11.10.2019 | 
Ուսանողական
«ՆԵՐԿԱՅԱՑՄԱՆ ՀՄՏՈՒԹՅՈՒՆՆԵՐ» ՍԵՄԻՆԱՐ-ՔՆՆԱՐԿՈՒՄ ԵՊՀ-ՈՒՄ
«ՆԵՐԿԱՅԱՑՄԱՆ ՀՄՏՈՒԹՅՈՒՆՆԵՐ» ՍԵՄԻՆԱՐ-ՔՆՆԱՐԿՈՒՄ ԵՊՀ-ՈՒՄ
ԵՊՀ Սարգիս և Մարի Իզմիրլյանների անվան գրադարանի Ադամյան սրահում Շրջանավարտների և կարիերայի կենտրոնի ու «Quick Start»-ի համատեղ ջանքերով այսօր տեղի է ունեցել «Ներկայացման հմտություններ» խորագրով սեմինար-քննարկում:

Ներկաներին ողջունեց  ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը:

 

Վերջինս կարևորեց նմանաբնույթ սեմինար-քննարկումների դերը և հույս հայտնեց, որ մասնակիցների թիվն այսօրինակ քննարկումներին գնալով մեծանալու է:

 

Դասընթացը վարեց «BSC Business Support Center»-ի կառավարման խորհրդատու Նունե Վարոսյանը:

 

Ողջունելով ուսանողներին՝ նա ներկայացրեց իր երկարամյա փորձն ինչպես ՀՀ-ում, այնպես էլ ՀՀ-ից դուրս:

 

«Իմ աշխատանքային գործունեության ընթացքում ես մշտապես համատեղել եմ արևելյան և արևմտյան փորձերը. դրանք ավելի արդյունավետ են դարձրել աշխատանքս»,- նշեց Ն. Վարոսյանը:

 

Սեմինար-քննարկման հիմքում անհատի ներկայացման հմտություններն էին՝ արդյունավետ ներկայացման հիմնական կանոնները, լսարանի հետ կապի հաստատումը, ներկայացման հիմնական ուղերձը:

 

Ըստ Ն. Վարոսյանի՝ նախքան լսարանին ներկայանալը պետք է նախապատրաստվել, պլանավորել. «Նախապատրաստման համար նախ պետք է որոնել նպատակները, այնուհետև ուսումնասիրել լսարանը»:

 

Բանախոսի հավաստմամբ, ներկայանալի լինելու համար շատ կարևոր են լսարանի հետ հայացքով հաղորդակցումը և ձայնի արդյունավետ օգտագործումը:

 

Սեմինար-քննարկման ընթացքում բանախոսն անդրադարձավ նաև կուրսային, դիպլոմային աշխատանքները, ինքնակենսագրականը ճիշտ գրելու և ներկայացնելու, գործատուի հետ ճիշտ հաղորդակցվելու առանձնահատկություններին, լսարանում հնչած կարծիքների կենտրոնացմանը և այլն:

 

Կարևորելով ներկայացման համար առաջին տպավորությունը՝ Ն. Վարոսյանն ընդգծեց ինչպես խոսքի, այնպես էլ արտաքին տեսքի կարևորությունը:

«Հաղորդակցման երեք V-եր կան. առաջինը խոսքն է, երկրորդը՝ արտաքին տեսքը (հագուստ, ժպիտ), իսկ երրորդը՝ ձայնը: Շատ կարևոր է ոչ միայն ասվածի բովանդակությունը, այլև ձևը»,- նշեց բանախոսը:

Նա խորհուրդ տվեց լսարանին ներկայանալի լինելու համար մշտապես ունենալ նոր «խաղաքարտեր», ձայնային շեշտադրումներ, համապատասխան դադարներ օգտագործել, ինչը կկենտրոնացնի լսարանի ուշադրությունը:

 

Նշենք, որ սեմինար-քննարկումն ուղեկցվեց հետաքրքրաշարժ խաղերով, ինչպես նաև հարցուպատասխանով:

 

Անգին Խաչատրյան

Այլ նորություններ
ԵՊՀ ՈՒԳԸ-Ն ԱՐՏԱԿԱՐԳ ԴՐՈՒԹՅԱՆ ՊԱՅՄԱՆՆԵՐՈՒՄ ՇԱՐՈՒՆԱԿՈՒՄ Է ԻՐ ԱՇԽԱՏԱՆՔՆԵՐԸ
Աշխարհում նոր տիպի կորոնավիրուսի տարածման և ՀՀ կառավարության կողմից արտակարգ դրություն հայտարարելու մասին որոշում կայացնելու առաջին իսկ օրերից ԵՊՀ ՈՒԳԸ-ն շարունակում է իրականացնել իր աշխատանքները: Մեզ հետ զրույցում ՈՒԳԸ նախագահ Մերի Փանոսյանը պատմել է, թե ինչ մեթոդներ և միջոցներ են կիրառել՝ այս ընթացքում արդյունավետ միջոցառումներ կազմակերպելու համար:
ՔԻՄԻԱՅԻ ՖԱԿՈՒԼՏԵՏԻ ՈՒՍԱՆՈՂՆԵՐԸ ՍԵՓԱԿԱՆ ՄԻՋՈՑՆԵՐՈՎ ՊԱՏՐԱՍՏԵԼ ԵՆ ԱԽՏԱՀԱՆՈՂ ՄԻՋՈՑՆԵՐ ԵՎ ԲԱԺԱՆԵԼ ՇՈՒԿԱՅԻ ԱՇԽԱՏԱԿԻՑՆԵՐԻՆ
ԵՊՀ քիմիայի ֆակուլտետի ուսանողները, իրենց նախաձեռնությամբ և ֆակուլտետի մասնագետների աջակցությամբ, ստեղծել են ախտահանիչներ և իրականացրել ակցիա՝ դրանք անվճար բաժանելով շուկայի աշխատակիցներին: