23.11.2022 | 
Ուսանողական, Կրթություն
ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂԸ ԿԱԶՄՈՒՄ Է «ԳՐԱԲԱՐԻ ԴԱՍԱԳԻՐՔ ՏԱՐՐԱԿԱՆ ԴԱՍԱՐԱՆՆԵՐԻ ՈՒՍՈՒՑԻՉՆԵՐԻ ՀԱՄԱՐ»
ՀԱՅ ԲԱՆԱՍԻՐՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂԸ ԿԱԶՄՈՒՄ Է «ԳՐԱԲԱՐԻ ԴԱՍԱԳԻՐՔ ՏԱՐՐԱԿԱՆ ԴԱՍԱՐԱՆՆԵՐԻ ՈՒՍՈՒՑԻՉՆԵՐԻ ՀԱՄԱՐ»
ԵՊՀ հայ բանասիրության ֆակուլտետի հայոց լեզվի պատմության և ընդհանուր լեզվաբանության ամբիոնի և Գիտական հետազոտությունների զարգացման կենտրոնի միջև կնքվել է փոխգործակցության հուշագիր, որի շրջանակում ֆակուլտետի ուսանող Էլեն Միրաքյանն աշխատանքի է անցել «Մխիթարեան նախակրթարան» զարգացման կենտրոնում: Էլենի հետ զրուցել ենք ներկայիս գործունեության, ԵՊՀ-ի տված կրթության ու ընձեռած հնարավորությունների և այլ թեմաների շուրջ:

Պատմում է Էլենը:

 

Ընդունվել եմ ԵՊՀ՝ վայրկյան իսկ չերկմտելով:

 

Ոգեշնչված լինելով Հայաստանի առաջին համալսարանում կրթություն ստացած մեծանուն գիտնականների գործունեությամբ՝ վստահ էի, որ միայն ԵՊՀ-ում կարող են արդարանալ սպասելիքներս՝ կապված կրթության և նպատակներիս իրագործման հետ: Հայ բանասիրության ֆակուլտետը եղել է իմ երազանքների կրթօջախը, մասնագիտությունս էլ մի ամբողջ կյանք է ինձ համար։ Վստահ եմ՝ լավ հայագետի ձեռքում է մարդու սիրտն ու հոգին բարեփոխող ներկապնակը:

 

 

ԵՊՀ-ն հիմնովին փոխել է իմ կյանքը:

 

ԵՊՀ-ում ձեռք եմ բերել բազմաթիվ ընկերներ, վայելել եմ ուսանողական-գիտական ակտիվ կյանք՝ միաժամանակ ստանալով մասնագիտական որակյալ կրթություն և գրանցելով անընդհատական աճ: Համալսարանում, հատկապես հայ բանասիրության ֆակուլտետում ընդլայնվում է մտահորիզոնդ, քանի որ այնտեղ դասավանդում են գիտելիք մատուցելու արվեստին տիրապետող այնպիսի գիտնականներ ու դասախոսներ, որոնց հետ շփումն օրավուր տասնապատկում է գիտելիքդ:

 

Համալսարանում ստացած բազմաբովանդակ գիտելիքի շնորհիվ ես, ուսումս դեռ չավարտած, ստացել եմ աշխատանքի առաջարկ:

 

Քանի դեռ սովորում եմ բակալավրի կրթական ծրագրում, «Մխիթարեան նախակրթարան» զարգացման կենտրոնում ներկայացված եմ որպես օգնական-պրակտիկանտ, իսկ համալսարանն ավարտելուց հետո կընդլայնվի գործունեությանս շրջանակը։ Աշխատանքի առաջարկն ստացել եմ ԵՊՀ հայ բանասիրության ֆակուլտետի հայոց լեզվի պատմության և ընդհանուր լեզվաբանության ամբիոնի և Գիտական հետազոտությունների զարգացման կենտրոնի միջև կնքված հուշագրի շրջանակում, ըստ որի՝ կողմերը միավորում են իրենց ջանքերն ընթացիկ հետազոտական աշխատանքներում ուսանողների ներգրավվածության ապահովման նպատակով։ Իսկ ես դեռևս առաջին և միակ ուսանողն եմ այդ ձևաչափում։

 

 

Կյանքը զարգանում է գիտության շնորհիվ։

 

Իմ համոզմամբ՝ չկա գիտություն, չկա բանականություն։ Գիտության զարգացման շնորհիվ մեր երկիրը կարող է հաստատուն տեղ ու դեր ունենալ աշխարհում։ Հայագիտության մեջ իմ ներդրումն ունենալու նպատակով ներգրավվել եմ ֆակուլտետի ՈՒԳԸ աշխատանքներում՝ ստանձնելով ընդհանուր հարցերի հանձնաժողովի պատասխանատուի պարտականությունները։

 

Պատրաստվում եմ ավարտական աշխատանքիս պաշտպանությանը:

Ավարտական աշխատանքիս թեման չափազանց պարտավորեցնող է և առանձնահատուկ. պրոֆեսոր, բ.գ.դ. Աննա Աբաջյանի ղեկավարությամբ կազմելու ենք «Գրաբարի դասագիրք տարրական դասարանների ուսուցիչների համար», որը դառնալու է իր տեսակի մեջ նորագյուտ Իրական (Ռեալական) դպրոցի՝ մեր ոսկեղենիկ գրաբարը հայ մանուկներին սովորեցնող ուսուցչի սեղանի գիրքը:

 

Նպատակս է արժանի լինել բանասերի վեհ կոչմանը:

 

Ոլորտով հետաքրքրված բոլոր դիմորդներին միանշանակ խորհուրդ եմ տալիս առանց երկմտելու ընդունվել ԵՊՀ հայ բանասիրության ֆակուլտետ: Իմ կյանքի առանցքային կառույցի՝ ԵՊՀ-ի շնորհիվ, ձեռք բերելով մեծ փորձառություն և աշխատաշուկայում մրցունակ մասնագետ լինելու համար գիտելիքի առավելագույն պաշար, հասկացել եմ, որ երբեք չպետք է երկնչել, իսկ եթե նահանջել, ապա միայն ուժ հավաքելու և մեծ վճռականությամբ առաջ շարժվելու համար։

 

Կարինե Հովհաննիսյան

Այլ նորություններ
«ԹՎԱՅԻՆ ՄԱՐՔԵԹԻՆԳԻ ԴԵՐԸ ԲԻԶՆԵՍՈՒՄ» ԽՈՐԱԳՐՈՎ ՎԱՐՊԵՏՈՒԹՅԱՆ ԴԱՍ ԵՊՀ-ՈՒՄ
ԵՊՀ տնտեսագիտության և կառավարման ֆակուլտետում կառավարման և գործարարության ամբիոնի և «SSB Academy»-ի նախաձեռնությամբ անցկացվեց վարպետության դաս, որի հիմնական նպատակն էր ուսանողներին տալ պրակտիկ գիտելիք և հմտություններ:
ԿԱՅԱՑԵԼ Է «ՀԱՅԱՍՏԱՆԸ, ՄԻԱՑՅԱԼ ՆԱՀԱՆԳՆԵՐԸ ԵՎ ՏԱՐԱԾԱՇՐՋԱՆԱՅԻՆ ՓՈԽԱԿԵՐՊՈՒՄՆԵՐԸ ԵՎՐԱՍԻԱՅՈՒՄ. ԱՆԴՐԱԶԳԱՅԻՆ ՓՈԽԸՄԲՌՆՄԱՆ ԸՆԴԼԱՅՆՈՒՄ» ԽՈՐԱԳՐՈՎ ԳԻՏԱԺՈՂՈՎԻ ԵՐԿՐՈՐԴ ՆԻՍՏԸ
Ս․թ․ դեկտեմբերի 3-ին ԵՊՀ գիտխորհրդի նիստերի դահլիճի նախասրահում տեղի է ունեցել կլոր սեղան-քննարկում ԵՊՀ-ի և Արիզոնայի պետական համալսարանների կազմակերպած և ԵՊՀ Ամերիկյան հետազոտությունների կենտրոնի գործունեության շրջանակում իրականացվող միջազգային գիտաժողովի շրջանակում։