11.02.2009 | 
Ուսանողական, Քաղաքականություն
ԿԱՐՈՂ ԵՍ ԱՇԽԱՏԵԼ ՆԱԽԱՐԱՐՈՒԹՅՈՒՆՈՒՄ
ԿԱՐՈՂ ԵՍ ԱՇԽԱՏԵԼ ՆԱԽԱՐԱՐՈՒԹՅՈՒՆՈՒՄ
«Այսօր մեր առջեւ ծառացած կարեւորագույն խնդիրներից մեկն է մեր երկրում կառուցել գիտելիքի տնտեսություն»:

Փետրվարի 11-ին ԵՊՀ գիտխորհրդի նիստերի դահլիճում համալսարանի ուսանողների հետ հանդիպման ժամանակ հայտարարեց ՀՀ էկոնոմիկայի նախարար Ներսես Երիցյանը: Հանդիպման ընթացքում ՀՀ էկոնոմիկայի նախարար Ներսես Երիցյանը եւ աշխատակազմի ղեկավար Էմիլ Տարասյանն ուսանողներին ներկայացրին էկոնոմիկայի նախարարության վերափոխված կառուցվածքը, գործունեության ոլորտները, հիմնական ուղղությունները , ինչպես նաեւ այն կարեւորագույն ծրագրերը, որոնք կխթանեն բարեփոխումների իրականացումը նախարարությունում:

 

«Այսօր ՀՀ էկոնոմիկայի նախարարությունն ունի 40-ից ավելի թափուր պաշտոն` հիմնականում պահանջվում են կրտսեր մասնագետներ: Կարծում եմ` այս հանգամանքը ձեզ կշահագրգռի, որովհետեւ չեք բախվի աշխատանքային փորձ չունենալու այն կարեւորագույն խնդրին, որ այսօր պահանջում են գործատուները: Մեզ հարկավոր են իրենց մասնագիտությանը տիրապետող, բանիմաց, պրպտող, պատասխանատու երիտասարդ մասնագետներ:

 

Մենք նպատակ ունենք Էկոնոմիկայի ոլորտում բարեփոխումների դաշտն ընդլայնել եւ պատրաստ ենք այստեղ առատ ներդրումներ կատարել»,- ասում է Ներսես Երիցյանը: Էկոնոմիկայի նախարարությունը ոչ միայն առեւտրի մասնագետների պակաս ունի, այլեւ` իրավաբանների, թարգմանիչների, միջազգայնագետների, արդյունաբերական ճյուղերի մասնագետների, սոցիոլոգների, ինժեներների եւ այլն: Մեկ ամսվա ընթացքում նախարարությունը կհայտարարի թափուր աշխատատեղերի մրցույթ, որին կարող են ուսանողները ծանոթանալ ՀՀ էկոնոմիկայի նախարարության կայքէջից (www.mineconomy.am):

 

Ի դեպ, ԵՊՀ կարիերայի կենտրոնի տնօրեն Արմեն Եսայանցը նախարարին համագործակցության առաջարկ արեց` նպատակ ունենալով ուսանողության ավելի լայն զանգվածներին իրազեկելու նախարարության թափուր աշխատատեղերի առկայության մասին: ԵՊՀ ռեկտոր Արամ Սիմոնյանը նախ ողջունեց նախարարի այցը համալսարան եւ ավելացրեց. «Այսպիսի հանդիպումները մեր ուսանողների համար շատ կարեւոր են: Թեեւ համալսարանը տալիս է տեսական գիտելիքներ, այնուամենայնիվ, մեր ուսանողներն աշխատանքային փորձի, պրակտիկայի կարիք ունեն: Այս առումով մենք շատ անելիքներ ունենք, իսկ այսպիսի հանդիպումներն օգնում են որոշակիորեն լրացնելու այդ բացը»:

Այլ նորություններ
«Ի՞ՆՉ, ՈՐՏԵ՞Ղ, Ե՞ՐԲ». ՊԱՏԱՍԽԱՆՈՒՄ ԵՆ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ
ԵՊՀ Պալեանների անվան դահլիճում այսօր Իրավագիտության ֆակուլտետի ՈՒԽ-ի նախաձեռնությամբ անցկացվել է «Ի՞նչ, որտե՞ղ, ե՞րբ» ներֆակուլտետային ինտելեկտուալ խաղ-մրցույթը:
ԵՊՀ ՀԱՎԱՔԱԿԱՆԸ ՄԱՍՆԱԿՑԵԼ Է ԹԻԱՎԱՐՈՒԹՅԱՆ ՄԻՋԲՈՒՀԱԿԱՆ ԱՌԱՋՆՈՒԹՅԱՆԸ
Հանրապետության ուսանողական 22-րդ մարզական խաղերի ծրագրով հոկտեմբերի 5-ին Երևանյան լճի տարածքում գտնվող ջրային մարզաձևերի մարզակայանում անցկացվեց «Դրակոնբոութ» (թիավարական մակույկներ) և «Կոնցեպտ» (վարժասարքեր) մարզաձևերի բուհական առաջնությունը, որի մասնակցել են 8 բուհերի հավաքականներ: