05.01.2023 | 
Ուսանողական, Կրթություն, Գիտություն
«ՊԵՏՔ Է ՁԵՌՔ ՊԱՐԶԵԼ ԵՎ ԸՆԴՈՒՆԵԼ ԵՊՀ ԸՆՁԵՌԱԾ ԼԱՅՆ ՀՆԱՐԱՎՈՐՈՒԹՅՈՒՆՆԵՐԸ». ԵՊՀ ՈՒՍԱՆՈՂ ԲԻԱՅՆԱ ՄԽՉՅԱՆ
«ՊԵՏՔ Է ՁԵՌՔ ՊԱՐԶԵԼ ԵՎ ԸՆԴՈՒՆԵԼ ԵՊՀ ԸՆՁԵՌԱԾ ԼԱՅՆ ՀՆԱՐԱՎՈՐՈՒԹՅՈՒՆՆԵՐԸ». ԵՊՀ ՈՒՍԱՆՈՂ ԲԻԱՅՆԱ ՄԽՉՅԱՆ
ԵՊՀ արևելագիտության ֆակուլտետի ուսանող Բիայնա Մխչյանը փոխանակման ծրագրով սովորում է Հորդանանում: Բիայնայի հետ զրուցել ենք բուհի ընտրության, ֆակուլտետում ստացած կրթության, Ամանորն արտասահմանում հայկական ավանդույթներով նշելու մասին:

Պատմում է ինքը՝ Բիայնան:

 

Դեռ վաղ տարիքից բուհի և մասնագիտության ընտրությունը միանշանակ էր:

 

Վստահ էի, որ ընդունվելով ԵՊՀ՝ կդառնամ ոլորտում պահանջված մասնագետներից մեկը: Սիրելով և հետաքրքրված լինելով Արևելքով, մասնավորապես արաբական մշակույթով և լեզվով՝ ընտրեցի արաբագիտությունը: Ֆակուլտետում ուսանելիս հնարավորություն ստացա սովորելու արտասահմանում:

 

Հորդանանում մեծ դժվարությունների չեմ բախվել. այս հարցում մեծ է ԵՊՀ դերակատարումը:

 

Մինչ Հորդանան գալը թե՛ լեզվի, թե՛ մշակույթի, թե՛ կենցաղային հարցերում կյանքն այստեղ ավելի բարդ էի պատկերացնում, սակայն, կարելի է ասել, մեծ դժվարությունների չեմ հանդիպել: Վստահաբար ասում եմ, որ դրան նպաստել են մի շարք գործոններ (տեղի հայ ընկերներս, բնակիչների ջերմ հյուրընկալությունը և այլն), որոնցից առանցքային է նաև ԵՊՀ տված կրթության ու պրոֆեսորադասախոսական կազմի դերը: Արաբերենի իմացության բարձր մակարդակը, որը ձեռք եմ բերել ԵՊՀ-ում սովորելիս, այստեղ միանգամից գրավում է շատ տեղացիների ուշադրությունը և արժանանում հիացմունքի։

 

Լեզվակիրների հետ հաղորդակցվելը լեզվի զարգացման գործում առանցքային է. ԵՊՀ-ն տալիս է այդ հնարավորությունը:

 

Արդեն ավարտել եմ ուսումնական մեկ կիսամյակը: Չորս ամիսները եղել են բավականին բովանդակալից ու գիտելիքաշատ: Կարծում եմ՝ բացի նոր գիտելիքներ ստանալուց՝ փոխանակման ծրագրերը ամենաարդյունավետ տարբերակներից են այլ երկրների մշակույթը բացահայտելու, նոր կապեր ու ծանոթություններ հաստատելու տեսանկյունից: Այսօրինակ ծրագրերը նաև նպաստում են Հայաստանում արաբագիտության զարգացմանը:

 

 

 

ԵՊՀ-ն ընձեռում է լայն հնարավորություններ, պարզապես պետք է կարողանալ օգտվել դրանցից:

 

ԵՊՀ տված գիտելիքները ինչպես ներկայիս, այնպես էլ ապագայի իմ հաջողություններում ունեն և ունենալու են հիմնարար նշանակություն: ԵՊՀ-ն կառույց է, որտեղ կյանքի են կոչվում սահմանված բազմաթիվ նպատակներ: Այն տալիս է մասնագիտական կայուն զարգացման և աշխատաշուկայում պահանջված մասնագետ դառնալու հնարավորություն: Պարզապես պետք է ձեռք պարզել և միշտ ընդունել ԵՊՀ-ի ընձեռած լայն հնարավորությունները …

 

Ամանորը նշել եմ հայ ընկերներիս հետ հայկական ավանդույթներով ….

 

Բավականին հետաքրքիր էր Ամանորը նշել մշակութային ու կրոնական տարբերություններ ունեցող երկրում, չնայած՝ երկու երկրների միջև կան նաև նմանություններ: Ամանորին հայկական ավանդական ուտեստներ պատրաստելով՝ կարողացել ենք գրավել տեղացիների ուշադրությունը և հետաքրքրություն առաջացնել հայկական մշակույթի նկատմամբ: Սա լավագույն հնարավորություններից է նաև օտարերկրացիների շրջանում հայկական մշակույթը տարածելու և ճանաչելի դարձնելու:

 

Համալսարանականներին մաղթում եմ, որ ….

 

Նոր տարին մասնագիտական նորանոր գիտելիքների և ձեռքբերումների տարի լինի։ Պետք է միշտ քայլել դեպի երազանք տանող ճանապարհով` առանց դժվարություններից երկյուղելու և նորն ու օգտակարը սովորելու ձգտումով․․․

Մարինե Մկրտչյան

Այլ նորություններ
«ՄՐՑՈՒՅԹՆԵՐՆ ՈՒՍԱՆՈՂԻ ՀԱՄԱՐ ՀԻԱՆԱԼԻ ԱՌԻԹ ԵՆ ՎԵՐԱՐԺԵՎՈՐԵԼՈՒ ՍԵՓԱԿԱՆ ԿԱՐՈՂՈՒԹՅՈՒՆՆԵՐԸ». ԱՇՈՏ ՄԿՐՅԱՆ
ԵՊՀ հայ բանասիրության ֆակուլտետի ուսանող Աշոտ Մկրյանը մագիստրոսի կրթական ծրագրով «Լավագույն ուսանող» հանրապետական մրցույթի հայագիտական ոլորտում 2-րդ տեղի մրցանակակիր է: Աշոտի հետ զրույցը ուղենշում է, թե ինչ ճանապարհ է անհրաժեշտ անցնել լավագույն ուսանող ճանաչվելու համար:
ԻՆՉՊԵ՞Ս ԴԻՄԵԼ «ԷՐԱԶՄՈՒՍ+» ՓՈԽԱՆԱԿՄԱՆ ԾՐԱԳՐԻՆ. ՈՒՂԵՑՈՒՅՑ
ԵՊՀ ուսանողներն ու ասպիրանտները յուրաքանչյուր կրթական աստիճանում հնարավորություն ունեն մեկ անգամ մասնակցելու «Էրազմուս+» փոխանակման ծրագրին և կրթություն ստանալու եվրոպական մի շարք բուհերում։ Ընդհանուր ուսումնառության ժամկետը չի կարող լինել 3 ամսից պակաս և 12 ամսից ավելի: