06.11.2018 | 
Կրթություն
ԳԵՐՄԱՆԻԱՅԻՑ ՀՐԱՎԻՐՎԱԾ ԴԱՍԱԽՈՍԸ ՆԵՐԿԱՅԱՑՐԵՑ ՄԱՆՐԷԱԲԱՆԱԿԱՆ ԿԵՆՍԱՏԵԽՆՈԼՈԳԻԱՅԻ ՈԼՈՐՏԻՆ ԱՌՆՉՎՈՂ ՎԵՐՋԻՆ ԶԱՐԳԱՑՈՒՄՆԵՐԸ
ԳԵՐՄԱՆԻԱՅԻՑ ՀՐԱՎԻՐՎԱԾ ԴԱՍԱԽՈՍԸ ՆԵՐԿԱՅԱՑՐԵՑ ՄԱՆՐԷԱԲԱՆԱԿԱՆ ԿԵՆՍԱՏԵԽՆՈԼՈԳԻԱՅԻ ՈԼՈՐՏԻՆ ԱՌՆՉՎՈՂ ՎԵՐՋԻՆ ԶԱՐԳԱՑՈՒՄՆԵՐԸ
ԵՊՀ կենսաբանության ֆակուլտետում այսօր մեկնարկեց «Մանրէաբանական կենսատեխնոլոգիայի միտումները» խորագրով դասախոսությունների շարքը, որը շարունակվելու է մինչև նոյեմբերի 8-ը:

Դասախոսների, երիտասարդ գիտնականների և ուսանողների համար դասախոսություններով հանդես եկավ հրավիրյալ դասախոս, Գերմանիայի Մարթին Լյութերի անվան Հալլե-Վիթենբերգի համալսարանի պրոֆեսոր Գարի Սովերսը:

Դասախոսությունների շարքը կազմակերպվել է Կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի, Մանրէաբանության կենսատեխնոլոգիայի և կենսավառելիքի նորարարական կենտրոնի և Գերմանիայի ակադեմիական փոխանակման ծառայության (DAAD) փոխհամագործակցության շրջանակում:

Կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի ասիստենտ, Կենսաբանության գիտահետազոտական ինստիտուտի գիտաշխատող, կենսաբ. գիտ. դոկտոր Կարեն Թռչունյանը մեզ հետ զրույցում նշեց, որ դասախոսությունների նպատակն է ուսանողներին և պրոֆեսորադասախոսական կազմի ներկայացուցիչներին ներկայացնել մանրէաբանական կենսատեխնոլոգիայի ոլորտին առնչվող վերջին զարգացումները և նորարարական մոտեցումները:

Կարեն Թռչունյանի խոսքով, նմանաբնույթ դասախոսությունները նպաստում են ուսանողների և դասախոսների փորձի փոխանակմանը, համագործակցության ընդլայնմանը, ինչպես նաև նոր գիտելիքների փոխանցմանը և ձեռքբերմանը:

Նա նաև հայտնեց, որ Գարի Սովերսը Կենսաբանության ֆակուլտետում արդեն երկու անգամ հանդես է եկել տարբեր դասախոսություններով և շատ տպավորված է հայ ուսանողների ընդունակություններով: «Համագործակցության արդյունքում ես և Գարի Սովերսը հրատարակել ենք համատեղ ակնարկային հոդվածներ, ինչպես նաև Կենսաքիմիայի, մանրէաբանության և կենսատեխնոլոգիայի ամբիոնի աշխատակիցները փոխանակման տարբեր ծրագրերով հնարավորություն են ունեցել այցելելու Գերմանիայի Մարթին Լյութերի անվան Հալլե-Վիթենբերգի համալսարան»,- հավելեց Կ. Թռչունյանը:

Մինչ դասախոսությունը սկսելը՝ պրոֆեսոր Գարի Սովերսը մասնակիցներին նախ ներկայացրեց Մարթին Լյութերի անվան Հալլե-Վիթենբերգի համալսարանի ֆակուլտետները, այնտեղ հետազոտական աշխատանքներ իրականացնելու հնարավորությունները և միջազգային համագործակցության ծրագրերը:

Գարի Սովերսը մեզ հետ զրույցում նշեց, որ ԵՊՀ-ի և Մարթին Լյութերի անվան Հալլե-Վիթենբերգի համալսարանի համագործակցությունը լինելու է շարունակական. «Ուսանողների և դասախոսների համար նման ձևաչափի դասախոսությունները շատ կարևոր են, քանի որ նրանք կենսաքիմիայի և կենսաէներգետիկայի վերաբերյալ ստանում են հիմնարար գիտելիքներ, ինչպես նաև դասախոսների պարտականություններից ամենակարևորն է ուսանողներին սովորեցնել մտածել և նոր մեթոդներ յուրացնելը»:

 

Նադեժդա Տեր-Աբրահամյան

Այլ նորություններ
ԵՊՀ ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏՈՒՄ ԲԱՐԲԱՌԱԳԻՏԱԿԱՆ ՈՒՍՈՒՄՆԱՍԻՐՈՒԹՅՈՒՆՆԵՐԸ ՇԱՐՈՒՆԱԿՎՈՒՄ ԵՆ
ԵՊՀ հայ բանասիրության ֆակուլտետի ՈՒԳԸ-ի բարբառագիտական խումբը նոյեմբերի 18-ին հերթական այցը կատարեց բարբառախոս կենտրոն:
«ԱՍՏՂԱԳԻՏՈՒԹՅԱՆ ԿԱՊՆ ԱՅԼ ԳԻՏՈՒԹՅՈՒՆՆԵՐԻ ՀԵՏ». ՊԱՐԶԱԲԱՆՈՒՄ Է ԲՅՈՒՐԱԿԱՆԻ ԱՍՏՂԱԴԻՏԱՐԱՆԻ ՏՆՕՐԵՆ ԱՐԵԳ ՄԻՔԱՅԵԼՅԱՆԸ
ԵՊՀ քիմիայի ֆակուլտետի ՈՒԳԸ-ն Ֆարմացիայի ինստիտուտի ՈՒԳԸ-ի հետ համատեղ կազմակերպել էր պլենար դասախոսություն, որը վարում էր ՀՀ ԳԱԱ Վ. Համբարձումյանի անվան Բյուրականի աստղադիտարանի տնօրեն Արեգ Միքայելյանը: