15.10.2021 | 
Հասարակություն
ԳՈՐԾԸՆԿԵՐ ՀԱՄԱԼՍԱՐԱՆՆԵՐԻ ՄԻՋԵՎ ՀԱՄԱԳՈՐԾԱԿՑՈՒԹՅՈՒՆՆ ԱՄՐԱՊՆԴՎՈՒՄ Է. ԵՊՀ ՌԵԿՏՈՐԻ Ժ.Պ.-Ի ՀՅՈՒՐՆ ԷՐ ԳԵՈՐԳԻ ՇԱՐՎԱՇԻՁԵՆ
ԳՈՐԾԸՆԿԵՐ ՀԱՄԱԼՍԱՐԱՆՆԵՐԻ ՄԻՋԵՎ ՀԱՄԱԳՈՐԾԱԿՑՈՒԹՅՈՒՆՆ ԱՄՐԱՊՆԴՎՈՒՄ Է. ԵՊՀ ՌԵԿՏՈՐԻ Ժ.Պ.-Ի ՀՅՈՒՐՆ ԷՐ ԳԵՈՐԳԻ ՇԱՐՎԱՇԻՁԵՆ
ԵՊՀ ռեկտորի ժամանակավոր պաշտոնակատար Հովհաննես Հովհաննիսյանն այսօր իր աշխատասենյակում ընդունել է Իվանե Ջավախիշվիլու անվան Թբիլիսիի պետական համալսարանի ռեկտոր Գեորգի Շարվաշիձեին:

Հանդիպմանը ներկա էին ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանն ու Միջազգային համագործակցության վարչության պետ Ալեքսանդր Մարգարովը:

 

 

«Ուրախ ենք ողջունելու ձեզ Մայր բուհում: Վրաստանի բուհերի հետ համագործակցությունը տարիների պատմություն ունի, ուստի, շարունակելով բարի ավանդույթները, կարող ենք համատեղ ծրագրեր մշակել և ավելի ամրապնդել մեր ակադեմիական ու բարեկամական կապերը»,- ասաց Հովհաննես Հովհաննիսյանը:

 

Գեորգի Շարվաշիձեն հաստատեց, որ ԵՊՀ-ի հետ առկա համագործակցությունը նոր մակարդակի բարձրացնելու ժամանակն է. «Երևանի պետական համալսարանի հետ բազմաթիվ ծրագրեր ունենք, մենք ներգրավված ենք նաև միջազգային նախագծերում: Կարծում եմ, որ հարկ է աշխատել համատեղ գիտական ծրագրերի ստեղծման ուղղությամբ:

Իսկ ձևաչափը որոշելու և առավել մանրամասն քննարկում կազմակերպելու համար մինչև տարեվերջ ակնկալում ենք ձեր այցելությունը Թբիլիսիի պետական համալսարան»:

 

 

Ռեկտորները քննարկեցին համալսարաններում իրականացվող բարեփոխումների, գիտաուսումնական ծրագրերի, միջազգային համագործակցության վերաբերյալ մի շարք հարցեր, ինչպես նաև առկա որոշ խնդիրներ:

 

Հանդիպման ավարտին Հովհաննես Հովհաննիսյանն ու Գեորգի Շարվաշիձեն փոխանակվեցին հուշանվերներով և պայմանավորվեցին առաջիկայում կրկին հանդիպել՝ քննարկելու համագործակցության ամրապնդմանն ուղղված նոր ծրագրեր:

 

Վարդուհի Զաքարյան

Այլ նորություններ
ՏԵՂԻ Է ՈՒՆԵՑԵԼ «ՉԻՆԱՍՏԱՆ ԵՎ ՀԱՅԱՍՏԱՆ. ԿԱՌԱՎԱՐՈՒՄ ԵՎ ԲԱՐՁՐՈՐԱԿ ՀԱՄԱԳՈՐԾԱԿՑՈՒԹՅՈՒՆ «ՄԵԿ ԳՈՏԻ, ՄԵԿ ՃԱՆԱՊԱՐՀ» ՆԱԽԱՁԵՌՆՈՒԹՅԱՆ ՇՐՋԱՆԱԿՈՒՄ» ԹԵՄԱՅՈՎ ԳԻՏԱԺՈՂՈՎ
Հայ-չինական համատեղ նախաձեռնությամբ տեղի է ունեցել «Չինաստան և Հայաստան. կառավարում և բարձրորակ համագործակցություն «Մեկ գոտի, մեկ ճանապարհ» նախաձեռնության շրջանակում» խորագրով առցանց գիտաժողովը:
ԵՂԻՇԵ ԿԻՐԱԿՈՍՅԱՆԸ ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԻ ՀԱՄԱՐ ՀԱՆԴԵՍ Է ԵԿԵԼ ԲԱՆԱԽՈՍՈՒԹՅԱՄԲ
ԵՊՀ իրավագիտության ֆակուլտետի ՈՒԳԸ-ի նախաձեռնությամբ այսօր «Միջազգային իրավական գործընթացներն Արցախի հակամարտության շուրջ» խորագրով բանախոսությամբ է հանդես եկել Մարդու իրավունքների եվրոպական դատարանում ՀՀ ներկայացուցիչ, իրավ. գիտ. թեկնածու Եղիշե Կիրակոսյանը: