04.11.2014 | 
Քաղաքականություն
ԵՊՀ ՔԱՂԱՔԱԳԵՏՆԵՐՆ ԱՅՑԵԼԵԼ ԵՆ ԱՐՑԱԽԻ ՊԵՏԱԿԱՆ ՀԱՄԱԼՍԱՐԱՆ
ԵՊՀ ՔԱՂԱՔԱԳԵՏՆԵՐՆ ԱՅՑԵԼԵԼ ԵՆ ԱՐՑԱԽԻ ՊԵՏԱԿԱՆ ՀԱՄԱԼՍԱՐԱՆ
Երկու բուհերի մասնագետները որոշել են կրթագիտական կապերը տեղափոխել նոր՝ ավելի բարձր հարթություն:

Վերջին տարիներին ԵՊՀ միջազգային հարաբերությունների ֆակուլտետի և Արցախի պետական համալսարանի (ԱրՊՀ) քաղաքագիտության բաժինների դասախոսների միջև հաստատվել են մասնագիտական սերտ կապեր, սկսվել է կրթական և գիտամեթոդական համագործակցությունը: Նպատակը ԵՊՀ քաղաքագետ մասնագետների արդյունավետ օգնության կազմակերպումն է Արցախի գործընկերներին:  

 

Այս համագործակցության շրջանակներում արդեն չորրորդ տարին է, ինչ ԵՊՀ քաղաքագիտական երկու ամբիոնների առաջատար մասնագետներ գործուղվում են ԱրՊՀ` ամփոփիչ ատեստավորման քննական հանձնաժողովները ղեկավարելու համար, որն ուղեկցվում է ավարտական քննությունների համար նախատեսված գիտամեթոդական գրականության և այլ նյութերի տրամադրմամբ:

 

Հոկտեմբերի 31-ից նոյեմբերի 2-ը ԵՊՀ քաղաքական ինստիտուտների և գործընթացների ամբիոնի վարիչ, պրոֆեսոր Գարիկ Քեռյանը, նույն ամբիոնի դասախոսներ քաղ. գիտ. թեկնածու, դոցենտ Հասմիկ Շափաղաթյանը, քաղ. գիտ. թեկնածու, դոցենտ Խաչիկ Գալստյանը Արցախի համալսարանականների հրավերով այցելեցին Ստեփանակերտ: Նոյեմբերի 1-ին նրանք պրոֆեսորադասախոսական անձնակազմի և ուսանողների լսարանի առջև հանդես եկան ընդարձակ դասախոսությունների շարքով, որոնք ընդգրկում էին քաղաքական կուսակցությունների պատմական տիպերի ծագման և զարգացման, քաղաքական մասնակցության արդիական հիմնախնդիրների և քաղաքական բանակցությունների վարման տեխնոլոգիաներին վերաբերող թեմաները:

 

Դասախոսություններն անցան ակտիվ հարց ու պատասխանով և քննարկումներով: Արցախցի ուսանողներն առավել մեծ ակտիվությամբ ու ոգևորությամբ մասնակցեցին Խաչիկ Գալստյանի կազմակերպած բանակցային խաղին:

 

Այնուհետև տեղի ունեցան հանդիպումներ և քննարկումներ ԱրՊՀ-ի պրոֆեսորադասախոսական անձնակազմի հետ, որին մասնակցում էին նաև պրոռեկտոր Վալերի Ավանեսյանը, Քաղաքագիտության ամբիոնի վարիչը:

 

ԱրՊՀ-ի հայագիտական հետազոտությունների կենտրոնը և Քաղաքագիտության ամբիոնը որպես նվեր ստացան ԵՊՀ միջազգային հարաբերությունների ֆակուլտետի դասախոսների և Եվրոպական ուսումնասիրությունների կենտրոնի ուղարկած շուրջ 50 անուն մենագրություններ, դասագրքեր, ամսագրեր և մեթոդական գրականություն: Պայմանավորվածություն ձեռք բերվեց ապագայում շարունակել համագործակցությունը և գտնել համատեղ աշխատանքի նոր ձևեր:

Այլ նորություններ
«ԱՐՏԱՔԻՆ ՔԱՂԱՔԱԿԱՆՈՒԹՅՈՒՆԸ ՍԿՍՎՈՒՄ Է ՏԱՆԸ». ՀՀ ՎԱՐՉԱՊԵՏԻ ԳԼԽԱՎՈՐ ԽՈՐՀՐԴԱԿԱՆԸ ԴԱՍԱԽՈՍՈՒԹՅՈՒՆ ԿԱՐԴԱՑ ԵՊՀ-ՈՒՄ
ԵՊՀ արևելագիտության ֆակուլտետն այսօր հյուրընկալեց ՀՀ վարչապետի գլխավոր խորհրդական Արսեն Գասպարյանին:
«ՀԵՐԱՑԻ» ԱՎԱԳ ԴՊՐՈՑԻ ՍԱՆԵՐԸ՝ ԵՊՀ ԿԵՆՍԱԲԱՆՈՒԹՅԱՆ ՖԱԿՈՒԼՏԵՏՈՒՄ
«Հերացի» ավագ դպրոցի 11-րդ և 12-րդ դասարանների աշակերտներն այսօր այցելեցին ԵՊՀ կենսաբանության ֆակուլտետ: