14.07.2022 | 
Ուսանողական, Կրթություն
«ՀԱՄԱԼՍԱՐԱՆՈՒՄ ԿՐԹՈՒԹՅՈՒՆ ՍՏԱՆԱԼՈՎ՝ ԵՍ ՀԱՍԿԱՑԱ, ԹԵ ՈՐՆ Է ԿՅԱՆՔՈՒՄ ԻՄ ԱՌԱՔԵԼՈՒԹՅՈՒՆԸ». ԵՊՀ ՇՐՋԱՆԱՎԱՐՏ ԱՆՆԱ ՍՏԵՓԱՆՅԱՆ
«ՀԱՄԱԼՍԱՐԱՆՈՒՄ ԿՐԹՈՒԹՅՈՒՆ ՍՏԱՆԱԼՈՎ՝ ԵՍ ՀԱՍԿԱՑԱ, ԹԵ ՈՐՆ Է ԿՅԱՆՔՈՒՄ ԻՄ ԱՌԱՔԵԼՈՒԹՅՈՒՆԸ». ԵՊՀ ՇՐՋԱՆԱՎԱՐՏ ԱՆՆԱ ՍՏԵՓԱՆՅԱՆ
ԵՊՀ իրավագիտության ֆակուլտետի այս տարվա շրջանավարտներից է Աննա Ստեփանյանը, ում հետ զրուցել ենք մասնագիտության ընտրության, գրանցած հաջողությունների, ապագայի պլանների և այլ հարցերի շուրջ:

Ես Աննա Ստեփանյանն եմ:

 

Դեռ մանկուց երազել եմ իրավաբան դառնալ, և բոլոր քայլերս ուղղված են եղել երազանքիս իրականացմանը: Հպարտությամբ կարող եմ ասել, որ ուսանելու չորս տարիների ընթացքում ես կարողացել եմ դառնալ շատ ավելի ինքնավստահ՝ գիտակցելով, որ այս ոլորտում ունեմ իմ ասելիքը:

 

Հաջողության հասնելու համար պետք է լինել համառ ու նպատակասլաց:

 

Իմ կարծիքով՝ իրավաբանը պետք է լինի համառ, նպատակասլաց, պայքարող ու ազնիվ, որպեսզի կարողանա հաջողության հասնել։ Այս գծերն իմ բնավորության մեջ ի սկզբանե կային, համալսարանում էլ ավելի ընդգծված դարձան, և այստեղ հասկացա՝ որն է իմ առաքելությունը: Իսկ ինքնավստահությունը ես ամբողջությամբ ասոցացնում եմ իրավաբանության հետ․ օրենքի պաշտպանը պետք է միշտ վստահ լինի իր ասելիքում, համառի ու պայքարի՝ հանուն սեփական հաջողությունների, և, իհարկե, հանուն պետության ու հասարակության:

 

 

Փորձում եմ վստահ քայլերով շարժվել առաջ՝ դեպի մասնագիտական գործունեության դաշտ:

 

Համալսարանն ինձ հնարավորություն է ընձեռել մասնակցելու հանրապետական տարաբնույթ միջոցառումների, դատախաղերի, որոնց շրջանակում պատիվ եմ ունեցել հաղթանակներ բերելու ֆակուլտետիս, համագործակցելու միջազգային կազմակերպությունների հետ, դառնալու անվանական կրթաթոշակակիր թե՛ ԵՊՀ-ում և թե՛ միջազգային ծրագրերում: Այս ամենի շնորհիվ էլ ավելի կատարելագործեցի հմտություններս, իրականացրի գիտական հետազոտություններ: Հենց այդ ժամանակ էլ որոշեցի հետագայում դասախոսական գործունեություն ծավալել և վստահ քայլերով գնում եմ դեպի իմ նպատակը։

 

ԵՊՀ-ն նաև իմ հետագա գործունեության մասն է լինելու:

 

Համալսարանն իր ջերմությամբ ու տված գիտելիքներով ինձ այնքան դրական էներգիա է փոխանցում, որ պարզապես չեմ պատկերացնում իմ հետագա գործունեությունն առանց համալսարանի։ Ամեն անգամ՝ համալսարան մտնելիս, էլ ավելի եմ լցվում էներգիայով ու նոր մտքերով: Վստահ եմ՝ համալսարանի հետ շարունակվող կապը միայն նոր հաջողությունների ճանապարհ կհարթի։

 

 

Պետք է միշտ վստահել սեփական ուժերին:

 

Ուզում եմ ասել, որ եթե մարդն իսկապես ցանկանում է դառնալ իրավաբան, ամենակարևորը սրտի ձայնին լսելն է: Իմ կարծիքով՝ անչափ կարևոր է մարդու՝ հավատով լցված լինելը, սեփական ուժերին վստահելը։

Այլ նորություններ
«ՆՈՐԱՐԱՐԱԿԱՆ ՍԱՐՔԱՎՈՐՈՒՄՆԵՐՈՎ ՀԱԳԵՑՎԱԾՈՒԹՅՈՒՆԸ ՆՊԱՍՏՈՒՄ է ԵՊՀ-ՈՒՄ ԳՈՐԾՆԱԿԱՆ ԴԱՍԵՐԻ ԱՐԴՅՈՒՆԱՎԵՏ ԿԱԶՄԱԿԵՐՊՄԱՆԸ». ԱՆՆԱ ՄԱԴԱԹՅԱՆ
ԵՊՀ եվրոպական լեզուների և հաղորդակցության ֆակուլտետի ուսանող Աննա Մադաթյանը «Էրազմուս+» միջազգային կրեդիտային շարժունության ծրագրով կրթություն է ստացել Իսպանիայի Լա Կորունյա համալսարանում: Մեզ հետ զրույցում Աննան պատմել է լեզուների իմացության կարևորության, Իսպանիայում անցկացրած օրերի և այլ թեմաների մասին։
«ԵՊՀ-ՈՒՄ ԳՈՐԾՈՂ ՈՒՍԱՆՈՂԱԿԱՆ ԿԱՌՈՒՅՑՆԵՐԸ ՄԻՏՎԱԾ ԵՆ ՀԱԳԵՑՆԵԼՈՒ ՈՒՍՈՒՄՆԱՌՈՒԹՅԱՆ ՏԱՐԻՆԵՐԸ»․ ԼԵՆԱ ՄՈՒՐԱԴՅԱՆ
ԵՊՀ աշխարհագրության և երկրաբանության ֆակուլտետի այս տարվա շրջանավարտներից է ֆակուլտետի ուսանողական խորհրդի նախագահ Լենա Մուրադյանը։ Լենայի հետ զրուցել ենք մասնագիտության ընտրության, ուսանողական հագեցած տարիների և այլ թեմաների շուրջ: