19.11.2021 | 
Հասարակություն
ԵՊՀ-Ն ԵՎ «ԳՐԱՆԹ ԹՈՐՆԹՈՆ ՀԱՅԱՍՏԱՆ» ՓԲԸ-Ն ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ ԵՆ ԿՆՔԵԼ
ԵՊՀ-Ն ԵՎ «ԳՐԱՆԹ ԹՈՐՆԹՈՆ ՀԱՅԱՍՏԱՆ» ՓԲԸ-Ն ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ ԵՆ ԿՆՔԵԼ
ԵՊՀ ռեկտորի ժամանակավոր պաշտոնակատար Հովհաննես Հովհաննիսյանը և «Գրանթ Թորնթոն» ՓԲԸ-ի տնօրեն Արմեն Հովհաննիսյանն այսօր համագործակցության հուշագիր են կնքել:

Հուշագրի կնքումը միտված է ՀՀ-ում կրթության զարգացմանն ու արդյունավետության բարձրացմանը:

 

Հանդիպմանը ներկա էին նաև ԵՊՀ միջազգային համագործակցության և հասարակայնության հետ կապերի գծով պրոռեկտոր Արթուր Իսրայելյանն ու ԵՊՀ շրջանավարտների և կարիերայի կենտրոնի տնօրեն Լիլիթ Հակոբյանը:

 

 

 «Գործատուների ու դաշտի առաջատար կազմակերպությունների հետ մենք հուշագրեր ենք ստորագրում մեր ուսանողների համար առավելագույնս լավ պայմաններ ստեղծելու և նրանց պրակտիկան ապահովելու համար: Հույս ունեմ, որ այս փոխգործակցությունը երկարատև և շարունակական է լինելու՝ ներառելով տարբեր ուղղություններ»,- ասաց Հովհաննես Հովհաննիսյանը:

 

 

Նշենք, որ հուշագիրը կնքվել է ԵՊՀ շրջանավարտների և կարիերայի կենտրոնի առաջարկությամբ: Այն հնարավորություն է տալու ուսանողներին կիրառելու տեսական գիտելիքները և ձեռք բերելու գործնական հմտություններ ու փորձ: Համագործակցությունը նաև աջակցելու է երիտասարդ մասնագետներին աշխատանքի որոնման հարցում, ինչպես նաև խթանելու է ուսանողների և ոլորտի մասնագետների միջև պարբերական մասնագիտական շփումներն ու երկխոսության ձևավորումը:

 

«Ուրախ ենք, որ հնարավորություն ենք ստացել Մայր բուհի հետ ընդլայնելու մեր համագործակցությունը: Ներկայումս թվային տեխնոլոգիաների զարգացման արդյունքում մի նոր ժամանակաշրջան է սկսվում, և մտավոր ծառայությունների արտահանման նոր հնարավորություններ են ի հայտ գալիս: Մեր աշխատանքի ընթացքում հիմնականում բախվում ենք մարդկային ռեսուրսների ոչ բավարար լինելու խնդրին: Ուստի համագործակցության մեջ ես կարևորում եմ այն հանգամանքը, որ հնարավորություն ենք ստանալու ուսանողների հետ աշխատելու նախքան նրանց շրջանավարտ դառնալը»,- ասաց Արմեն Հովհաննիսյանը:

 

 

ԵՊՀ ռեկտորի ժ.պ.-ն էլ ընդգծեց, որ կադրային ոլորտում իսկապես խնդիր կա, ուստի գործատու-բուհ կապը պետք է ամրապնդել և ընդլայնել. «Իրապես, աշխատանքային շուկայի պահանջները շատ արագ են փոփոխվում, ուստի կրթությունը երբեմն չի կարողանում լիարժեք բավարարել այդ պահանջները: Պրակտիկան այն դաշտն է, որը կադրերին հնարավորություն է տալիս հարմարվելու ու համապատասխանելու աշխատանքային շուկայի նոր պահանջներին»:

 

Համագործակցության հուշագրի համաձայն՝ «Գրանթ Թորնթոն Հայաստանը» ԵՊՀ բակալավրիատի 4-րդ կուրսի և մագիստրատուրայի ուսանողներին հնարավորություն է տալու ուսումնական պրակտիկա անցնելու կազմակերպությունում: Իսկ պրակտիկան հաջողությամբ ավարտած ուսանողները հնարավորություն են ունենալու աշխատանքի անցնելու «Գրանթ Թորնթոն Հայաստանի» համապատասխան մասնագիտացմամբ թափուր հաստիքների առկայության դեպքում:

 

Նախատեսվում են նաև համալսարանի ուսանողների, դասախոսների և աշխատակազմի համար հետաքրքրություն ներկայացնող թեմաներով դասախոսություններ կազմակերպել, սեմինարներ, կլոր սեղան-քննարկումներ վարել և այլ միջոցառումներ իրականացնել:

Այլ նորություններ
ԵՊՀ-ԳՈՐԾԱՐԱՐ ԱՇԽԱՐՀ ԿԱՊՆ ԱՄՐԱՊՆԴՎՈՒՄ Է․ ԿՆՔՎԵԼ Է ՀԱՄԱԳՈՐԾԱԿՑՈՒԹՅԱՆ ՀՈՒՇԱԳԻՐ
ԵՊՀ ռեկտոր Հովհաննես Հովհաննիսյանն այսօր «Երեմյան Փրոջեքթս» ընկերության գլխավոր տնօրեն Դավիթ Երեմյանին հանձնել է շնորհակալագիր՝ ԵՊՀ-ում տեղի ունեցած «Կիրառական քիմիա. էքսպո 2022» միջոցառումը կազմակերպելու գործում ունեցած ներդրման և աջակցության համար։ Հ. Հովհաննիսյանը և Դ. Երեմյանն այսօր նաև ստորագրել են համագործակցության հուշագիր՝ իրավաբանորեն ամրագրելով երկու կառույցների միջև առկա համագործակցությունը։
ԵՊՀ-Ն ԼԱՎԱԳՈՒՅՆ ԱՐԺԵՔՆԵՐԻ ԵՎ ԱՎԱՆԴՈՒՅԹՆԵՐԻ ՍՏԵՂԾՈՂ Է․ ՏԵՂԻ ՈՒՆԵՑԱՎ ԵՊՀ ՇՐՋԱՆԱՎԱՐՏՆԵՐԻ ԱՎԱՐՏԱԿԱՆ ՀԱՆԴԻՍԱՎՈՐ ՄԻՋՈՑԱՌՈՒՄԸ
Մայր բուհի պատմության մեջ առաջին անգամ Ա. Սպենդիարյանի անվան օպերայի և բալետի ազգային ակադեմիական թատրոնի համերգասրահում տեղի ունեցավ ԵՊՀ շրջանավարտների ավարտական հանդիսավոր միջոցառումը, որի ընթացքում գիտական աստիճան ստացած շրջանավարտներին հանձնվեցին վկայագրեր։