01.11.2021 | 
Հասարակություն
ՀՈՒՇ-ՑԵՐԵԿՈՒՅԹ ՈՒ ՑՈՒՑԱՀԱՆԴԵՍ՝ ՆՎԻՐՎԱԾ ԱՐՑԱԽՅԱՆ 44-ՕՐՅԱ ՊԱՏԵՐԱԶՄԻ ԱՆՄԱՀ ՀԵՐՈՍ ՀԱՅԿԱԶ ՄԿՐՏՉՅԱՆԻ ԾՆՆԴՅԱՆ 21-ԱՄՅԱԿԻՆ
ՀՈՒՇ-ՑԵՐԵԿՈՒՅԹ ՈՒ ՑՈՒՑԱՀԱՆԴԵՍ՝ ՆՎԻՐՎԱԾ ԱՐՑԱԽՅԱՆ 44-ՕՐՅԱ ՊԱՏԵՐԱԶՄԻ ԱՆՄԱՀ ՀԵՐՈՍ ՀԱՅԿԱԶ ՄԿՐՏՉՅԱՆԻ ԾՆՆԴՅԱՆ 21-ԱՄՅԱԿԻՆ
Հոկտեմբերի 31-ին Առնո Բաբաջանյանի անվան համերգասրահում տեղի են ունեցել Հուլիսյան մարտերի և Արցախյան 44-օրյա պատերազմի անմահ հերոս, ԵՊՀ մաթեմատիկայի և մեխանիկայի ֆակուլտետի ուսանող Հայկազ Մկրտչյանի ծննդյան 21-ամյակին նվիրված միջոցառում և հերոսի նկարների ու իրերի ցուցահանդես:

Հերոսին նվիրված հուշ-ցերեկույթին ներկա էին Հայկազի ընտանիքի անդամները, հարազատները, ընկերներն ու ուսուցիչները, հրամանատարներն ու մարտական ընկերները, Հայկազի սիրելի երգիչ-երգչուհիները:

 

 

Միջոցառման ընթացքում ներկայացվել է հերոսի կենսագրությունը, հրամանատարները, ընկերներն ու ուսուցիչները նրա մասին հուշեր են պատմել, Հայկազի սիրելի երգիչները հանդես են եկել կատարումներով:

 

Հայկազ Մկրտչյանի քույրը՝ Արևիկը, մեզ հետ զրույցում պատմեց, որ հուշ-ցերեկույթը նախաձեռնել են եղբոր մտերիմ ընկերներից մեկի հետ՝ որոշելով նրա ծննդյան 21-ամյակին ոչ թե սգալ, այլ հիշել Հայկազին այնպես, ինչպիսին նա կար՝ պայծառ ու լուսավոր. «Եղբայրս շատ էր սիրում իր ծննդյան օրը, անցյալ տարի անհամբեր սպասում էր, թե ով պետք է իրեն շնորհավորի, սակայն ծննդից երկու օր առաջ՝ հոկտեմբերի 29-ին, վիրավորվել է և 12 օր շարունակ անգիտակից վիճակում եղել: Ու քանի որ մենք ոչ մի կերպ չենք հասցրել եղբորս 20-ամյակը շնորհավորել, որոշեցինք նմանօրինակ միջոցառում կազմակերպել՝ իր հարազատ մարդկանցով, սիրելի երգերով ու նկարներով, քանի որ Հայկազը լուսանկարվել շատ էր սիրում»:

 

 

Հուշ-ցերեկույթին հրավիրված էին Հայկազի սիրելի երգիչները՝ Սոնա Ռուբենյանն ու Գոռ Սուջյանը, որոնց կատարումները սիրում էր հերոսը. «Հայկազը շատ էր լսում Գոռ Սուջյանի երգերը, հատկապես երբ տխուր էր լինում: Նրա հեռախոսի երգացանկում տեսանք, որ հոկտեմբերի 13-ին՝ Արցախ տեղափոխվելուց մեկ օր առաջ, վերջին լսած երգը եղել է Արսեն Սաֆարյանի «Հերոս տղերք» երգը, որը հավանաբար ուժ է տվել նրան»:

 

 

Ցուցահանդեսին ցուցադրվել են Հայկազի զինվորական լուսանկարները, մարտի դաշտից բերված իրերն ու անգամ այն ԱԹՍ-ի բեկորը, որից նա վիրավորվել է:

 

Հայկազ Զավենի Մկրտչյանը հետմահու պարգևատրվել է ՀՀ նախագահի կողմից մարտական ծառայության հերթապահության շքանշանով:

Այլ նորություններ
ԳԻՏԱԿԱՆ ԹԵՄԱ. ԵՊՀ ԿԵՆՍԱԲԱՆՆԵՐՆ ՈՒՍՈՒՄՆԱՍԻՐԵԼՈՒ ԵՆ ՀԱԿԱՈՒՌՈՒՑՔԱՅԻՆ ԴԵՂԱՄԻՋՈՑՆԵՐԻ ՇԱՐՔԻՆ ՊԱՏԿԱՆՈՂ ՄԻԱՑՈՒԹՅՈՒՆՆԵՐ, ՈՐՈՆՔ ԱՐԳԵԼԱԿՈՒՄ ԵՆ ՈՒՌՈՒՑՔԻ ԱՃԸ
ԵՊՀ կենսաբանության ԳՀ ինստիտուտի կառուցվածքային կենսաֆիզիկայի միջֆակուլտետային գիտահետազոտական լաբորատորիայի անդամները ներկայացրել են «Հակաքաղցկեղային ալկիլացնող դեղերի համակցված ներգործությունը ԴՆԹ-ի կառուցվածքը և փաթեթավորումը կարգավորող ֆերմենտների ակտիվության վրա» գիտական թեման:
ԳԻՏԱԿԱՆ ԹԵՄԱ․ ՀԱՅԱՍՏԱՆԻ ՀԱՄԱՐ ԱՌԱՋԻՆ ԱՆԳԱՄ ՈՒՍՈՒՄՆԱՍԻՐՎԵԼՈՒ Է ՊԵՍՏԻՑԻԴՆԵՐԻ ՎՆԱՍԱԿԱՐ ԱԶԴԵՑՈՒԹՅՈՒՆԸ ՎԱՐԵԼԱՀՈՂԵՐԻ ՍՆՆԴԱՅԻՆ ՇՂԹԱՅԻ ՎՐԱ
ՀՀ ԿԳՄՍՆ գիտության կոմիտեն ֆինանսավորման է երաշխավորել «Պեստիցիդների կուտակումը և դրանց ազդեցությունը լեռնատափաստանային էկոհամակարգերի կենսաբազմազանության վրա» գիտական թեման: Այն ներկայացրել է ԵՊՀ կենսաբանության ֆակուլտետի բուսաբանության և սնկաբանության ամբիոնը: