07.05.2009 | 
Ուսանողական, Գիտություն, Մշակույթ
ՇԵՔՍՊԻՐԸ ՀԱՄԱԼՍԱՐԱՆԱԿԱՆՆԵՐԻ ՄԵԿՆԱԲԱՆՄԱՄԲ
ՇԵՔՍՊԻՐԸ ՀԱՄԱԼՍԱՐԱՆԱԿԱՆՆԵՐԻ ՄԵԿՆԱԲԱՆՄԱՄԲ
Ապրիլի 23-ը Ուիլյամ Շեքսպիրի ծննդյան եւ մահվան օրն է:

Այս առիթով Ռոմանագերմանական բանասիրության ֆակուլտետում կազմակերպվել էր ցերեկույթ` «Շեքսպիրը հայ իրականության մեջ» խորագրով: Այս տարի լրանում է նրա 445-ամյակը: Ներկա էին ֆակուլտետի դասախոսներ, ուսանողներ, ինչպես նաեւ Շեքսպիրի արվեստի սիրահարներ: Միջոցառման ընթացքում ուսանողների կատարմամբ հնչեցին սոնետներ, որոնց մի մասը հենց իրենք էին անգլերենից հայերեն թարգմանել:

 

Մի քանի հոգի էլ զեկույցներ ներկայացրին Շեքսպիրի կյանքի, անցած ուղու եւ գրական գործունեության մասին: Մագիստրատուրայի 1-ին կուրսի ուսանողուհի Անի Կոջոյանը ներկաներին պատմում էր այն ամենի մասին, ինչ տեսել եւ զգացել էր գրողի ծննդավայրում` Ստրատֆորդում: 2008 թ-ին Անգլախոսների միության եւ Օքսֆորդի համալսարանի կողմից կազմակերպվել էր գիտաժողով, որին մասնակցելուց հետո Անին շահել էր կրթաթոշակ եւ հնարավորություն ստացել 15 օրով մեկնելու Անգլիա:

 

Ստրատֆորդում նրանց խմբին դիմավորել էին 16-րդ դարին բնորոշ հագուստներով մարդիկ, իսկ մեծ գրողի տուն- թանգարանի բակում նրանց սպասելիս են եղել շեքսպիրյան հերոսները: Նրանք նաեւ Օքսֆորդի թատրոնում դիտել են «Համլետ» ներկայացումը: Վերջում ներկաները դիտեցին «Համլետ» ֆիլմը` անգլերեն լեզվով: Շեքսպիրագիտությամբ Ռոմանագերմանական բանասիրության ֆակուլտետում զբաղվում են դեռեւս նախորդ դարի 60-ական թվականներից: Մինչեւ հիմա 10 գիտական ատենախոսություն է պաշտպանվել այդ թեմայով: Պարբերաբար անցկացվել են նաեւ միջազգային գիտաժողովներ:

 

Անցյալ դարի 70-ական թվականներին է ձեւավորվել Երեւանի պետական համալսարանի թարգմանչաց դպրոցը, երբ սկսվեց դասավանդվել թարգմանության տեսություն եւ պրակտիկա առարկան: Դրանից հետո ուսանողների մեջ մեծ հետաքրքրություն առաջացավ, սկսեցին օտարալեզու գրքեր թարգմանել, գիտական աշխատություններ գրել: «Աստղիկ» հանդեսի յուրաքանչյուր համարում հատուկ տեղ է հատկացվում Շեքսպիրի գործերի եւ թարգմանությունների ուսումնասիրությանը: «Հուսով ենք, որ մի օր համալսարանում էլ շեքսպիրագիտության կենտրոն կբացվի, եւ այսպիսի միջոցառումները պարբերական բնույթ կկրեն: Այս տարի Շեքսպիրի 445-ամյակն է, բայց այնքան էլ պատշաճ կերպով չի նշվում»,- ասում է ֆակուլտետի ՈՒԳԸ նախագահ Լենա Ղազարյանը:

Այլ նորություններ
ՈՒՍԱՆՈՂՆԵՐՆ ԻՐԵՆՑ ՈՒԺԵՐՆ ԵՆ ՉԱՓՈՒՄ ԲԱՆԱՎԵՃԻ ԱԿՈՒՄԲԱՅԻՆ ԱՌԱՋՆՈՒԹՅՈՒՆՈՒՄ. ԸՆԹԱՆՈՒՄ Է ԱՇՆԱՆԱՅԻՆ ՄՐՑԱՓՈՒԼԸ
ԵՊՀ ՈՒԽ բանավեճի ակումբը կազմակերպել է բանավեճի ակումբային առաջնություն, որի 1/8-րդ եզրափակչի շրջանակում այսօր մրցել են երկու թիմ՝ իրենց կողմ և դեմ դիրքորոշումները հայտնելով «Հայերը չպետք է անցկացնեն իրենց հանգիստը Թուրքիայում» թեմայի վերաբերյալ:
«ԻՐԱՎԱԿԱՆ ԻՐԱԶԵԿՈՒՄ ՄԱՐԶԵՐՈՒՄ». ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ ՄԱՐԶԵՐՈՒՄ ՍՈՎՈՐՈՂ ԱՇԱԿԵՐՏՆԵՐԻՆ ԾԱՆՈԹԱՑՆՈՒՄ ԵՆ ԻՐԵՆՑ ԻՐԱՎՈՒՆՔՆԵՐԻՆ
«Իրավական իրազեկում մարզերում» ծրագրի ընթացքում Իրավագիտության ֆակուլտետի ուսանողները հանդիպում են մարզերում սովորող աշակերտներին, նրանց ներկայացնում իրավական տարբեր թեմաներ՝ այդկերպ հաղորդակից դարձնելով իրավական մշակույթին ու բարձրացնելով իրավագիտակցության մակարդակը: