09.02.2009 | 
Կրթություն
«ՔԻՄԻԱՆ ՖՈՒՆԴԱՄԵՆՏԱԼ ԳԻՏՈՒԹՅՈՒՆ Է»
«ՔԻՄԻԱՆ ՖՈՒՆԴԱՄԵՆՏԱԼ ԳԻՏՈՒԹՅՈՒՆ Է»
ԵՊՀ քիմիայի ֆակուլտետի ֆիզիկական եւ կոլոիդ քիմիայի ամբիոնը նշանակալից ներդրում է ունեցել քիմիայի բնագավառում:

2008 թվականի վերջին Գերմանիայում արդեն 6-րդ անգամ հրատարակվող «Landolt Börnstein» տեղեկագրքում իր տեղն է գտել Ֆիզիկական եւ կոլոիդ քիմիայի ամբիոնի կողմից ուսումնասիրված «Դիէթիլսուլֆօքսիդ» օրգանական նյութը, որն աչքի է ընկնում ինչպես ֆիզիկաքիմիական առանձնահատկություններով, այնպես էլ կենսաբժշկական նշանակությամբ:

 

Նույն ամբիոնի վարիչ, քիմ. գիտ. դոկտոր, պրոֆեսոր Շիրազ Մարգարյանը նշեց, որ այս տեղեկագրքում տպագրվելն ուշադրության արժանի փաստ է, քանի որ աշխարհի մակարդակով հայտնի դարձան ոչ միայն ԵՊՀ-ն, Ֆիզիկական եւ կոլոիդ քիմիայի ամբիոնը, այլեւ մատնանշվեց Հայաստան երկրի անունը: «Այս նյութի ուսումնասիրումը թիմային լուրջ աշխատանք է, որտեղ ներգրավված են եղել Ֆիզիկական եւ կոլոիդ քիմիայի ամբիոնի երիտասարդ գիտնականները:

 

Եթե ինտերնետում փորձենք փնտրել «Դիէթիլսուլֆօքսիդ» օրգանական նյութը, ապա համակարգչի էկրանին կհայտնվեն մեր ամբիոնի գիտնականների ազգանունները: Մեր ամբիոնը լուրջ հաջողություններ չի կարող ունենալ, եթե չլինեն գիտական դրամաշնորհները: Սրանց արդյունքում է, որ ամբիոնի լաբորատորիաները համալրվում են նոր, ժամանակակից սարքավորումներով, նյութատեխնիկական բազայով»,- ասում է Շիրազ Մարգարյանը:

 

ԵՊՀ քիմիայի ֆակուլտետի ֆիզիկական եւ կոլոիդ քիմիայի ամբիոնը մասնակցում է Ամերիկայի հայ օգնության ֆոնդի ներքո գործող «Գիտության եւ կրթության հայկական ազգային հիմնադրամի» (ԳԿՀԱՀ) կողմից կազմակերպված գիտական դրամաշնորհների մրցույթին: Այս տարի հանդիսացել է «Արմեն Ավանեսյանց» դրամաշնորհի հաղթող: Ւ դեպ, այս մրցույթին ամբիոնը մասնակցում է արդեն երկրորդ անգամ. 2006 թվականին եւս ՀՕՖ-ի կողմից կազմակերպած նույն մրցույթի հաղթող է դարձել:

 

Շիրազ Մարգարյանը կարծում է, որ մեր փոքրիկ երկրի համար կարեւոր է, որպեսզի ֆինանսավորման ներկայացվող յուրաքանչյուր գիտական ծրագիր պրոֆեսիոնալ մոտեցման արժանանա, գրախոսության համար ընդգրկվեն նաեւ արտասահմանյան մասնագետներ, քանի որ փորձագիտությունից է սկսում լուրջ աշխատանքների գնահատումը: Իսկ երիտասարդ գիտնականներին եւ ուսանողներին պարոն Մարգարյանը խորհուրդ տվեց ավելի պատասխանատվությամբ վերաբերել քիմիային. «Այն ֆունդամենտալ գիտություն է, կապող օղակ է ֆիզիկայի եւ կենսաբանության միջեւ»:

Այլ նորություններ
ՄԻՋԱԶԳԱՅԻՆ ԽՈՐՀՐԴԱՐԱՆԱԿԱՆ ԿՐԹԱԹՈՇԱԿ  ԵՊՀ ՈՒՍԱՆՈՂՆԵՐԻ ՀԱՄԱՐ
ԵՊՀ միջազգային համագործակցության վարչության և ՀՀ-ում Գերմանիայի դեսպանության համատեղ ջանքերով կազմակերպվեց տեղեկատվական հանդիպում Գերմանիայի Բունդեսթագի «Միջազգային խորհրդարանական կրթաթոշակ (ՄԽԿ)» ծրագրի վերաբերյալ։
ԱՇԽԱՏԱՆՔԻ ԱՌԱՋԱՐԿ ՊԱՏԵՐԱԶՄԻ ՄԱՍՆԱԿԻՑ ԵՊՀ ՈՒՍԱՆՈՂՆԵՐԻ ՀԱՄԱՐ
ԵՊՀ շրջանավարտների և կարիերայի կենտրոնը համագործակցում է ՀՀ աշխատանքի և սոցիալական հարցերի նախարարության հետ, որը մշակել է մասնագիտական ուսուցման կազմակերպման և զբաղվածության ապահովման ծրագիր՝ պատերազմի մասնակից ուսանողներին աշխատանք գտնելու հարցում օժանդակելու համար։