21.04.2017 | 
Կրթություն
«UNIVERSITY TOUR» ՆԱԽԱԳԻԾՆ ԱՆՑԿԱՑՎԵՑ ՆԱԵՎ ՄԱՅՐ ԲՈՒՀՈՒՄ
«UNIVERSITY TOUR» ՆԱԽԱԳԻԾՆ ԱՆՑԿԱՑՎԵՑ ՆԱԵՎ ՄԱՅՐ ԲՈՒՀՈՒՄ
Այսօր ԵՊՀ շրջանավարտների և կարիերայի կենտրոնի ու «Global Media Lab» կազմակերպության համագործակցության շրջանակում անցկացվեց կրթական ոչ ֆորմալ սեմինար:

«University Tour» նախագծի նպատակն է ուսանողական արդի հիմնախնդիրները լուծող պարբերական սեմինարի միջոցով ուսանողներին փոխանցել 2017 թվականի պահանջներին համապատասխան, անձնական և կարիերայի աճին նպաստող օգտակար ու անհրաժեշտ հմտություններ:

 

Սեմինարի սկզբում «Global Media Lab» կազմակերպության հիմնադիր տնօրեն Սեդա Վարդանյանը նշեց, որ Մայր բուհն այս նախագծի վերջին կանգառն է. «Մենք ընտրել ենք Հայաստանի 10 լավագույն բուհերը և շատ ուրախ ենք, որ այսօր վերջապես ԵՊՀ-ում ենք: Ես էլ ԵՊՀ շրջանավարտ եմ»:

 

Սեդա Վարդանյանն ասաց նաև, որ նախագծի եզակիությունն ապահովում է ոչ միայն դրա ինտերակտիվ ձևաչափը, այլև իր մեջ պարունակող խաղը, որը կառուցված է նոր ձեռքբերված գիտելիքների հիման վրա և կօգնի ավելի լավ ամրապնդել դրանք:

 

Մի քանի մասից կազմված սեմինարը, ըստ մասնագետների, օգնում է լուծել «Չկա աշխատանք առանց աշխատանքային փորձի և չկա աշխատանքային փորձ առանց աշխատանքի» պարադոքսը, կոտրել բոլոր դժվարությունները CV գրելիս, աշխատանք փնտրելիս և գործատուին ներկայանալիս, ինչպես նաև կերտել ճիշտ  գործնական իմիջ և իրականացնել անձի մարքեթինգ:

 

«Global Media Lab» ընկերության կոմունիկացիոն մենեջեր Թերեզա Գրիգորյանը, խոսելով աշխատանք գտնելու և գրագետ CV կազմելու մասին, ուսանողներին խորհուրդ տվեց նախևառաջ չհուսահատվել անհաջողություններից, հետևողական լինել և ինքնակատարելագործվել. «Աշխատանք գտնելու համար կենտրոնացե՛ք ընկերությունների վրա, ուսումնասիրե՛ք դրանց աշխատելաոճը, ռազմավարությունը և ձեր CV-ին էլ կազմե՛ք ըստ այդ ընկերությունների պահանջի»:

 

Թերեզա Գրիգորյանը ուսանողներին ներկայացրեց նաև արդյունավետ CV կազմելու մի քանի եղանակներ, այդ թվում՝ տեսահոլովակի, ինֆոգրաֆիկայի, անիմացիայի ձևով. «Ստեղծարար CV-ների ինքնատիպ օրինակ է նաև փաթեթավորումների վրա գրելը: Նման բազմաթիվ օրինակներ կան»:

 

Շուրջ 2 ժամ տևած սեմինարի ընթացքում բանախոսները ուսանողներին արդյունավետ հարցազրույց անցկացնելու, փորձաշրջան անցնելու ու պահանջված լինելու խորհուրդներ տվեցին:

 

Տեղեկացնենք, որ սեմինարի բոլոր մասնակիցները նախօրոք գրանցվել են «skill.am» կայքում և ձեռք բերել միջոցառման մասնակցության տոմսեր:

Այլ նորություններ
ԵՊՀ ԴԱՍԱԽՈՍՆԵՐԻ ՀԱՄԱՐ ԱՆՑԿԱՑՎԵՑ ՀԱՄԱԼՍԱՐԱՆԻ ՄԻՋԱԶԳԱՅՆԱՑՄԱՆ ՔԱՂԱՔԱԿԱՆՈՒԹՅԱՆԸ  ՆՊԱՍՏՈՂ ԴԱՍԸՆԹԱՑ
Այսօր ԵՊՀ միջազգային համագործակցության վարչությունը ԵՊՀ 2016-2020 թթ. զարգացման ռազմավարական ծրագրի շրջանակում դասախոսների համար կազմակերպել էր դասընթաց, որի նպատակն է նպաստել համալսարանի միջազգայնացման քաղաքականությանը: Նշենք, որ դասընթացների ավարտից հետո մասնակիցներին կտրվի մեկ կրեդիտ։
«ԶՈՀԻ ՀՈԳԵԲԱՆՈՒԹՅՈՒՆՆ ԻՆՁ ՀԱՄԱՐ ՉԷ». ՀԱՐՑԱԶՐՈՒՅՑ ՄԱԳԻՍՏՐԱՆՏ ՆԵԼԻ ԱԲՐԱՀԱՄՅԱՆԻ ՀԵՏ
Հայոց ցեղասպանության առջև օրեցօր ծառացող մարտահրավերներն առավել պահանջված են դարձնում հարցին տիրապետող, բանիմաց երիտասարդ մասնագետներին: