Այսօր ԵՊՀ իրավագիտության ֆակուլտետի դատական նիստերի դահլիճում տեղի ունեցավ ներֆակուլտետային դատախաղ-մրցույթ, որի նպատակն էր ուսանողության շրջանում բարձրացնել գործնական գիտելիքների մակարդակը, նպաստել նրանց մասնագիտական հմտությունների, վարքագծի, դատարանի հետ հաղորդակցվելու եղանակների ու մեթոդների զարգացմանը:
Նմանաբնույթ հանդիպումներն ուսանողների շրջանում ձեւավորում են դատական գործընթացային պատշաճ մասնակցության տարբեր տեսակի տակտիկական հնարքներ կիրառելու հմտություններ, ինչպես նաեւ նպաստում փակուղային թվացող իրավիճակներում արագ եւ ճիշտ կողմնորոշվելու փաստաբանական «հոտառություն» ձեռք բերելուն:
Մինչ դատավարության մեկնարկը Իրավագիտության ֆակուլտետի քրեական դատավարության եւ կրիմինալիստիկայի ամբիոնի վարիչ Սամվել Դիլբանդյանը ողջունեց ներկաներին՝ կարեւորելով նմանօրինակ դատախաղերի անցկացումը: Նա դատավարությանը ներկա գտնվող ուսանողներին խորհուրդ տվեց նշումներ անել՝ վերջում առաջարկներ ու նկատողություններ անելու համար:
Դատական գործընթացը սահուն ու հետաքրքիր անցավ, քանի որ 3-րդ կուրսի ուսանողները բավականին լավ էին պատրաստված: Եվ չնայած դատավորի կայացրած որոշման հետ ոչ բոլորն էին համաձայն, այնուամենայնիվ, ներկաները գոհ մնացին ե՛ւ դատավարության ընթացքից, ե՛ւ մասնակիցների պատրաստվածության աստիճանից:
«Չնայած սա մեր առաջին դատավարությունն էր, սակայն պետք է նշեմ, որ կողմերը շատ լավ էին պատրաստված, իսկ դատական գործընթացն էլ պատշաճ մակարդակով անցկացվեց, ինչի համար շնորհակալ եմ ե՛ւ հանդիպման կազմակերպիչներից, ե՛ւ մասնակիցներից»,- ասաց Սամվել Դիլբանդյանը: Դատավարության ընթացքից ու մասնակիցներից գոհ էր նաեւ դասախոս Արմեն Հարությունյանը. «Ողջունում եմ նախաձեռնությունը եւ ուզում եմ շնորհակալություն հայտնել մասնակիցներին դատավարությունը փայլուն անցկացնելու համար: Կողմերը պատշաճ մակարդակով ներկայացրին գործը: Ամեն ինչ գրագետ էր արված, ինչի համար շնորհավորում եմ ձեզ»:
Հանդիպման վերջում միջոցառման նախաձեռնող, Իրավագիտության ֆակուլտետի ՈՒԳԸ քարտուղար Նարինե Բաբայանը նշեց, որ նախատեսվում է հետագայում էլ այսպիսի դատախաղեր կազմակերպել՝ ուսանողների տեսական գիտելիքները գործնականում կիրառելու համար:
