21.04.2009 | 
Գիտություն
ԻՄԱՑՅԱԼ ՄԱՀՆ ԱՆՄԱՀՈՒԹՅՈՒՆ Է
ԻՄԱՑՅԱԼ ՄԱՀՆ ԱՆՄԱՀՈՒԹՅՈՒՆ Է
«Երբ ես նրան հարցրի, թե գիտեն արդյոք հարազատներդ, որ մեկնում ես ռազմաճակատ, ասաց` հետո կիմանան, ու վստահ եմ` կհասկանան ինձ…»

Այսօր ԵՊՀ պատմության ֆակուլտետի դահլիճում տեղի ունեցավ ՀՀ ազգային հերոս, պատմության ֆակուլտետի զոհված ուսանող, ազատամարտիկ Թաթուլ Կրպեյանի ծննդյան տարեդարձին նվիրված ցերեկույթ, որը կազմակերպել էին Պատմության ֆակուլտետի ՈՒԳԸ-ն եւ «Վարդանանք» ռազմահայրենասիրական դաստիարակության ակումբը:

 

Միջոցառումը սկսվեց ԵՊՀ աստվածաբանության ֆակուլտետի դեկան Տեր Անուշավան եպիսկոպոս Ժամկոչյանի աղոթքով, որին հոտնկայս միացան նաեւ դահլիճում ներկա գտնվողները: Այնուհետեւ միջոցառման մասնակիցներին ողջունեցին եւ իրենց հիշողություններով կիսվեցին Թաթուլ Կրպեյանի հարազատները, ընտանիքի անդամները, դասախոսներն ու ընկերները: Նրանցից յուրաքանչյուրը Թաթուլին ներկայացրեց որպես մարտիկ, ուսանող, ընկեր ու պարզապես կենսախինդ անձնավորություն:

 

«Ինձ համար դժվար է առանց հուզմունքի խոսել Թաթուլի մասին: Նա ռազմաճակատ էր մեկնել երկու առաքելությամբ` ուսուցանել եւ ամեն գնով հայրենիքը պաշտպանել: Ցերեկն ուսուցչական աշխատանքներ էր իրականացնում, երեկոյան կռվի դաշտում պաշտպանության ծրագրեր մշակում: Նա ասում էր, որ Երևան չի վերադառնա, եթե Գետաշենն ընկնի: Այդպես էլ եղավ:

 

Կռվի թեժ պահին Թաթուլը կրկին ելքը գտավ. գերի վերցրեց ռուսական զորքի հրամանատար Մաշկովին ու նռնակը ձեռքին` թշնամուն ստիպեց գրոհը կանգնեցնել: Ի վերջո թշնամու գնդակը մահացու դարձավ իր եւ ընկերների համար: Բայց նրա` այդ հերոսական ու անձնվեր արարքը ստիպեց հակառակորդին հետեւություններ անել, ու արդյունքում, չնայած Գետաշենն անցավ թշնամու ձեռքը, հազարավոր գետաշենցիներ փրկվեցին: Նա ընդամենը 26 տարեկան էր»,- պատմում է Թաթուլի դասախոս Արտավազդ Դարբինյանը:

 

Դահլիճում էր նաեւ Թաթուլի դուստրը` Ասպրամը, ով այժմ ուսանում է ԵՊՀ իրավագիտության ֆակուլտետի 3-րդ կուրսում: «Իմ հասակակիցներին ուզում եմ խնդրել, որ միշտ վառ պահեն մեր հերոսներից յուրաքանչյուրի հիշատակը, քանի որ հենց նրանց օրինակով է դաստիարակվելու մեր ապագա սերունդը, քանի որ անցյալի դասերով է կառուցվելու մեր ապագան»,- ասաց Ասպրամ Կրպեյանը: Լրագրող Գոհար Մարտիկյանը, ով «Ապրելու բանաձեւ» շարքի հեղինակն է, Ասպրամին հանձնեց գրքի այն հատորը, որի մի մասն էլ նվիրված է հերոս Թաթուլին:

 

«Վստահ եմ, որ այսօրվա երիտասարդներից եթե ոչ յուրաքանչյուրի, ապա ամեն երկրորդի մեջ ապրում են թաթուլներ ու մոնթեներ, որոնք անհրաժեշտ պահին կյանքը չեն խնայի հայրենիքի բարօրության համար»,- ասաց Գոհար Մարտիկյանը: Իսկ ԵՊՀ հայագիտության կենտրոնի մշակութային ցեղասպանության բաժնի գիտաշխատող Քեյթի Գունդակչյանը հիշեց. «Թաթուլը երգող ու պարող երիտասարդ է: Երբ նրան վերջին անգամ տեսա, ընկերոջ հետ հենց դրսում, ձեռքերը վեր պարզած, քոչարի էր պարում»: Ելույթներից հետո մի շարք հայրենասիրական երգեր կատարեց «Ակունք» համույթը, իսկ ցերեկույթն ամփոփեց Թաթուլ Կրպեյանի կյանքին նվիրված ֆիլմի ցուցադրությունը:

Այլ նորություններ
ԵՊՀ-ՈՒՄ ԳՈՐԾՈՒՄ Է «ՎԻԶՈՒԱԼ ՀԱՇՎԱՐԿ» ՄԱԳԻՍՏՐՈՍԱԿԱՆ ԾՐԱԳԻՐԸ
Հայաստանում առաջին անգամ 2010 թվականին մեկնարկել է ԵՊՀ տեղեկատվական տեխնոլոգիաների կրթական և հետազոտական (ՏՏԿՀ) կենտրոնի և Գերմանիայի Ռոստոկի համալսարանի «Վիզուալ հաշվարկ» մագիստրոսական համատեղ կրթական ծրագիրը։ Այն իրականացվում է Գերմանական ակադեմիական փոխանակման ծառայության (DAAD) աջակցությամբ:
ԳԻՏԱԿԱՆ ԹԵՄԱ․ ԵՊՀ-ՈՒՄ ՍԻՆԹԵԶՎՈՒՄ ԵՆ ԿՈՂՄՆԱՅԻՆ ՌԱԴԻԿԱԼՈՒՄ ՏԱՐԱԲՆՈՒՅԹ ՏԵՂԱԿԱԼԻՉՆԵՐ ՊԱՐՈՒՆԱԿՈՂ ՈՉ ՍՊԻՏԱԿՈՒՑԱՅԻՆ ԱՄԻՆԱԹԹՈՒՆԵՐ
ՀՀ ԿԳՄՍՆ գիտության կոմիտեն ֆինանսավորման է երաշխավորել «Ոչ սպիտակուցային α-ամինաթթուների և պեպտիդների վրա հիմնված համակարգերի սինթեզ և կենսաբանական գնահատում» գիտական թեման: Թեմայի շուրջ զրուցել ենք աշխատանքային խմբի ղեկավար, ԵՊՀ ֆարմացիայի ինստիտուտի՝ ֆարմքիմիայի և ֆարմակոգնոզիայի ամբիոնի վարիչ, ք․գ.թ․, դոցենտ Հայարփի Սիմոնյանի հետ: