06.03.2018 | 
Հասարակություն
ԱՊԱԳԱ ԱՐԱԲԱԳԵՏՆԵՐՆ ԱՄԷ-ՈՒՄ ԵՆ. ՀԱՄԱԳՈՐԾԱԿՑՈՒԹՅԱՆ ՆՈՐ ՄԱԿԱՐԴԱԿ Է ՍՏԵՂԾՎՈՒՄ ԵՊՀ-Ի ԵՎ ԴՈՒԲԱՅԻ ՀԱՄԱԼՍԱՐԱՆԻ ՄԻՋԵՎ
ԱՊԱԳԱ ԱՐԱԲԱԳԵՏՆԵՐՆ ԱՄԷ-ՈՒՄ ԵՆ. ՀԱՄԱԳՈՐԾԱԿՑՈՒԹՅԱՆ ՆՈՐ ՄԱԿԱՐԴԱԿ Է ՍՏԵՂԾՎՈՒՄ ԵՊՀ-Ի ԵՎ ԴՈՒԲԱՅԻ ՀԱՄԱԼՍԱՐԱՆԻ ՄԻՋԵՎ
Մարտի 2-9-ը ԵՊՀ արաբագիտության ամբիոնի ներկայացուցիչներն Արաբական Միացյալ Էմիրություններում մասնակցում են դասախոսությունների, սեմինարների ու ծանոթանում արաբական մշակույթին:

2017 թ.-ի դեկտեմբերի 18-ին ԵՊՀ արևելագիտության ֆակուլտետի արաբագիտության ամբիոնը «Արաբերենի միջազգային օրվա» կապակցությամբ  կազմակերպել էր արաբերենին նվիրված էսսեների մրցույթ, որին մասնակից 11 ուսանող ՀՀ-ում ԱՄԷ-ի դեսպանատան կողմից արժանացել են հատուկ մրցանակի՝ ճանաչողական այցելություն ԱՄԷ:

 

Ապագա արաբագետներին ուղեկցում է Արաբագիտության ամբիոնի վարիչ, դոցենտ Հայկ Քոչարյանը, ամբիոնի հրավիրյալ դասախոս, դոկտոր Մուհամմադ Հաֆեզ ալ-Ջունդին, իսկ համալսարանականների ուղևորությունը հագեցած, հետաքրքիր և բովանդակալից է դարձրել դեսպանատան աշխատակից Աստղիկ Բաղդասարյանը։

 

ԵՊՀ-ն ներկայացնող արաբագետներն այցելել են Դուբայի համալսարան, որտեղ ակտիվ մասնակցել են մի շարք դասախոսությունների: Դուբայի համալսարանի նախագահ Իսա Մուհամմադ ալ-Բասթաքիի հետ հանդիպման ընթացքում ապագա արաբագետները փայլել են իրենց լեզվական հմտություններով։

 

 

Ամբիոնի վարիչ Հայկ Քոչարյանն էլ ներկայացրել է Մայր բուհի ուսումնական մի շարք ծրագրեր և ընդգծել, որ ակնկալում են կայուն ու արդյունավետ համագործակցություն ԵՊՀ-ի և Դուբայի համալսարանի միջև: Ուսանողները հանդիպել են նաև Դուբայի համալսարանի ուսանողական խորհրդի և ԱՄԷ ուսանողական ակումբի նախագահի ու անդամների հետ։

 

Այցի մշակութային ծրագրերի շրջանակում համալսարանականներն այցելել են նաև Դուբայի Իթթիհադ թանգարան, բարձրացել աշխարհի ամենաբարձր երկնաքերը՝ Բուրջ Խալիֆան:

 

 

Ճանաչողական այցը կտևի մինչև մարտի 9-ը, որի ընթացքում համալսարանականներն այցելություններ կկատարեն ոչ միայն Դուբայի, այլև Շարժայի համալսարաններ, կմասնակցեն տարաբնույթ սեմինարների ու արաբերենի դասընթացների:

 

Նախատեսված են նաև մի շարք հանդիպումներ ԱՄԷ-ի կրթության և մշակույթի ոլորտի տարբեր պաշտոնյաների հետ: 

Այլ նորություններ
«ՀԱՅՈՑ ՑԵՂԱՍՊԱՆՈՒԹՅԱՆ ԱՆԴՐԱԴԱՐՁՆ ԱՄԵՐԻԿՅԱՆ ՄԱՄՈՒԼՈՒՄ»․ ԴԱՍԱԽՈՍՈՒԹՅՈՒՆ ԵՊՀ-ՈՒՄ
ԵՊՀ-ն այսօր հյուրընկալել էր «The Armenian Genocide: Prelude and Aftermath. As reported in the U.S. Press - The New York Times» գրքի հեղինակներին՝ Վենետիկի Մխիթարյան միաբանության միաբան, գերաշնորհ հայր Վահան ծայրագույն վարդապետ Օհանյանին և ավստրալահայ գործիչ Արա Քաթիբյանին, որոնք նախ հանդիպեցին ԵՊՀ ռեկտոր Արամ Սիմոնյանի հետ, այնուհետև Պալեանների անվան դահլիճում հանդես եկան գրքի կազմման և հրատարակման մասին ելույթով։
ՏՆՏԵՍԱՊԵՍ ԶԱՐԳԱՆԱԼՈՒ ՀԱՄԱՐ ՀԱՄԱՐՁԱԿՈՒԹՅՈՒՆ Է ՊԵՏՔ. ԱՀ ՆԱԽԿԻՆ ՎԱՐՉԱՊԵՏԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
ԵՊՀ տնտեսագիտության և կառավարման ֆակուլտետում այսօր տեղի ունեցավ «Հայաստանի տնտեսական զարգացման հեռանկարները» թեմայով դասախոսություն, որի բանախոսն էր Արցախի Հանրապետության նախկին վարչապետ Արայիկ Հարությունյանը: