22.04.2020 | 
Ուսանողական
ՔԻՄԻԱՅԻ ՖԱԿՈՒԼՏԵՏԻ ՈՒՍԱՆՈՂՆԵՐԸ ՍԵՓԱԿԱՆ ՄԻՋՈՑՆԵՐՈՎ ՊԱՏՐԱՍՏԵԼ ԵՆ ԱԽՏԱՀԱՆՈՂ ՄԻՋՈՑՆԵՐ ԵՎ ԲԱԺԱՆԵԼ ՇՈՒԿԱՅԻ ԱՇԽԱՏԱԿԻՑՆԵՐԻՆ
ՔԻՄԻԱՅԻ ՖԱԿՈՒԼՏԵՏԻ ՈՒՍԱՆՈՂՆԵՐԸ ՍԵՓԱԿԱՆ ՄԻՋՈՑՆԵՐՈՎ ՊԱՏՐԱՍՏԵԼ ԵՆ ԱԽՏԱՀԱՆՈՂ ՄԻՋՈՑՆԵՐ ԵՎ ԲԱԺԱՆԵԼ ՇՈՒԿԱՅԻ ԱՇԽԱՏԱԿԻՑՆԵՐԻՆ
ԵՊՀ քիմիայի ֆակուլտետի ուսանողները, իրենց նախաձեռնությամբ և ֆակուլտետի մասնագետների աջակցությամբ, ստեղծել են ախտահանիչներ և իրականացրել ակցիա՝ դրանք անվճար բաժանելով շուկայի աշխատակիցներին:

Քիմիայի ֆակուլտետի ուսանողներն ախտահանիչների ստեղծման և ակցիայի նախապատրաստական աշխատանքները սկսել են իրականացնել դեռևս մարտին, երբ Հայաստանում գրանցվել են կորոնավիրուսի հաստատման առաջին դեպքերը:

 

Մեզ հետ զրույցում ֆակուլտետի ուսանող Վլադիմիր Վարդապետյանն ասաց, որ իրենց ստեղծած նյութը պատրաստված է սպիրտային հիմքի վրա. «Այն փափկեցնում է մաշկը և ախտահանում»:

 

Նոր ախտահանիչներն անվճար բաժանելու ակցիան իրականացրել են ֆակուլտետի երկու ուսանող՝ Վլադիմիր Վարդապետյանը և Մարիամ Միքայելյանը՝ իրենց խոսքով, մարդկային կուտակումներ չառաջացնելու նկատառումով:

 

«Ակցիան անցկացրել ենք սննդի սպասարկման ոլորտում՝ որպես թիրախ ընտրելով շուկան, քանի որ այն այս ոլորտի ավելի դժվար վերահսկելի ճյուղերից մեկն է»,- մեզ հետ զրույցում պարզաբանեց Վլադիմիր Վարդապետյանը:

 

 

Քիմիայի ֆակուլտետի ուսանողները խորհուրդ են տալիս սննդի, թղթադրամների, մետաղադրամների հետ անմիջական շփում ունեցող վաճառողներին պարբերաբար ախտահանել ձեռքերը, իսկ գնորդներին` գնված միրգը և բանջարեղենը լվանալ տևական հոսող գոլ ջրով։

 

Ուսանողները նաև հորդորում են գնորդներին չօգտվել կասկածելի, չստուգված և անհայտ ծագման ախտահանող միջոցներից, որոնք ոչ միայն չեն կատարում իրենց գործառույթը, այլև կարող են հանգեցնել մաշկային խնդիրների, ալերգիայի, ընդհուպ՝ մաշկի մակերեսին ստեղծել բարենպաստ միջավայր բակտերիաների, միկրոբների և վիրուսների համար։

 

Բացի դրանից՝ նրանք կոչ են անում ախտահանող միջոցներ արտադրող կազմակերպություններին նախաձեռնել նմանօրինակ ակցիաներ և այս ժամանակահատվածում լինել բնակչության կողքին. «Բոլորին ցանկանում ենք քաջառողջություն, հորդորում մնալ տանը և խուճապի չմատնվել»։

 

Ակցիան իրականացնող ուսանողները շնորհակալություն են հայտնում ֆակուլտետի դասախոսական անձնակազմին, հատկապես Անօրգանական և անալիտիկ քիմիայի ամբիոնի վարիչ, դոցենտ Արմեն Մարտիրյանին՝ աջակցության և ուսանողներին օգնելու հարցում պատրաստակամության համար։

 

Քնար Միսակյան

Այլ նորություններ
ԵՊՀ ՈՒԳԸ-Ն ԱՐՏԱԿԱՐԳ ԴՐՈՒԹՅԱՆ ՊԱՅՄԱՆՆԵՐՈՒՄ ՇԱՐՈՒՆԱԿՈՒՄ Է ԻՐ ԱՇԽԱՏԱՆՔՆԵՐԸ
Աշխարհում նոր տիպի կորոնավիրուսի տարածման և ՀՀ կառավարության կողմից արտակարգ դրություն հայտարարելու մասին որոշում կայացնելու առաջին իսկ օրերից ԵՊՀ ՈՒԳԸ-ն շարունակում է իրականացնել իր աշխատանքները: Մեզ հետ զրույցում ՈՒԳԸ նախագահ Մերի Փանոսյանը պատմել է, թե ինչ մեթոդներ և միջոցներ են կիրառել՝ այս ընթացքում արդյունավետ միջոցառումներ կազմակերպելու համար:
«ԵՍ ԿԱՐԾՈՒՄ ԵՄ՝ ԹԵ՛ ԲՈՒՀԸ, ԹԵ՛ ԼԻԱԶՈՐ ՄԱՐՄԻՆԸ ՀԵՏԵՎՈՂԱԿԱՆ ԿԼԻՆԵՆ ՎԱՐՉԱՊԵՏԻ ՀԱՅՏԱՐԱՐՈՒԹՅԱՆԸ, ԵՎ ՈՉ ՄԻ ՈՒՍԱՆՈՂ ՈՒՍՄԱՆ ՎԱՐՁԸ ՉՎՃԱՐԵԼՈՒ ՊԱՏՃԱՌՈՎ ՀԱՄԱԼՍԱՐԱՆԻՑ ՉԻ ՀԵՌԱՑՎԻ». ԴԱՎԻԹ ԱՓՈՅԱՆ
Արտակարգ դրության պայմաններում ԵՊՀ ՈԻԽ աշխատանքների իրականացման, ուսանողության շրջանում մտահոգիչ հարցերի և դրանց լուծման տարբերակների մասին զրուցել ենք ՈԻԽ նախագահ Դավիթ Ափոյանի հետ: