14.06.2017 | 
Կրթություն
ՀԱՅԱԶԳԻ ՊՐՈՖԵՍՈՐԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
ՀԱՅԱԶԳԻ ՊՐՈՖԵՍՈՐԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
Հունիսի 12-13-ը ԵՊՀ մաթեմատիկայի և մեխանիկայի ֆակուլտետում դասախոսություններով հանդես եկավ ԱՄՆ-ի Ռոչեստերի համալսարանի պրոֆեսոր Սևակ Մկրտչյանը:

Երկու մասից բաղկացած «Պատահական մատրիցների տեսության ներածությունը» թեմայով դասախոսությունների ընթացքում պրոֆեսոր Մկրտչյանը ներկայացրեց պատահական մատրիցների կապը մաթեմատիկայի տարբեր ճյուղերի հետ, հայտնի ու արժեքավոր արդյունքներ, որոնք ստացվել են այդ բնագավառում հայտնի գիտնականների և իր կողմից:

 

«Պատահական մատրիցների տեսությունը հավանականությունների տեսության ժամանակակից և արագ զարգացող ճյուղերից մեկն է, կիրառություններ ունի վիճակագրության մեջ, ֆիզիկայում և մաթեմատիկայի այլ բնագավառներում»,- իր խոսքում փաստեց Սևակ Մկրտչյանը: 

Պրոֆեսորն առաջին անգամ էր ԵՊՀ-ում և մեզ հետ զրույցում փաստեց, որ տպավորված է ուսանողների ակտիվությամբ. «Այս այցը գուցե լավ առիթ լինի հետագա համագործակցությունների և նմանօրինակ սեմինարների, դասախոսությունների կազմակերպման համար»:

 

Ինչպես ներկայացրեց հայազգի պրոֆեսորը, իր այցը հայրենիք եղել է բավականին հագեցած: Նա զեկուցումով հանդես է եկել Հայկական մաթեմատիկական միության տարեկան գիտաժողովում, ապա սեմինարներ անցկացրել նույն միության նիստի ընթացքում, ինչպես նաև ՀՀ ԳԱԱ մաթեմատիկայի ինստիտուտում և ԵՊՀ մաթեմատիկայի և մեխանիկայի ֆակուլտետում:

 

Տեղեկացնենք, որ Սևակ Մկրտչյանը սովորել է Արտաշես Շահինյանի անվան ֆիզիկամաթեմատիկական հատուկ դպրոցում, որի ընթացքում մասնակցել է  մաթեմատիկայի միջազգային օլիմպիադայի և արժանացել մեկ արծաթե և երկու բրոնզե մեդալների, այնուհետև կրթությունը շարունակել է ԱՄՆ-ի Կալիֆոռնիայի համալսարանում (Բերկլի): Այժմ ԱՄՆ-ի Ռոչեստերի համալսարանի պրոֆեսոր է:

 

Այլ նորություններ
ԹՈՒՐՔ ՊԱՏՄԱԲԱՆ ԹԱՆԵՐ ԱՔՉԱՄ. «ԹՈՒՐՔԻԱՅՈՒՄ ԺԽՏՈՂԱԿԱՆՈՒԹՅԱՆ ՔԱՂԱՔԱԿԱՆՈՒԹՅՈՒՆԸ ՊԵՏՈՒԹՅԱՆ ԿՈՂՄԻՑ Է ՍՆՈՒՑՎՈՒՄ»
Այսօր Մայր բուհի գիտխորհրդի նիստերի դահլիճում ԱՄՆ Մասաչուսեթսի Քլարք համալսարանի պրոֆեսոր, թուրք հայտնի պատմաբան Թաներ Աքչամը հանդիպեց ԵՊՀ թյուրքագիտության ամբիոնի ուսանողների և դասախոսների հետ: Նշենք, որ հանդիպումը կազմակերպվել էր ԵՊՀ արևելագիտության ֆակուլտետի նախաձեռնությամբ:
ՉԻՆԱՐԵՆ ՍՈՎՈՐՈՂ ԵՊՀ ՈՒՍԱՆՈՂՆԵՐԸ  ՍՏԱՑԱՆ ԱՎԱՐՏԱԿԱՆ ՎԿԱՅԱԿԱՆՆԵՐ
Այսօր ԵՊՀ-ի միջազգային հարաբերությունների ֆակուլտետի չինարենի և չինական մշակույթի կենտրոնում տեղի ունեցավ չինարեն սովորող ուսանողների ավարտական վկայականների հանձնման արարողությունը: