28.03.2013 | 
Հասարակություն
ԱՐԴԱՐԱԴԱՏՈՒԹՅԱՆ ՄԱՏՉԵԼԻՈՒԹՅՈՒՆԸ ԲՆԱՊԱՀՊԱՆՈՒԹՅԱՆ ՈԼՈՐՏՈՒՄ
ԱՐԴԱՐԱԴԱՏՈՒԹՅԱՆ ՄԱՏՉԵԼԻՈՒԹՅՈՒՆԸ ԲՆԱՊԱՀՊԱՆՈՒԹՅԱՆ ՈԼՈՐՏՈՒՄ
Քննարկվեցին արդարադատության մատչելիության վերաբերյալ հետազոտության արդյունքները:

Հանդիպումը կազմակերպվել էր մարտի 27-ին ԵՊՀ իրավագիտության ֆակուլտետի էկոլոգիական իրավունքի գիտաուսումնական կենտրոնի նախաձեռնությամբ: Մասնակցում էին ՀՀ Սահմանադրական դատարանի, Մարդու իրավունքների պաշտպանի գրասենյակի, Բնապահպանության և Արդարադատության նախարարությունների ներկայացուցիչներ:


ՄԱԿ-ի «Շրջակա միջավայրի հարցերի առնչությամբ տեղեկատվության մատչելիության, որոշումների ընդունման գործընթացում հասարակության մասնակցության և արդարադատության մատչելիության մասին» կոնվենցիայի 9-րդ հոդվածի իրացման վիճակի վերաբերյալ հետազոտության կատարումը Հայաստանում հանձնարարվել է Էկոլոգիական իրավունքի գիտաուսումնական կենտրոնի գիտաշխատող Գոռ Մովսիսյանին:


«Հետազոտության հիմքում ընկած են մի քանի առանցքներ, որոնք վերաբերում են վարչական, քաղաքացիական և քրեական դատավարության կարգով գործերի քննությանը: Ի տարբերություն եվրոպական երկրների՝ հետխորհրդային պետություններում ամեն ինչ տեղի է ունենում դատավարական օրենսդրության պահանջներին համապատասխան: Եվրոպայում իրավական ակտերում կարելի է գտնել ընթացակարգային նորմերի մի հսկայական զանգված, և սա առաջին խնդիրներից է»,- ասում է Գոռ Մովսիսյանը:


Վարչական և դատական պաշտպանության միջոցների միաժամանակյա կիրառման համատեքստում, ըստ զեկուցողի, պատկերը միանգամայն հակառակն է: Եվրոպայում մինչև խնդիրը վարչական կարգով չբողոքարկվի, դատարան դիմելու հնարավորություն չկա, իսկ Հայաստանում զուգահեռաբար կարելի է դիմել և´ վարչական, և´ դատական պաշտպանության: Մյուս խնդիրը, Գոռ Մովսիսյանի ներկայացմամբ, բավարար շահագրգռվածության չափանիշի որոշակիացումն է. «Այսինքն՝ պետք է հասկանանք, թե որ պահից սկսած է սուբյեկտի մոտ ձևավորվում շահ՝ այս կամ այն խնդրով դատարան դիմելու համար»:


Գոռ Մովսիսյանի խոսքերով` կան իրավիճակներ, երբ դատարանը հայցը մերժում է այն հիմնավորմամբ, որ տվյալ սուբյեկտը իրավունք չուներ բարձրաձայնված խնդրով դիմել դատարան: «Այսինքն` դատարան կարող են դիմել միայն այն անձինք, որոնց իրավունքները և շահերը խախտվել են: Հայաստանում ֆիզիկական անձանց կողմից դատարանում վարչական կարգով տեղեկատվություն ստանալու անհիմն վիճարկման խնդիր չկա, իսկ եթե խոսքը պետական կառավարման մարմինների վարչական ակտերի և վերահսկողական գործողությունների վիճարկման մասին է, այստեղ ունենում ենք խնդիր, որովհետև պետական կառավարման մարմինների վարչական ակտերը չեն վերաբերում իմ իրավունքին: Ես չեմ կարող դիմել դատարան, եթե նույնիսկ իմ շահերը դրանից տուժում են»,- մանրամասնում է հետազոտության հեղինակը:


Այս ամենի հետևանքը, Գոռ Մովսիսյանի գնահատմամբ, լինում է այն, որ եթե որևէ մեկը ստանում է շինությունների կառուցման, վերակառուցման կամ բնօգտագործման թույլտվություն կամ նույնիսկ թույլտվություն է ստանում թափոնների կառավարման ոլորտում, դատական իշխանությունը նրա նկատմամբ չի կարողանում հսկողություն իրականացնել: Արդյունքում` տնտեսության ամենաշահութաբեր ոլորտներից մեկը՝ բնօգտագործումը, մնում է վերահսկողությունից դուրս:

Այլ նորություններ
ԵՊՀ ՊԱՏՎԻՐԱԿՈՒԹՅՈՒՆՆ ԱՅՑԵԼԵՑ ԱՄԷ ԴԵՍՊԱՆՈՒԹՅՈՒՆ
ԵՊՀ զարգացման ու նորարությունների գծով պրոռեկտոր Միքայել Հովհաննիսյանը, արաբագիտության ամբիոնի վարիչ Հայկ Քոչարյանը, նույն ամբիոնի դասախոս Վահե Հակոբյանը պատվիրակվել էին Երևանում ԱՄԷ դեսպանություն` իրենց ցավակցությունը հայտնելու լուսահոգի շեյխ Խալիֆա իբն Զայեդ ալ-Նահյանի մահվան կապակցությամբ։
ԵՊՀ-ՈՒՄ ՆՇՎԵՑ ԲՈՒՀԻ ՀԻՄՆԱԴՐՄԱՆ 103-ԱՄՅԱԿԸ
Այսօր ԵՊՀ գիտական խորհրդի նիստերի դահլիճում տեղի ունեցավ միջոցառում՝ նվիրված Մայր բուհի հիմնադրման 103-ամյակին: Տոնի առթիվ դրամական պարգևներով և պատվոգրերով պարգևատրվեցին համալսարանի վարչական աշխատակիցներ, դասախոսներ, ուսանողներ, ինչպես նաև «ԵՊՀ օլիմպիադա-2022»-ի առաջին կարգի մրցանակակիրները: