08.07.2022 | 
Կրթություն, Հասարակություն
ՆՈՐ ԳՈՐԾԸՆԿԵՐ ՔԻՄԻԱՅԻ ՈԼՈՐՏՈՒՄ․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀԱՄԱՁԱՅՆԱԳԻՐ
ՆՈՐ ԳՈՐԾԸՆԿԵՐ ՔԻՄԻԱՅԻ ՈԼՈՐՏՈՒՄ․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀԱՄԱՁԱՅՆԱԳԻՐ
ԵՊՀ-ի և «Մարկո գրուպ 7» ՍՊԸ-ի միջև այսօր կնքվել է համագործակցության համաձայնագիր՝ միավորելու ջանքերն անօրգանական, անալիտիկ, կենցաղային քիմիայի, հանքահումքային, պոլիմերային արտադրության և այլ ոլորտներում գիտահետազոտական, տեխնոլոգիական աշխատանքներ կատարելու, ինչպես նաև համատեղ կրթական ծրագրեր իրականացնելու համար:

Նոր համաձայնագրով ԵՊՀ-ն և «Մարկո գրուպ 7» ՍՊԸ-ն համագործակցելու են հանքահումքային արտադրության և ժամանակակից շինանյութերի արդյունաբերության ոլորտներում միջազգային ստանդարտներին համապատասխան արտադրական տեխնոլոգիաների մշակման ու ներդրման, շուկայի որակի բարելավման, ոլորտին սպասարկող մասնագետների վերապատրաստման, երիտասարդ մասնագետների, ինչպես նաև համապատասխան մասնագիտացմամբ սովորողների հմտությունների զարգացման ուղղություններով։

 

 

ԵՊՀ ռեկտոր Հովհաննես Հովհաննիսյանը, ընդգծելով բուհ-գործարար աշխարհ համագործակցության կարևորությունը, շնորհակալություն հայտնեց «Մարկո գրուպ 7» ընկերությանը պատրաստակամության համար՝ փաստելով, որ որակյալ շինանյութի առկայությունն անհրաժեշտություն է, ինչին հնարավոր կլինի հասնել համատեղ ջանքերով։

Հ․ Հովհաննիսյանը շնորհակալություն հայտնեց նաև ԵՊՀ-ում տեղի ունեցած «Կիրառական քիմիա» էքսպոյին մասնակցելու և հետաքրքիր տաղավարով ներկայանալու համար, ապա այդ կապակցությամբ «Մարկո գրուպ 7» ընկերության տնօրեն Գոհար Հովհաննիսյանին հանձնեց շնորհակալագիր։

 

 

«Մենք բարձր ենք գնահատում այս համագործակցությունը, և վստահաբար կարող եմ ասել, որ այն կլինի փոխշահավետ և շարունակական։ Մեր ընկերության գլխավոր նպատակն է ԵՊՀ-ի հետ համատեղ իրականացնել գիտահետազոտական աշխատանքներ և հասնել Հայաստանի տնտեսության գլխավոր շարժիչ ուժերից մեկի՝ հանքահումքային արտադրության զարգացմանը»,- իր խոսքում նշեց Գ․ Հովհաննիսյանը։

 

 

Տեղեկացնենք, որ ըստ համաձայնագրի՝ կողմերը համատեղ կազմակերպելու են ուսանողների պրակտիկաներ, լաբորատոր և գործնական պարապմունքներ, աշխատողների որակավորման բարձրացման դասընթացներ, իրականացնելու են փորձարարական, գիտական, հետազոտական ու կրթական համատեղ աշխատանքներ, մասնակցելու են միջազգային դրամաշնորհային ծրագրերի, ինչպես նաև կազմակերպելու են գիտաժողովներ, սեմինարներ և այլ միջոցառումներ։

 

Այլ նորություններ
ՀԱՅԿԱԿԱՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ՈՉՆՉԱՑՄԱՆ ՎՏԱՆԳՆ ԱՐՑԱԽՈՒՄ․ ԳԻՏՆԱԿԱՆՆԵՐԸ ՀԱՆԴԵՍ ԵՆ ԵԿԵԼ ԿՈՉՈՎ
2022 թ․ հուլիսի 15-19-ը ԵՊՀ-ում և Հայ Առաքելական եկեղեցու Վայոց ձորի թեմում տեղի է ունեցել «Արցախի մշակութային ժառանգությունը» խորագրով միջազգային գիտաժողով, որի ընթացքում ավելի քան երեսուն օտարերկրյա և հայ գիտնականներ ու փորձագետներ քննարկել են Լեռնային Ղարաբաղի տարածաշրջանում մշակութային արժեքների ստեղծման, պատմական զարգացման և ներկայիս վտանգվածության խնդիրները։
«ՆՈՐԱՐԱՐԱԿԱՆ ՍԱՐՔԱՎՈՐՈՒՄՆԵՐՈՎ ՀԱԳԵՑՎԱԾՈՒԹՅՈՒՆԸ ՆՊԱՍՏՈՒՄ է ԵՊՀ-ՈՒՄ ԳՈՐԾՆԱԿԱՆ ԴԱՍԵՐԻ ԱՐԴՅՈՒՆԱՎԵՏ ԿԱԶՄԱԿԵՐՊՄԱՆԸ». ԱՆՆԱ ՄԱԴԱԹՅԱՆ
ԵՊՀ եվրոպական լեզուների և հաղորդակցության ֆակուլտետի ուսանող Աննա Մադաթյանը «Էրազմուս+» միջազգային կրեդիտային շարժունության ծրագրով կրթություն է ստացել Իսպանիայի Լա Կորունյա համալսարանում: Մեզ հետ զրույցում Աննան պատմել է լեզուների իմացության կարևորության, Իսպանիայում անցկացրած օրերի և այլ թեմաների մասին։