04.10.2019 | 
Հասարակություն
ՀԱՅԱՍՏԱՆ ԱՅՑԵԼՈՒԹՅՈՒՆՆ ԱՅՆ ՓՈՐՁԱՌՈՒԹՅՈՒՆՆ Է, ՈՐՆ ԱՐԺԵ ԿՅԱՆՔՈՒՄ ԳՈՆԵ ՄԵԿ ԱՆԳԱՄ ՈՒՆԵՆԱԼ. ՕՏԱՐԵՐԿՐՅԱ ՈՒՍԱՆՈՂՆԵՐ
ՀԱՅԱՍՏԱՆ ԱՅՑԵԼՈՒԹՅՈՒՆՆ ԱՅՆ ՓՈՐՁԱՌՈՒԹՅՈՒՆՆ Է, ՈՐՆ ԱՐԺԵ ԿՅԱՆՔՈՒՄ ԳՈՆԵ ՄԵԿ ԱՆԳԱՄ ՈՒՆԵՆԱԼ. ՕՏԱՐԵՐԿՐՅԱ ՈՒՍԱՆՈՂՆԵՐ
Մարիոս Ռիթնինգեն Սալթվեդթը Հայաստան է եկել Նորվեգիայից: Նա և Ուզբեկստանից ժամանած Ջահոնգիռ Ալիմովը մասնակցել են ԵՊՀ կենսաքիմիայի, մանրէաբանության և կենսատեխնոլոգիայի ամբիոնի կազմակերպած մոլեկուլային մանրէաբանության և մանրէների էկոլոգիային նվիրված դասընթացներին:

Մարիոս Ռիթնինգենի խոսքով, Հայաստան կատարած ճամփորդությունն իր համար շատ հատկանշական էր, քանի որ նա հնարավորություն ստացավ այցելելու նախկինում իր համար անծանոթ երկիր:

«Ես պետք է խոստովանեմ, որ Հայաստանն այն երկիրը չէր, ուր կուզենայի արձակուրդներին այցելել, բայց հիմա շատ ուրախ եմ, որ հնարավորություն եմ ստացել այստեղ գալու և նոր մարդկանց հետ ծանոթանալու»,- նշեց նա:

Մարիոս Ռիթնինգենը խոստովանում է, որ այս ճամփորդությունն ամբողոջությամբ փոխել է իր պատկերացումները Հայաստանի ու հայերի մասին:

«Պետք է նշեմ, որ Նորվեգիայում մարդիկ շատ ճշտապահ են: Մեր օրակարգը հստակ սահմանված է: Եթե մենք ասում ենք՝ ժամը 9-ին կհանդիպենք, ուրեմն հանդիպումը կլինի հենց 9-ին»,- ասաց նորվեգացի ուսանողը՝ ժպտալով ավելացնելով, որ Հայաստանում ժամանակն ավելի ճկուն է՝ ժամը 9-ը միշտ չէ, որ նշանակում է ուղիղ ժամը 9-ը:

Մարիոս Ռիթնինգենին Հայաստանում ամենաշատը դուր են եկել մարդիկ, որոնք շատ պատրաստակամ և բարի են. «Ինձ դուր է գալիս նաև Երևանը, որը հին ու նոր ճարտարապետության յուրօրինակ խառնուրդ է»:

Նորվեգացի ուսանողի համար բացահայտում էր իր հայրենակցի՝ հայտնի բևեռախույզ և գիտնական Ֆրիտյոֆ Նանսենի մարդասիրական գործունեությունը:

«Նորվեգիայում մարդիկ ավելի շատ տեղյակ են նրա գիտական գործունեության մասին, իսկ Հայաստանում ես իմացա, թե Ֆ. Նանսենը նաև ինչպիսի մարդասիրական գործունեությամբ է զբաղվել և ինչքան հայերի է օգնել»,- ոգևորությամբ պատմեց նա:

 

Հայաստանում ստացած իր տպավորությունների մասին պատմեց նաև Ջահոնգիռ Ալիմովը, որի համար ամենամեծ մշակութային ցնցումը «Թավշյա հեղափոխության»-ը մասնակցելն էր. «Ես երկրորդ անգամ է, որ Հայաստան եմ այցելում: Առաջին անգամ, երբ Հայաստան եկա, օդանավակայանից մայրաքաղաք տանող ճանապարհը փակ էր: Սկզբից մենք մի քիչ վախեցանք, բայց մեզ ուղեկցող հայ պրոֆեսորն ասաց, որ պետք չէ վախենալ, քանի որ ցույցը խաղաղ է»:

Ջահոնգիռ Ալիմովի կարծիքով, Հայաստանում ապրող մարդիկ միշտ պատրաստ են դիմացինին օգնության ձեռք մեկնելու:

«Լաբորատորիայում, որտեղ ես հիմա աշխատում եմ, շրջապատված եմ բարի մարդկանցով, որոնք ինձ շատ են օգնում, ինչը ես բարձր եմ գնահատում»,- ասաց Ջահոնգիռ Ալիմովը:

 

Խոսելով Երևանի մասին՝ վերջինս առանձնացրեց քաղաքի մարդաշատությունը. «Ինձ դուր է գալիս, որ այստեղ ամեն քայլափոխի տեսնում ես զբոսնող մարդկանց, նույնիսկ երբ արդեն շատ ուշ է, բացի դրանից՝ քաղաքը հարուստ է տեսարժան վայրերով, օրինակ՝ Կասկադն ու Հանրապետության հրապարակը»:

Ուզբեկ ուսանողը շատ տպավորված է նաև դուդուկով. «Անտարբեր չեմ կարողանում անցնել դուդուկի հնչյունների կողքով: Շատ եմ սիրում հայկական այդ ազգային գործիքը»:

Վերջում երկու ուսանողներն էլ նշեցին, որ Հայաստան այցելությունն այն փորձառությունն է, որն արժե կյանքում գոնե մեկ անգամ ունենալ:

 

Անի Պողոսյան

Այլ նորություններ
ՀՆԴԿԱԳԻՏՈՒԹՅԱՆ ԶԱՐԳԱՑՄԱՆ ՆՈՐ ՀԵՌԱՆԿԱՐՆԵՐ ԵՊՀ-ՈՒՄ. ԳԵՂԱՄ ԳԵՎՈՐԳՅԱՆԸ ՀՅՈՒՐԸՆԿԱԼԵԼ Է ԴԵՍՊԱՆԻՆ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր իր աշխատասենյակում ընդունել է ՀՀ-ում Հնդկաստանի արտակարգ և լիազոր դեսպան Ն. Գ. պարոն Կիշան դան Դեվալին, որի հետ քննարկել է համագործակցության ոլորտները և ուղիները:
ՀՀ-ՈՒՄ ՀՈՒՆԱՍՏԱՆԻ ԴԵՍՊԱՆՈՒԹՅՈՒՆՆ ԱՋԱԿՑՈՒՄ Է ԵՊՀ ՀՈՒՆԱԳԻՏՈՒԹՅԱՆ ԳԻՏԱՈՒՍՈՒՄՆԱԿԱՆ ԿԵՆՏՐՈՆ-ԳՐԱԴԱՐԱՆԻՆ
ԵՊՀ ռեկտորի ժամանակավոր պաշտոնակատար Գեղամ Գևորգյանն այսօր իր աշխատասենյակում ընդունել է ՀՀ-ում Հունաստանի արտակարգ և լիազոր դեսպան Ն. Գ. տիկին Նաֆսիկա Նանսի Էվա Վրայլային, որի հետ քննարկել է ԵՊՀ-ում հունարենի ուսուցման արդյունավետությանն ուղղված աշխատանքներ: