15.03.2019 | 
Կրթություն
ԵՊՀ ՈՒՍԱՆՈՂՆԵՐԸ ՄԱՍՆԱԿՑԵԼ ԵՆ ՍԵՄԻՆԱՐԻ ԵՎ ԾԱՆՈԹԱՑԵԼ ՀԱՍԱՐԱԿԱԿԱՆ ԳՈՐԾՉԻՆ ԱՆՀՐԱԺԵՇՏ ՀՄՏՈՒԹՅՈՒՆՆԵՐԻՆ
ԵՊՀ ՈՒՍԱՆՈՂՆԵՐԸ ՄԱՍՆԱԿՑԵԼ ԵՆ ՍԵՄԻՆԱՐԻ ԵՎ ԾԱՆՈԹԱՑԵԼ ՀԱՍԱՐԱԿԱԿԱՆ ԳՈՐԾՉԻՆ ԱՆՀՐԱԺԵՇՏ ՀՄՏՈՒԹՅՈՒՆՆԵՐԻՆ
ԵՊՀ իրավագիտության ֆակուլտետի ուսանողուհիներ Վիկտորյա Հակոբջանյանը և Տաթև Մարտիրոսյանը փետրվարի 15-18-ը մասնակցել են Կիևում տեղի ունեցած «Ես հասարակական գործիչ եմ» խորագրով սեմինարին:

Ամենամյա սեմինարին մասնակցում են Հայաստանի և Ուկրաինայի հասարակական կազմակերպությունների ներկայացուցիչները և բուհերում ակտիվ գործունեություն ծավալող ուսանողները՝ քննարկելու երկու երկրների քաղաքացիական հասարակության խնդիրները և քաղաքական իրադրությունները:

 

Սեմինարն իրականացվում է Ուկրաինայում Արևելյան գործընկերության ներկայացուցիչ «Կոնրադ Ադենաուեր» հիմնադրամի ծրագրերի շրջանակում:

 

Մեզ հետ զրույցում Իրավագիտության ֆակուլտետի ուսանողուհիները պատմեցին, որ սեմինարի առաջին օրը «Greencubator-Network» ՀԿ-ի համակարգող Ռոման Զինչենկոն հանդես է եկել դասախոսությամբ՝ մասնակիցներին ներկայացնելով սոցիալական փոփոխությունների ոլորտում հաղորդակցության տեսական ու գործնական կարևոր դրույթները:  

 

Սեմիանարի երկրորդը օրը մասնակիցներն այցելել են Ուկրաինայում հասարակական կազմակերպությունների կոալիցիա, որի ընթացքում ծանոթացել են 83 հասարակական կազմակերպությունների համագործակցության գաղտնիքին, որը նպատակաուղղված է սոցիալական բարեփոխումների հասնելու համար:

 

Այնուհետև սեմինարը շարունակվել է հայաստանյան մասնակիցների զեկուցմամբ, որի ընթացքում ներկայացվել են Հայաստանի ներքաղաքական վիճակը,  արտաքին հարաբերությունները, մեդիայի կարգավիճակը և հասարակական կազմակերպությունների գործունեությունը Հայաստանում:

 

 

Մեզ հետ զրույցում Վիկտորյա Հակոբջանյանը և Տաթև Մարտիրոսյանը փաստեցին, որ մեծ պատասխանատվությամբ են պատրաստվել զեկուցումներին. «Հայաստանի ներքաղաքական վիճակը և արտաքին հարաբերությունները ներկայացնելիս պետք էր այնպես անել, որ չգիտակցված կամ չմտածված խոսքով չվնասեինք երկրի հեղինակությանը: Մենք արել ենք ամեն ինչ՝ առավելագույնս օբյեկտիվ ներկայացնելու փաստերը՝ ելնելով նաև մեր մասնագիտությունից»:

 

Ուսանողուհիների հավաստմամբ, սեմինարը բավականին հետաքրքիր էր, քանի որ իրենք հասարակական կազմակերպությունների հետ աշխատելու փորձ ունեն. մագիստրատուրայի առաջին կուրսում սովորող Վիկտորյա Հակոբջանյանն աշխատում է հասարակական կազմակերպությունում, իսկ 4-րդ կուրսի ուսանողուհի Տաթև Մարտիրոսյանն ավելի քան 7 տարի է, ինչ կամավորական աշխատանքներ է իրականացնում այդ ոլորտում:

 

Բացի վերը նշված թեմաներից՝ Հայաստանի մասնակիցները ներկայացրել են նաև երկրի մշակույթը. «Քանի որ փետրվարի 16-ը համընկել էր Սուրբ Սարգսի տոնի հետ, մեր նոր ընկերներին ծանոթացրինք տոնի պատմությանն ու դրա խորհրդին»:

 

 

Սեմինարի երկրորդ օրն ամփոփվել է «Idea Office» կազմակերպության ներկայացուցիչ Մայքլ Յավորսկիի դասախոսությամբ, որը ներկայացրել է ամենից արդյունավետ եղանակները, թե ինչպես կարելի է որոշումն իրականացնելու հեռանկարներից մինչ դրա կատարելագործման ընթացքը համագործակցել ակտիվիստների և պետական մարմինների հետ:

 

Ծրագրի երրորդ օրը նախագծերի կառավարման փորձագետ Լյուդմիլա Սամչուկը մասնակիցներին ծանոթացրել է նախագծի պլանավորման և իրագործման արդյունավետ եղանակներին: Այնուհետև Ուկրաինայի Գերագույն ռադայի պատգամավոր Ելենա Սոտնիկը խոսել է խորհրդարաններում երիտասարդների ներկայության կարևորության մասին և պատմել իր փորձառության ու դժվարությունները հաղթահարելու ուղիների մասին:

 

Ուսանողուհիների հավաստմամբ, սեմինարը բավականին արդյունավետ և ուսուցողական է եղել:

 

Քնար Միսակյան

Այլ նորություններ
 «ՀԱՄԱԼՍԱՐԱՆՈՒՄ ԿԱԶՄԱԿԵՐՊՎՈՂ ՆՄԱՆԱԲՆՈՒՅԹ ՀԱՆԴԻՊՈՒՄՆԵՐԸ ՆՊԱՍՏՈՒՄ ԵՆ ԱՇԱԿԵՐՏՆԵՐԻ ՄՏԱԾԵԼԱԿԵՐՊԻ ԸՆԴԼԱՅՆՄԱՆԸ». ԵՊՀ ԴՈՑԵՆՏ
ԵՊՀ մաթեմատիկայի և մեխանիկայի ֆակուլտետի դասախոսական կազմն այսօր հյուրընկալել էր Երևանի թիվ 94, 170, 65, 195, 139, 182 ավագ դպրոցների աշակերտներին:
«ԱԿՏԻՎ ՈՒՍՈՒՑՈՒՄ» ՄԵԹՈԴԻ ՎԵՐԱԲԵՐՅԱԼ ՁԵՌՔ ԲԵՐՎԱԾ ԳԻՏԵԼԻՔՆԵՐԸ  ՓՈԽԱՆՑՎԵԼ ԵՆ ԿԵՆՍԱԲԱՆՈՒԹՅԱՆ ՖԱԿՈՒԼՏԵՏԻ ԴԱՍԱԽՈՍՆԵՐԻՆ
«Erasmus+ PRINTeL» ծրագրի շրջանակում ԵՊՀ կենսաբանության ֆակուլտետի դասախոս Կարեն Թռչունյանը տարբեր ֆակուլտետների դասախոսների հետ մասնակցել է Բելգիայի Լյուվենի կաթոլիկ համալսարանում անցկացված «Ակտիվ ուսուցում» կամ «Active Learning» խորագրով դասախոսների վերապատրաստման դասընթացին և ստացած գիտելիքները փոխանցել ֆակուլտետի իր գործընկերներին: