29.12.2021 | 
Հասարակություն
ՀՈՒՇ-ՑԵՐԵԿՈՒՅԹ՝ ՆՎԻՐՎԱԾ ՀԱՄԱԼՍԱՐԱՆԱԿԱՆ ԴԱՍԱԽՈՍՆԵՐԻՆ
ՀՈՒՇ-ՑԵՐԵԿՈՒՅԹ՝ ՆՎԻՐՎԱԾ ՀԱՄԱԼՍԱՐԱՆԱԿԱՆ ԴԱՍԱԽՈՍՆԵՐԻՆ
ԵՊՀ մշակույթի կենտրոնում կազմակերպվել էր Փիլիսոփայության և հոգեբանության ֆակուլտետի դասախոսներ, հոգեբանական գիտությունների դոկտոր, դոցենտ Վլադիմիր Միքայելյանին և դոցենտ Սյուզաննա Սարգսյանին նվիրված հուշ-ցերեկույթ:

Միջոցառմանը ներկա էին ԵՊՀ փիլիսոփայության և հոգեբանության ֆակուլտետի դեկան Ալեքսան Բաղդասարյանը, Հումանիտար և հասարակագիտական մասնագիտությունների գծով պրոռեկտոր, ֆակուլտետի դասախոս, դոցենտ Էլինա Ասրիյանը, Մշակույթի կենտրոնի տնօրեն Կարինե Դավթյանը, ֆակուլտետի պրոֆեսորադասախոսական կազմի ներկայացուցիչներ, ուսանողներ:

 

 

Հուշ-ցերեկույթի ընթացքում համալսարանականների կենսագրության և գիտական գործունեության մասին ներկայացրին ուսանողները, ողջույնի խոսք ասաց նաև Ա. Բաղդասարյանը. «Մեր ֆակուլտետը կայացել է հենց այսպիսի դասախոսների շնորհիվ. դասախոսներ, որոնք սիրված էին և՛ գործընկերների, և՛ ուսանողների կողմից»:

 

 

«Վլադիմիր Միքայելյանն ու Սյուզաննա Սարգսյանը ոչ միայն հիանալի մարդիկ էին, լավ ընկերներ ու դասախոսներ, այլև բարձրակարգ մասնագետներ: Եվ, ցավոք, մենք նրանց կորցրինք օրերի ընթացքում: Դա մեծ կորուստ ու վիշտ էր բոլորիս համար: Ու երբ մեր գործընկերների մասին էսսե գրեցի, ռեկտորն առաջարկեց միջոցառում կազմակերպել ու հարգել վերջիններիս հիշատակը: Ֆակուլտետի դեկանի հետ նույնպես նախատեսում էինք կազմակերպել նմանօրինակ միջոցառում»,- պատմեց Սոցիալական և կլինիկական հոգեբանության ամբիոնի վարիչ, պրոֆեսոր Գայանե Շահվերդյանը և հավելեց, որ ուսանողները նույնպես պարբերաբար հիշում են իրենց սիրելի դասախոսներին, նրանց խոսքերն ու խորհուրդները:

 

 

Կ. Դավթյանն էլ նշեց, որ էսսեն, որը բավականին զգացմունքային և յուրօրինակ էր, արտահայտում էր ուսանողների ու պրոֆեսորադասախոսական կազմի ամբողջ սերն ու կարոտը. «Վերջին երկու տարիների ընթացքում մենք շատ կորուստներ ունեցանք: Ես անկեղծորեն զարմացած եմ և միաժամանակ հիացած, թե ինչ սիրով, հարգանքով ու ջերմությամբ են հիշում համալսարանական դասախոսներին նրանց գործընկերներն ու մասնավորապես ուսանողները: Այս ամենը վկայում է, որ նրանք իսկապես շատ մեծ ազդեցություն են ունեցել վերջիններիս մտածողության ու անձի ձևավորման վրա»:

Այլ նորություններ
ՀԱՅԿԱԿԱՆ ՄՇԱԿՈՒԹԱՅԻՆ ԺԱՌԱՆԳՈՒԹՅԱՆ ՈՉՆՉԱՑՄԱՆ ՎՏԱՆԳՆ ԱՐՑԱԽՈՒՄ․ ԳԻՏՆԱԿԱՆՆԵՐԸ ՀԱՆԴԵՍ ԵՆ ԵԿԵԼ ԿՈՉՈՎ
2022 թ․ հուլիսի 15-19-ը ԵՊՀ-ում և Հայ Առաքելական եկեղեցու Վայոց ձորի թեմում տեղի է ունեցել «Արցախի մշակութային ժառանգությունը» խորագրով միջազգային գիտաժողով, որի ընթացքում ավելի քան երեսուն օտարերկրյա և հայ գիտնականներ ու փորձագետներ քննարկել են Լեռնային Ղարաբաղի տարածաշրջանում մշակութային արժեքների ստեղծման, պատմական զարգացման և ներկայիս վտանգվածության խնդիրները։
ԿԵՆՍԱԲԱՆՈՒԹՅԱՆ ՄԻՋԱԶԳԱՅԻՆ ՕԼԻՄՊԻԱԴԱՅԻ ՄԱՍՆԱԿԻՑՆԵՐԸ ՇԱՐՈՒՆԱԿՈՒՄ ԵՆ ԲԱՑԱՀԱՅՏԵԼ ՀԱՅԱՍՏԱՆԸ
Այսօր հայոց պատմամշակութային ժառանգությանը ծանոթանալու նպատակով «Կենսաբանության 33-րդ միջազգային օլիմպիադայի» (ԿՄՕ) մասնակիցները շրջայց են կատարել «Էրեբունի» պատմահնագիտական արգելոց–թանգարանում, այնուհետև ճանաչողական էքսկուրսիա իրականացրել Մեսրոպ Մաշտոցի անվան Մատենադարանում: