25.09.2009 | 
Քաղաքականություն, Հասարակություն
ՄԻՋՈՑԱՌՈՒՄՆԵՐԻՆ ԸՆԴԱՌԱՋ
ՄԻՋՈՑԱՌՈՒՄՆԵՐԻՆ ԸՆԴԱՌԱՋ
Այսօր ԵՊՀ ռեկտոր Արամ Սիմոնյանը հյուրընկալել էր հայաստանյան ԶԼՄ-ների ներկայացուցիչներին:

Այս տարի լրանում է ԵՊՀ-ի հիմնադրման 90-ամյակը: Հոբելյանական ողջ տարվա ընթացքում անցկացվել եւ շարունակվում են անցկացվել բազմաթիվ ու բազմաբնույթ միջոցառումներ: Սակայն Մայր բուհի 90-ամյա հոբելյանը խորհրդանշող հիմնական միջոցառումները կանցկացվեն ս.թ. սեպտեմբերի 29-ից հոկտեմբերի 3-ը:

 

Ասուլիսի ժամանակ ԵՊՀ ռեկտորը ամփոփեց հոբելյանական տարին, լրագրողներին տեղեկացրեց մանրամասներ նախատեսվող միջոցառումների վերաբերյալ, ներկայացրեց հոբելյանական տարվա շրջանակում հրատարակված գրքերի մի մասը: Մեկ շաբաթ շարունակ համալսարանականներն ու ԵՊՀ հյուրերը կմասնակցեն բազմաբնույթ միջոցառումների` գրքերի շնորհանդես, ԵՊՀ պատմության թանգարանի նոր ցուցադրության բացում, համալսարանական եւ պետական պարգեւների հանձնման արարողություն, միջազգային գիտաժողով եւ այլ մեծ ու փոքր արարողություններ:

 

Միջոցառումների շարքը կամփոփի Ալ. Սպենդարյանի անվան օպերայի եւ բալետի ազգային ակադեմիական թատրոնում նախատեսվող մեծ հանդիսությունը: Համալսարանական պատվիրակությունն ու արտասահմանյան հյուրերը միջոցառմանը մասնակցելու համար ԵՊՀ-ից Ակադեմիական թատրոն կգնան ոտքով: Աննախադեպ երթի մասնակիցներից յուրաքանչյուրը կկրի եվրոպական ավանդական հանդերձանք` մանտիա (հանդիսավոր արարողությունների համար նախատեսված հատուկ պատմուճան): «90-ամյակին նվիրված միջոցառումներին մասնակցելու համար, տեղի հյուրերից բացի, համալսարանը հյուրընկալելու է շուրջ 15 երկրների ավելի քան 50 ներկայացուցիչների: Նախատեսված ծրագրի համաձայն` արտասահմանյան հյուրերը ոչ միայն կմասնակցեն միջոցառումներին, այլեւ կծանոթանան Հայաստանի գեղատեսիլ վայրերին»,- տեղեկացրեց ԵՊՀ ռեկտորը: Ա. Սիմոնյանը տեղեկացրեց, որ արտասահմանյան հյուրերի մի մասը Հայաստանում կմնա նաեւ միջոցառումներից հետո: Նրանց հետ շփումը կշարունակվի անհատական ծրագրերի տեսքով: Պատասխանելով լրագրողների հարցերին` Արամ Սիմոնյանը խոսեց 90-ամյա կրթօջախի այսօրվա խնդիրների եւ վաղվա ծրագրերի մասին: Ռեկտորն առանձնացրեց բուհի առջեւ ծառացած 4 հիմնական խնդիր: Դրանցից առաջինը, ըստ բանախոսի, ֆինանսական միջոցների անբավարար լինելն է, երկրորդը` կրթության որակի բարելավման հարցը:

 

«Համալսարանի համար այսօր խիստ կարեւոր է նաեւ գիտահետազոտական աշխատանքները հնարավորինս կյանքին մոտեցնելը: ԵՊՀ-ն պետք է ամեն ինչ անի, որ դրանք լինեն ոչ միայն տեսական եւ մեթոդական, այլեւ կիրառական ոլորտում: Հիմնական խնդիրների շարքում է նաեւ երիտասարդ կադրերի հարցը. մեր կադրային պարկը ծերացած է եւ այս խնդրի լուծման համար անհրաժեշտ է ոչ միայն համալսարանական, այլեւ պետական լուրջ ծրագիր»,- ասաց Արամ Սիմոնյանը: 90-ամյա համալսարանի ռեկտորը տեղեկացրեց, որ այսօր արվում է ամեն հնարավորը, որպեսզի Երեւանի պետական համալսարանը 25 տարի անց լինի համաշխարհային մակարդակի գլոբալ հետազոտական համալսարան:

Այլ նորություններ
ԲԱՆԱԽՈՍՈՒԹՅՈՒՆ ՄՐՑԱԿՑՈՒԹՅԱՆ ՊԱՇՏՊԱՆՈՒԹՅԱՆ ՀԱՆՁՆԱԺՈՂՈՎԻ ՄԱՍԻՆ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՈՒՄ
ԵՊՀ իրավագիտության ֆակուլտետի դատական նիստերի դահլիճում կազմակերպվել էր միջոցառում, որի ընթացքում ՄՊՀ անդամ, Իրավագիտության ֆակուլտետի դասախոս, ի.գ.թ.Տիգրան Մարկոսյանը ԵՊՀ իրավագիտության ֆակուլտետի ուսանողներին ներկայացրեց Մրցակցության պաշտպանության հանձնաժողովի գործառույթներն ու լիազորությունները:
«ՉՆԱՅԱԾ ԱՐՏԵՐԿՐՈՒՄ ԱՌԱՋԱՐԿՆԵՐՆ ԱՎԵԼԻ ԳՐԱՎԻՉ ԵՆ, ԲԱՅՑ ՄԵՐԸ ՀԱՅԱՍՏԱՆՆ Է, ՄԵՆՔ՝ ՀԱՅԱՍՏԱՆԻՆԸ». ԱՆԱՀԻՏ ՕՐԲԵԼՅԱՆ
ԵՊՀ աշխարհագրության և երկրաբանության ֆակուլտետի սերվիս բաժնի 3-րդ կուրսի ուսանողուհի Անահիտ Օրբելյանը վստահ է, որ Հայաստանը զբոսաշրջության ոլորտում մեծ ներուժ ունի: Երիտասարդ համալսարանականն ունի իր տեսլականը պետության զարգացման համար, որի առանցքային տարրը երիտասարդն է՝ հայրենասեր ու նպատակասլաց: