17.12.2019 | 
Հասարակություն
«ԱՌԱՋԻՆ ԱՆԳԱՄ ԱՐՎԱԾ ԽՈՍՏՈՎԱՆՈՒԹՅՈՒՆՆ ԱՄՈՒՍՆՈՒԹՅԱՆ ԱՌԱՋԱՐԿՆ ԷՐ». ՀԱՄԱԼՍԱՐԱՆԱԿԱՆ ՊԱՏՄՈՒԹՅՈՒՆՆԵՐ. ՍԱՐԳԻՍ ՔԵԼՅԱՆ, ՆԱՐԻՆԵ ԱԲԻԳՈՆՅԱՆ
«ԱՌԱՋԻՆ ԱՆԳԱՄ ԱՐՎԱԾ ԽՈՍՏՈՎԱՆՈՒԹՅՈՒՆՆ ԱՄՈՒՍՆՈՒԹՅԱՆ ԱՌԱՋԱՐԿՆ ԷՐ». ՀԱՄԱԼՍԱՐԱՆԱԿԱՆ ՊԱՏՄՈՒԹՅՈՒՆՆԵՐ. ՍԱՐԳԻՍ ՔԵԼՅԱՆ, ՆԱՐԻՆԵ ԱԲԻԳՈՆՅԱՆ
ԵՊՀ աշխարհագրության և երկրաբանության ֆակուլտետի դեկանի տեղակալ Սարգիս Քելյանի և կնոջ՝ նույն ֆակուլտետի շրջանավարտ Նարինե Աբիգոնյանի հանդիպման ճակատագրական վայրը եղել է ԵՊՀ-ն:

«ԵՊՀ-ն մեր հանդիպման ճակատագրական վայրն էր, որտեղ առաջին քայլերը զուտ ընկերական էին»:

 

«Ես և Նարինեն սովորում էինք Երկրաբանության ամբիոնում՝ մեկ տարվա տարբերությամբ,- պատմում է Ս. Քելյանը և նշում,- ուսանողական տարիներին մտքովս անգամ չէր անցնում, որ բուհն ավարտելուն պես մեր ճանապարհները կարող են հատվել»:

 

Ճակատագրական հանդիպումը տեղի է ունենում տարիներ անց, երբ Սարգիս Քելյանը պատահմամբ հայտնվում է այն վայրում, որտեղ աշխատում էր Նարինեն:

 

«Միշտ պատկերացրել եմ, որ իմ երկրորդ կեսը պետք է լինի ուժեղ, գործունյա, նպատակասլաց. հետևելով Նարինեին՝ հասկացա, որ իմ այսքան փնտրտուքների արդյունքը նա պետք է լինի»,- ասում է Ս. Քելյանը:

 

Ահա այսպիսի «դիտավորությամբ» էլ Ս. Քելյանի այցելությունները Նարինեի աշխատավայր հաճախակի են դառնում: 

«Մի օր Նարինեին հրավիրեցի սուրճ խմելու, ստացա դրական պատասխան, որն էլ դարձավ իմ հետագա քայլերի անցաքարտը»,- անկեղծանում է դեկանի տեղակալը:

 

Իսկ Նարինեն պարզաբանում է. «Թե ինչպես համաձայնեցի դուրս գալ զբոսնելու, ես էլ չհասկացա, ինձանից անկախ ստացվեց»:

 

«Առաջին անգամ արված խոստովանությունն ամուսնության առաջարկն էր»:

 

Ս. Քելյանն ասում է, որ սիրո խոստովանություններ հաճախ չի անում, իսկ առաջին խոստովանությունն այնքան յուրահատուկ է եղել, որ մշտապես մնալու է իրենց հիշողություններում: 

 

«Իմ խոստովանությունները լինում են ոչ թե բառերով, այլ վերաբերմունքով և ուշադրությամբ: Մի օր առաջարկեցի քաղաքից դուրս գնալ, գնացինք Դիլիջան զբոսնելու, Հաղարծինի վանքում մոմ վառելիս գրպանիցս հանեցի մեր ամուսնության մատանիները և առաջարկություն արեցի: Նարինեն համաձայնեց. կարծում եմ՝ այդ օրը երբեք չենք մոռանա»,- պատմում է Ս. Քելյանը:

«Ինձ գրավեց Սարգիսի պարզությունը, ազնվությունն ու անկեղծությունը, շատ արագ սկսեցի վստահել նրան, ինչն էլ դարձավ իմ համաձայնության պատճառը»,- անկեղծանում է Նարինեն: 

 

Ահա, հենց այսպես էլ սկիզբ դրվեց ընտանեկան մի գեղեցիկ պատմության:

 

 

«Մեր ընտանեկան խաղաղ կյանքի բանաձևը միմյանց զիջելն ու մշտապես հասկանալն է»:

 

Զույգը նշում է, որ ցանկացած դժվարություն իրենք հաղթահարում են՝ միմյանց զիջելով և ընդհանուր հայտարարի գալով:

 

Նարինեի խոսքով, միասին շատ դժվարություններ են հաղթահարել, ինչն իրենց ավելի ամուր և անկոտրում է դարձրել:

 

«Երբ դու դժվարության ժամանակ քեզ սիրող մարդու կողքին ես լինում, հավատացեք, որ ավելի են ամրապնդվում և ուժեղ դառնում հարաբերությունները»,- խոստովանում է Նարինեն:

 

«Ամեն ինչ պլանավորում և ստեղծում ենք միասին, և այդ ամբողջ ընթացքում մեր նախասիրություններն ու կարծիքները համընկնում են, ուստի դժվարություններն էլ հաղթահարելի են դառնում»,- նշում են նրանք:

 

«Նարինեն պատրաստում է շատ համեղ, չնայած որ իմ սիրած ուտեստների տեսականին այդքան էլ մեծ չէ»:

 

Այսպես է մեկնաբանում Ս. Քելյանը և նշում, որ այդ առումով իր բախտը բերել է:

 

Կինն էլ ասում է. «Ուտելու առումով բավականին պահանջկոտ է, համեղ ուտելիքներ շատ է սիրում, ասում է՝ համեղ եմ պատրաստում, և սիրում է այն ամենը, ինչը պատրաստված է մսով»:

 

«Սիրելի են բոլոր այն վայրերը, որտեղով մենք քայլել, խոսել ու կիսվել ենք մեր ապրած հիշողություններով ու ապրելիք պահերով»:

 

Զույգը նշում է, որ սիրում է Երևանով զբոսնել, բայց հիմա այդ հնարավորությունը չունի, քանի որ իրենց փոքրիկ աղջնակը՝ Աննան, «թույլ չի տալիս»:

 

 

«Մենք երջանիկ ենք մեր ստեղծած ընտանիքով և մեր փոքրիկ դստերով՝ Աննայով, որն ամբողջական է դարձրել մեր ընտանեկան երջանկությունը»,- ամփոփեցին զրույցն ամուսինները:

 

 

 

Պատրաստեց Անգին Խաչատրյանը

 

Այլ նորություններ
ԵՊՀ-ՈՒՄ ՄԻՋԱՆԿՅԱԼ ՔՆՆՈՒԹՅՈՒՆՆԵՐԸ  ՉԵՆ ՉԵՂԱՐԿՎԻ.  ՏԵՂԻ Է ՈՒՆԵՑԵԼ ԳԻՏԱԿԱՆ ԽՈՐՀՐԴԻ ԱՐՏԱՀԵՐԹ ՆԻՍՏ
ԵՊՀ գիտական խորհրդի որոշմամբ առաջին ընթացիկ (միջանկյալ) քննությունները կանցկացվեն նոյեմբերի 2-7-ը, իսկ հարգելի հիմնավորում ունեցող բացականերին կընձեռվի հնարավորություն դրանք հանձնելու իրենց համար սահմանված ժամկետում:
«ԱՅՍՕՐ ՀԱՅՈՑ ՊԱՏՄՈՒԹՅՈՒՆԸ ԿԵՐՏԵԼՈՒ ՄԵՐ ԺԱՄԱՆԱԿՆ Է». ԱՆՈՒՇԱՎԱՆ ԵՊԻՍԿՈՊՈՍ ԺԱՄԿՈՉՅԱՆԻ ՈՒՂԵՐՁԸ
Մայր Աթոռ Սուրբ Էջմիածնի Միաբան Անուշավան եպիսկոպոս Ժամկոչյանը հանդես է եկել հայ ժողովրդին ուղղված ուղերձով, որում նշվում է, որ այսօր մեզ է վիճակված համամարդկային չարիքին դիմագրավելու պատիվը։