20.07.2018 | 
Ուսանողական
«ԴՈՒՔ ԵՔ ԼԻՆԵԼՈՒ ԱՅՆ ՀՊԱՐՏ ՔԱՂԱՔԱՑԻՆԵՐԸ, ՈՎՔԵՐ ԱՊԱՀՈՎԵԼՈՒ ԵՆ ՄԵՐ ԵՐԿՐԻ ԱՌԱՋԸՆԹԱՑԸ ԵՎ ԱՆՎՏԱՆԳՈՒԹՅՈՒՆԸ». ԵՊՀ ՊՐՈՖԵՍՈՐ ՎԱՐԴԱՆ ԲՈՍՏԱՆՋՅԱՆ
«ԴՈՒՔ ԵՔ ԼԻՆԵԼՈՒ ԱՅՆ ՀՊԱՐՏ ՔԱՂԱՔԱՑԻՆԵՐԸ, ՈՎՔԵՐ ԱՊԱՀՈՎԵԼՈՒ ԵՆ ՄԵՐ ԵՐԿՐԻ ԱՌԱՋԸՆԹԱՑԸ ԵՎ ԱՆՎՏԱՆԳՈՒԹՅՈՒՆԸ». ԵՊՀ ՊՐՈՖԵՍՈՐ ՎԱՐԴԱՆ ԲՈՍՏԱՆՋՅԱՆ
Այսօր ԵՊՀ տնտեսագիտության և կառավարման ֆակուլտետի շրջանավարտները հանդիսավոր արարողակարգով ստացան իրենց ավարտական վկայականները:

Դիպլոմների հանձնման արարողությանը ներկա էին ԵՊՀ տնտեսագիտության և կառավարման ֆակուլտետի դեկան Հայկ Սարգսյանը, ԱԺ պատգամավոր, ԵՊՀ պրոֆեսոր Վարդան Բոստանջյանը, ֆակուլտետի ամբիոնների վարիչներ, պրոֆեսորադասախոսական կազմի ներկայացուցիչներ, շրջանավարտների ծնողներ, հարազատներ ու ընկերներ:

 

Միջոցառմանը ներկա էին նաև ԵՊՀ տնտեսագիտության և կառավարման ֆակուլտետի տարբեր մասնագիտացումների պետական քննական հանձնաժողովների նախագահներ՝ ՀՀ տնտեսական զարգացման և ներդրումների նախարար Արծվիկ Մինասյանը, ՀՀ կենտրոնական բանկի խորհրդի անդամ Արմենակ Դարբինյանը, «Օրենսդրության կարգավորման ազգային կենտրոն» հիմնադրամի տնօրեն Արմեն Եղիազարյանը:

ԵՊՀ տնտեսագիտության և կառավարման ֆակուլտետի դեկան Հայկ Սարգսյանը շնորհավորեց շրջանավարտներին` մաղթելով նրանց անձնական երջանկություն և մասնագիտական հաջողություններ:

 

Շնորհավորական խոսքով հանդես եկավ ՀՀ տնտեսական զարգացման և ներդրումների նախարար, ԵՊՀ շրջանավարտ Արծվիկ Մինասյանը:

 

«Այսօր իսկապես հիշարժան օր է շրջանավարտների համար, քանի որ նրանք ստանում են այն վկայականը, որը թույլ կտա նրանց հասարակությունում հադես գալու որպես տնտեսագետներ և իրենց տեղը գտնելու աշխատաշուկայում: Ես՝ որպես այս ֆակուլտետի շրջանավարտ, կարևորում եմ համալսարանում ստացած կրթությունը, քանի որ այն նախևառաջ միջավայրում ինտեգրվելու և սոցիալականացվելու հնարավորություն է տալիս: Գիտելիք դուք կարող եք ձեռք բերել նաև ձեր աշխատանքային գործունեության ընթացքում, բայց ինչպես պետք է գիտելիք ձեռք բերել, այդ արվեստը դուք սովորում եք համալսարանական կրթության ընթացքում: Ես շնորհակալություն եմ հայտնում ֆակուլտետի պրոֆեսորադասախոսական կազմին, քանի որ նրանց աշխատանքը չափազանց ծանր է, բայց նաև շատ պատվաբեր է: Անկախ նրանից՝դուք աշխատելու եք պետական համակարգում կամ մասնավոր հատվածում, կարևորն այն է, որ դուք ԵՊՀ-ում ձեռք բերած արժեքային համակարգը պահպանեք: Շնորհավորում եմ բոլոր շրջանավարտներին, նրանց մաղթում եմ կանաչ ճանապարհ: Մենք պատրաստ ենք համագործակցելու, և գուցե ձեզանից շատերն իրեՆց տեղը գտնեն հենց մեր նախարարությունում»,-ասաց Արծվիկ Մինասյանը:

 

ԱԺ պատգամավոր, ԵՊՀ պրոֆեսոր Վարդան Բոստանջյանը նույնպես շնորհավորեց և բարեմաղթանքներ հղեցին շրջանավարտներին: «Դուք պետք է հպարտ լինեք, քանի որ ավարտում եք Երևանի պետական համալսարանը: Դուք եք լինելու այն հպարտ քաղաքացիները, ովքեր ապահովելու են մեր երկրի առաջընթացը և անվտանգությունը»,- հավելեց  պրոֆեսորը:

 

ՀՀ կենտրոնական բանկի խորհրդի անդամ Արմենակ Դարբինյանն իր շնորհավորական խոսքում նշեց, որ տարիներ հետո շրջանավարտներն ավելի շատ են արժևորելու իրենց ուսանողական տարիները և հավելեց. «Երբեք չբավարարվեք գիտելիքներ կուտակելով, անընդհատ ինքնակրթվեք, սովորեք նոր հմտություններ, զարգացրեք ձեր կարողություններն ու կյանքում անպայման կհասնեք ձեր նպատակներին»: 

 

«Օրենսդրության կարգավորման ազգային կենտրոն» հիմնադրամի տնօրեն Արմեն Եղիազարյանն իր խոսքում նշեց, որ այս օրը շրջանավարտների կյանքում կարևոր իրադարձություն է: «Ձեր ստացած գիտելիքները ձեզ օգնելու են կյանքում կայանալու որպես մասնագետ: Ես ցանկանում եմ, որ դուք գտնեք ձեր արժանի տեղը՝ ծառայելով ձեզ և ձեր երկրին: ԵՊՀ տնտեսագիտության և կառավարման ֆակուլտետը շատ կարևոր դեր է ունեցել մեր երկրի կառավարման գործում, իսկ այս ֆակուլտետի շրջանավարտ լինելը մեծ պատիվ է»,- ասաց Արմեն Եղիազարյանը:        

 

Շրջանավարտներին իրենց բարեմաղթանքները հղեցին նաև ֆակուլտետի պրոֆեսորադասախոսական կազմի ներկայացուցիչները:

 

Նադեժդա Տեր-Աբրահամյան

 

Այլ նորություններ
ԵՊՀ ՈՒԽ-Ն ՈՒՍԱՆՈՂՆԵՐԻՆ ԾԱՆՈԹԱՑՆՈՒՄ Է ԻՐԵՆՑ ԻՐԱՎՈՒՆՔՆԵՐԻՆ ԵՎ ՊԱՐՏԱԿԱՆՈՒԹՅՈՒՆՆԵՐԻՆ
Այսօր մեկնարկեց ԵՊՀ ՈԻԽ-ի իրավական հանձնաժողովի կողմից կազմակերպված «Իրազեկում. բողոքարկում և լուծարքներ» ծրագիրը:
ՄԵԿՆԱՐԿԵՑ ՄԻՋՖԱԿՈՒԼՏԵՏԱՅԻՆ ՖՈՒՏԲՈԼԻ ԱՌԱՋՆՈՒԹՅԱՆ «PLAY-OFF» ՓՈՒԼԸ
ԵՊՀ ֆիզիկական դաստիարակության և սպորտի ամբիոնում այսօր տեղի ունեցավ ֆուտբոլի միջֆակուլտետային առաջնության «Play-off» փուլը: