01.12.2016 | 
Հասարակություն
ԻՆՉՊԵ՞Ս ՀԱՍՆԵԼ ՀԱՋՈՂՈՒԹՅԱՆ
ԻՆՉՊԵ՞Ս ՀԱՍՆԵԼ ՀԱՋՈՂՈՒԹՅԱՆ
Նոյեմբերի 30-ին ԵՊՀ Ե. Չարենցի անվան դահլիճում տեղի ունեցավ «Զարթուցիչ ինտենսիվ» խորագրով սեմինար-դասընթաց:

Միջոցառումը նախաձեռնել էր ԵՊՀ շրջանավարտների և կարիերայի կենտրոնը «Առաքելյան ընդ փարթներս քոնսալթինգ» ընկերության հետ համագործակցության շրջանակում: Բանախոսը սեմինարավար, «Զարթուցիչ» նախաձեռնության հեղինակ Գրիգոր Առաքելյանն էր:

 

Սեմինար-դասընթացին մասնակցում էին ոչ միայն ԵՊՀ, այլև տարբեր բուհերի ուսանողներ: Մասնակիցներին ողջունեց ԵՊՀ շրջանավարտների և կարիերայի կենտրոնի փոխտնօրեն Կարինե Նազարյանը: Վերջինս կարևորեց այս ձևաչափով անցկացվող միջոցառումների դերն ու նշանակությունը, որը, ըստ նրա, հարյուրավոր երիտասարդների հնարավորություն է տալիս աշխատանքի ընդունվելուց առաջ կամ ընթացքում հստակ պատկերացում կազմելու այս կամ այն խնդրի, հաճախ հանդիպող խոչընդոտների մասին:

 

Ընդհանուր առմամբ՝ Գրիգոր Առաքելյանի դասախոսությունը թրեյնինգ էր կյանքի համար և կյանքի մասին: Նա բազմաթիվ օրինակներով սեմինար-դասընթացի մասնակիցներին ներկայացրեց, թե որոնք են հաջողության հասնելու առաջնային կանոնները, դրանց հասնելու գրավականները և այլն: Մինչ այդ ամենին անդրադառնալը նա նախ վերլուծեց ենթագիտակցություն ասվածը, որը, նրա կարծիքով, կարող է լինել առաջնային խնդիրներից մեկը հաջողության հասնելու կամ չհասնելու հարցում:

 

Պարոն Առաքելյանը չորս կարևոր գործոն է առաջադրում իրական հաջողությունը պայմանավորելու հարցում: Դրանք են առողջությունը, անձնական կյանքը, բիզնեսն ու ընկերները: Բանախոսը կարծում է, որ սրանցից որևէ մեկի բացակայության դեպքում անհնար կլինի մտածել լիարժեք հաջողության ձգտելու համար. «Ինձ շատ են հարցնում՝ հնարավո՞ր է կարճ ժամանակում մեծ հաջողության հասնել: Թվում է՝ անհնար է, բայց ես այդ կարծիքին չեմ, որովհետև կա իրականություն, իսկ այն փաստում է, որ ցանկության և հնարավորությունների դեպքում ամեն բան հնարավոր է»:

 

Հայտնի «Զարթուցիչ» նախաձեռնության հեղինակը մասնակիցներին ներկայացրեց մեկ տասնյակի հասնող հարցեր, որոնք մշտապես տանջում են աշխատանք փնտրողներին, բիզնես ստեղծողներին և այլն: Օրինակ՝ ինչպե՞ս է անհաջողությունը հետևում մյուս անհաջողությանը, ի՞նչ ասել է «բախտը բերեց», ո՞ր քայլերն են ունենում հետևանք, որո՞նք են անիմաստ քայլեր և այլն: Բանախոսը վերլուծեց այս և մի շարք այլ հարցեր, խոսեց դրանց հիմնականում բացասական կողմերի, ինչպես նաև բխող հետևանքների մասին:

 

Վերջում Գրիգոր Առաքելյանը պատասխանեց ներկաների հարցերին, ծավալվեց նաև քննարկում:

Այլ նորություններ
ՀԱՄԱԼՍԱՐԱՆԱԿԱՆՆԵՐԸ ՆԵՐԿԱ ԳՏՆՎԵՑԻՆ ԹԱԹՈՒԼ ԿՐՊԵՅԱՆԻ ՏՈՒՆ-ԹԱՆԳԱՐԱՆԻ ԲԱՑՄԱՆԸ
Հունիսի 17-ին Արագածոտնի մարզի Թաթուլ գյուղում տեղի ունեցավ Հայաստանի Ազգային հերոս, ԵՊՀ զոհված ուսանող-ազատամարտիկ Թաթուլ Կրպեյանի տուն-թանգարանի բացման արարողությունը:
ՌՈՒՍԱԳԵՏՆԵՐԸ ՆՇՈՒՄ ԵՆ ԻՐԵՆՑ ՏՈՆԸ
Այսօր ԵՊՀ Ե. Չարենցի անվան դահլիճում տեղի ունեցավ Ռուսագետների հայկական ասոցիացիայի հոբելյանական նիստը՝ նվիրված կառույցի հիմնադրման 25-ամյակին: