸՆԿԵՐՆԵՐԻՆ
ԵՊՀ աշխատակիցները դեկտեմբերի 3-ից 7-ը Շվեդիայի Լինշյոպինգի համալսարանում մասնակցել են «Ակտիվ ուսուցում շրջված լսարանում» վերապատրաստման դասընթացին և այժմ վերապատրաստում են իրենց գործընկերներին:
ԴԱՍԱԽՈՍՈՒԹՅՈՒՆՆԵՐԻ ՇԱՐՔ՝ ՆՎԻՐՎԱԾ «ՄԱՅՐԵՆԻԻ ՕՐՎԱՆ»
«Մայրենիի օր» տոնի առթիվ այսօր Երևանի մի շարք ավագ դպրոցներում ԵՊՀ մինչհամալսարանական կրթության վարչությունը Հայ բանասիրության ֆակուլտետի հետ համատեղ կազմակերպել էին դասախոսությունների շարք: