Ապրիլի 18-ից 24-ը ԵՊՀ-ն իր դռներն է բացում Լ. Գումիլեւի անվան եվրասիական ազգային համալսարանի պատվիրակության առաջ: Ղազախստանի Աստանա քաղաքում գտնվող այս համալսարանի հետ Հայաստանի մայր բուհն առաջին անգամ չէ, որ համագործակցում է: Երկու համալսարանների ռեկտորներն անցյալ տարի ԵՊՀ-ում Ղազախական կենտրոնի բացման առիթով ստորագրեցին նաեւ համագործակցության հուշագիր:
ԵՊՀ գործընկեր համալսարանի պատվիրակության առաջին օրն այսօր մեկնարկեց ԵՊՀ պատմության թանգարանից, որտեղ հյուրերը ծանոթացան Մայր բուհի պատմությանն ու անցած ճանապարհին: «Ուզում եմ հայտնել մեր հիացմունքը ցուցադրության մտածված ու կուռ կառուցվածքի վերաբերյալ: Հատկապես տպավորիչ էր այն, որ համալսարանի պատմությունը ներկայացված է անձերի միջոցով` ռեկտորներ, հիմնադիրներ, դասախոսներ…»,- ԵՊՀ պատմության թանգարանի հուշամատյանում էքսկուրսիայից ստացած տպավորություններն այսպես մեկնաբանեցին ղազախական պատվիրակության հինգ անդամները: Պատվիրակության անդամներն այսօր կայցելեն նաեւ Հայաստանի մի շարք տեսարժան վայրեր, մասնավորապես Գոշավանք եւ Հաղպատի վանք: Երեկոյան Երեւան կժամանի նաեւ Եվրասիական ազգային համալսարանի ռեկտոր Բաքիտժան Աբդրաիմը:
Իսկ վաղը` ապրիլի 20-ին, վաղ առավոտից Երեւանի պետական համալսարանում կմեկնարկի միջազգային «Եվրասիականության գաղափարներ եւ հայ-ղազախական հարաբերությունները հին ժամանակներից մինչեւ մեր օրերը» խորագրով երկօրյա գիտաժողովը, որի ընթացքում հայ եւ ղազախ գիտնականները հանդես կգան մեկ տասնյակից ավելի թեմատիկ զեկույցներով:
