24.05.2019 | 
Կրթություն
ԵՐԻՏԱՍԱՐԴԱԿԱՆ ԳԻՏԱԺՈՂՈՎ՝ ՆՎԻՐՎԱԾ ԵՊՀ ՀԻՄՆԱԴՐՄԱՆ 100-ԱՄՅԱԿԻՆ
ԵՐԻՏԱՍԱՐԴԱԿԱՆ ԳԻՏԱԺՈՂՈՎ՝ ՆՎԻՐՎԱԾ ԵՊՀ ՀԻՄՆԱԴՐՄԱՆ 100-ԱՄՅԱԿԻՆ
ԵՊՀ ռադիոֆիզիկայի ֆակուլտետում այսօր անցկացվեց համալսարանի հիմնադրման 100-ամյակին նվիրված երիտասարդական գիտաժողով:

Երիտասարդական գիտաժողովը կազմակերպել է ԵՊՀ ռադիոֆիզիկայի ֆակուլտետը ֆակուլտետի ուսանողական գիտական ընկերության (ՈՒԳԸ) հետ համատեղ: Գիտաժողովին ներկա էին ֆակուլտետի պրոֆեսորադասախոսական կազմի ներկայացուցիչները և ուսանողները:

 

Ռադիոֆիզիկայի ֆակուլտետի ՈՒԳԸ նախագահ Ռեբեկա Գևորգյանը մեզ հետ զրույցում նշեց, որ գիտաժողովն ուսանողներին, ասպիրանտներին և երիտասարդ գիտնականներին հնարավորություն է ընձեռում ակադեմիական լսարանին ներկայացնելու իրենց գիտական հետազոտության արդյունքները, կատարելագործելու գիտական աշխատանք կատարելու հմտությունները:

 

Երիտասարդական գիտաժողովին զեկուցումներով հանդես եկան ԵՊՀ-ի, Գավառի պետական և Հայաստանի ազգային պոլիտեխնիկական համալսարանների 11 ուսանողներ:  

 

 

Զեկուցողները ներկայացրին իրենց գիտա­կան հետազոտության արդյունքները և խոսեցին իրենց մասնագիտության արդի հիմ­նախնդիր­ների մասին:

Ներկայացվող զեկուցումները ներառում էին մասնագիտական հետևյալ բաժանմունքները՝ կիրառական մաթեմատիկա և համակարգչային գիտություններ, մաթեմատիկա և մեխանիկա, ռադիոֆիզիկա և ֆիզիկա:

 

 

ԵՊՀ ռադիոֆիզիկայի ֆակուլտետի կիրառական էլեկտրադինամիկայի և մոդելավորման ամբիոնի ուսումնական լաբորատորիայի վարիչ, ֆիզմաթ. գիտ. թեկնածու, գիտաժողովի նախագահ Արտաշես Վարդանյանը մեզ հետ զրույցում նշեց, որ այս գիտաժողովը նպաստում է Ռադիոֆիզիկայի և այլ բնագիտական ֆակուլտետներում կրթություն ստացող ուսանողների շրջանում գիտահետազոտական աշխատանքների նկատմամբ հետաքրքրության բարձրացմանը, ինչպես նաև հնարավորություն է ընձեռում, ուսումնառության ընթացքում, գիտության ոլորտում առաջին քայլերը կատարող առավել ակտիվ ուսանողներին ներկայացնելու իրենց իրականացրած գիտահետազոտական աշխատանքների արդյունքները:

 

Հայաստանի ազգային պոլիտեխնիկական համալսարանի մագիստրանտ Միքայել Մարտիրոսյանի խոսքով, շատ ողջունելի է, որ ԵՊՀ-ում կազմակերպվում է նմանօրինակ գիտաժողով: «Կարևոր եմ համարում գիտության զարգացումը՝ ուսանողների ներգրավմամբ: Սա ուսանողների համար շատ լավ հնարավորություն է՝ ներկայացնելու իրենց գիտական աշխատանքները»,- հավելեց նա:

 

 Գավառի պետական համալսարանի ուսանող Կարեն Մաստոյանը նշեց, որ առաջին անգամ է ԵՊՀ-ում մասնակցում գիտաժողովի, շատ ուրախ է, որ ձեռք է բերել ընկերներ ու նոր գիտելիքներ: «Մասնակցելով նման գիտաժողովների՝ կարողանում ես բարելավել ելույթ ունենալու ունակություններդ, ինչպես նաև ձեռք ես բերում նեղ մասնագիտական գիտելիքներ»,- ասաց ուսանողը:

 

 

Գիտաժողովի բոլոր զեկուցողներին տրվեցին մասնակցության հավաստագրեր:

 

Գիտաժողովին զեկուցված նյութերը գրախոսության փուլը հաղթահարելու և տպագրության երաշխավորվելու պա­րա­­գա­յում տպագրվելու են «ԵՊՀ ՈՒԳԸ գիտական հոդվածների ժողովածու» գիտական պար­բե­րականում:

 

Նադեժդա Տեր-Աբրահամյան

 

 

Այլ նորություններ
ՏԵՍԱԿԱՆ ԳԻՏԵԼԻՔՆԵՐԸ ՎԵՐԱԾՎՈՒՄ ԵՆ ԳՈՐԾՆԱԿԱՆ ՀՄՏՈՒԹՅՈՒՆՆԵՐԻ․ «ՏՕՊԱՍ» ԾՐԱԳՐԻ ՀԵՐԹԱԿԱՆ ԽՈՐՀՐԴԱԿՑՈՒԹՅՈՒՆԸ ԵՊՀ-ՈՒՄ
Երևանի պետական համալսարանի տնտեսագիտության և կառավարման ֆակուլտետում այսօր տեղի է ունեցել «ՏՕՊԱՍ»-ի (TOPAS- From Theoretical-Oriented to Practical education in Agrarian Studies) «Տեսական ուղղվածությունից գործնական կրթությանը նվիրված Ագրարային կրթության» ծրագրի հերթական խորհրդակցությունը։
 «ՏՎՅԱԼՆԵՐԻ ԳԻՏՈՒԹՅՈՒՆԸ ԲԻԶՆԵՍՈՒՄ» ՄԱԳԻՍՏՐՈՍԱԿԱՆ ԾՐԱԳՐԻ ՈՐՈՇ ՈՒՍԱՆՈՂՆԵՐ ՇԱՐՈՒՆԱԿԵԼՈՒ ԵՆ ՈՒՍՈՒՄԸ ՍԱՆ ԽՈՍԵԻ ՀԱՄԱԼՍԱՐԱՆՈՒՄ
Երևանի և Սան Խոսեի պետական համալսարանների 2019 թվականին ձեռք բերված համագործակցության շնորհիվ ԵՊՀ տնտեսագիտության և կառավարման ֆակուլտետի «Տվյալների գիտությունը բիզնեսում» մագիստրոսական ծրագրի ընտրական փուլը հաղթահարած 2-4 ուսանող 2020 թ. սեպտեմբերից կշարունակեն ուսումն ԱՄՆ-ի Սան Խոսեի պետական համալսարանի «Data Analytics» (MS) մագիստրոսական ծրագրում։ Համագործակցության, նպատակների ու հետագա գործունեության մասին ysu.am-ը զրուցել է «Տվյալների գիտությունը բիզնեսում» մագիստրոսական ծրագրի ղեկավար Ռուբեն Գևորգյանի և ընտրական փուլ հասած ուսանողներից մի քանիսի հետ։