18.05.2022 | 
Կրթություն, Գիտություն
ՀԱՅ-ԱՎՍՏՐԻԱԿԱՆ ՀԱՄԱՏԵՂ ՆԱԽԱԳԾԻ ՇՐՋԱՆԱԿՈՒՄ ԱՆՑԿԱՑՎԵՑ ՍԵՄԻՆԱՐ-ՔՆՆԱՐԿՈՒՄ
ՀԱՅ-ԱՎՍՏՐԻԱԿԱՆ ՀԱՄԱՏԵՂ ՆԱԽԱԳԾԻ ՇՐՋԱՆԱԿՈՒՄ ԱՆՑԿԱՑՎԵՑ ՍԵՄԻՆԱՐ-ՔՆՆԱՐԿՈՒՄ
«Հայաստանում կլիմայի փոփոխության պայմաններում գենետիկական կենսահսկողության կարողությունների հզորացումը» թեմայով սեմինարի նպատակն էր ամրապնդել համագործակցությունը շահագրգիռ կողմերի միջև և ապահովել բարձրագույն կրթության մասնագետների, հետազոտողների, բնապահպանների և առհասարակ այն մասնագետների ներգրավվածությունը, որոնք պարբերաբար ուսումնասիրում են կլիմայի փոփոխության մարտահրավերները և կենսաանվտանգությունը:

ԵՊՀ գիտական խորհրդի նիստերի դահլիճում կազմակերպված հանդիպմանը ներկա էին ԵՊՀ գիտական հարցերի գծով պրոռեկտոր Ռ. Բարխուդարյանը, ՀՀ և Ավստրիայի կրթական հաստատությունների ներկայացուցիչներ:

 

 

«APPEAR» բարձրագույն կրթության և հետազոտությունների զարգացման ավստրիական գործընկերության հայ-ավստրիական համատեղ նախագծի շրջանակում կազմակերպված հանդիպման ընթացքում ԵՊՀ կենդանաբանության ամբիոնի վարիչ Մարինե Առաքելյանը ներկայացրեց «Կլիմայի փոփոխության պայմաններում Հայաստանում գենետիկական մեթոդների ներդրումը և հզորացումը կենսաանվտանգության խնդիրների լուծման համար» թեման:

 

«Մեր թիմն այցելել է Ավստրիայի համալսարաններ, իսկ այժմ Ավստրիայի երեք համալսարանի ներկայացուցիչներն են ԵՊՀ-ում: Հայ-ավստրիական ֆոնդի միջոցով նպատակ ունենք կրթության որակն աշխատաշուկային էլ ավելի համապատասխան դարձնելու: Կան լավ մասնագետներ, որոնք աշխատում էին առանձին, իսկ այժմ ստեղծել ենք մի հարթակ և փորձում ենք միասին լուծել խնդիրները»,- նշեց Մ. Առաքելյանը:

 

 

Ծրագիրը ներառում էր ԵՊՀ-ում մագիստրոսական դասընթացների թարմացում, ասպիրանտական կրթաթոշակ, ամառային դպրոց, դասավանդման և հետազոտական ռեսուրսների կարողությունների ավելացում:

 

Պրոֆեսոր Պամելա Բուրգերը նշեց, որ համագործակցության հիմնական նպատակը կրթական ծրագրի և Հայաստանում առկա գիտահետազոտական պոտենցիալի զարգացումն է: «Ծրագիրը կտևի 4 տարի, այնուհետև եթե հաջողի, կշարունակվի ևս 3 տարի. Այսպիսով՝ ծրագրի հիմքում ընկած է երկարաժամկետ համագործակցություն»,- ասաց Պամելա Բուրգերը:

 

 

Վիեննայի հատուկ կանխարգելման և արևադարձային բժշկության ինստիտուտի՝ մոլեկուլային մակաբուծաբանության խմբի ղեկավար Յուլիա Վալոքնիկը մեզ հետ զրույցում ասաց, որ ակնկալում են հետաքրքրություն առաջացնել տարբեր կազմակերպությունների շրջանում և գտնել հետագա համագործակցողներին:

 

 

Նշենք, որ ծրագիրը կբարձրացնի մարդկային և ինստիտուցիոնալ կարողությունները՝ մեղմելու կլիմայի փոփոխության ազդեցությունը բնության և մարդու առողջության վրա: Այն նպատակ ունի ստեղծելու ազդանշանային համակարգ՝ վանելու մակաբույծների, վարակիչ պաթոգենների տարածումը: Ծրագրի շրջանակում անդրադարձ կլինի վայրի բնության պահպանման, գյուղատնտեսության, կենդանիների բարեկեցության և հանրային առողջության ընդհանուր թեմաներին:

Այլ նորություններ
ԿԱՆՈՆԱԿԱՐԳԵՐԻ ՀԱՍՏԱՏՈՒՄ ՈՒ ՆՈՐ ՈՐՈՇՈՒՄՆԵՐԻ ԸՆԴՈՒՆՈՒՄ․ ՏԵՂԻ ՈՒՆԵՑԱՎ ԱՅՍ ՈՒՍՏԱՐՎԱ ԳԽ ՎԵՐՋԻՆ ՆԻՍՏԸ
ԵՊՀ Պալեանների անվան դահլիճում այսօր տեղի ունեցավ գիտական խորհրդի նիստը՝ օրակարգային 7 և ընթացիկ հարցերով։ Նիստի ընթացքում հաստատվեցին ներկայացված նախագծերն ու հարցերը, ինչպես նաև հնչեցին ու քննարկվեցին նոր առաջարկներ։
«ԻՆՁ ՀԱՄԱՐ ԿԱՐԵՎՈՐ ԵՆ ՀԱՄԱԼՍԱՐԱՆՈՒՄ ՍՏԱՑԱԾ ԿՐԹՈՒԹՅՈՒՆՆ ՈՒ ՁԵՌՔ ԲԵՐԱԾ ՄՆԱՅՈՒՆ ԱՐԺԵՔՆԵՐԸ»․ ԵՊՀ ՇՐՋԱՆԱՎԱՐՏ ԷԼԻՆԵ ՊՈՂՈՍՅԱՆ
ԵՊՀ ժուռնալիստիկայի ֆակուլտետի շրջանավարտ, հանրային կապերի մասնագետ և նկարչուհի Էլինե Պողոսյանի հետ զրուցել ենք համալսարանի ընձեռած հնարավորությունների, մասնագիտությունների ընտրության, ապագայի պլանների և այլ թեմաների շուրջ: