27.03.2007 | 
Ուսանողական
ԿՐԹՈՒՄ ԵՆ ԱՊԱԳԱ ԼԻԴԵՐՆԵՐԻՆ
ԿՐԹՈՒՄ ԵՆ ԱՊԱԳԱ ԼԻԴԵՐՆԵՐԻՆ
«Իմ մեջ նոր որակներ բացահայտեցի, որոնց մասին մինչ այդ չգիտեի»:

Երեւանի պետական համալսարանի ուսխորհրդի փոխնախագահ Գրիգոր Գրիգորյանը այդ մասին խոստովանեց Ծաղկաձորի «Համալսարան» ուսումնաարտադրական բազայում կազմակերպված դասընթացին մասնակցելուց հետո: Մարտի 9-ին ԵՊՀ ուսանողական բաժնի նախաձեռնությամբ մեկնարկեց «Առաջնորդություն եւ ուսանողական աշխատանքների կազմակերպման հիմունքները» խորագրով ուսուցողական դասընթացը:

«Նմանատիպ դասընթացները ուսանողական շրջանում հասարակական ակտիվությունը բարձրացնելու ամենաարդյունավետ միջոցներից են,- ասաց Ուսանողական բաժնի վարիչ Միհրան Հակոբյանը: - Սրանք շարունակական բնույթ են ունենալու, ու կարծում եմ` դրանց արդյունքում ուսանողների շփումները կակտիվանան»:

Նա նշեց նաեւ, որ եվրոպական երկրներում նման դասընթացները համարվում են ոչ ֆորմալ կրթության ձեւ ու շատ ընդունելի են, Հայաստանի կառավարությունն էլ ունի ոչ ֆորմալ կրթության հայեցակարգ:

Մարտի 23-25-ը դասընթացի հաջորդ փուլն էր` նոր մասնակիցներով: Վերջիններս ընտրվել են հատուկ հարցաթերթիկների միջոցով: «Մենք ընտրում ենք ոչ թե լավագույններին, այլ նրանց, ովքեր ուզում են ակտիվ հասարակական աշխատանք ծավալել, սակայն ինչ-ինչ խնդիրներ ունեն այդ ոլորտում: Վստահ եմ, որ դասընթացը կօգնի նրանց հաղթահարել այդ դժվարությունները»,- հավելեց Միհրան Հակոբյանը:

Մասնակիցները թիմերի են բաժանվում եւ պրոֆեսիոնալ խմբավարների օգնությամբ որոշակի առաջադրանքներ կատարում: Նախատեսված են դասախոսություններ լիդերության, ուսանողների իրավունքների եւ պարտականությունների, ուսանողական կառույցների գործունեության վերաբերյալ: Դասախոսում են ԵՊՀ ռեկտորի օգնական, հոգեբան Դավիթ Հայրապետյանը, Իրավաբանական բաժնի վարիչ Արմեն Թադեւոսյանը, Ուսանողական բաժնի վարիչ Միհրան Հակոբյանը:

Գրիգորի համար ամենահետաքրքիր հարցերից մեկը ուսանողական կոդեքսի ստեղծումն է, որ դարձյալ ուսանողական բաժնի նախաձեռնությունն է: «Ուսանողական կոդեքս ունենալը շատ կարեւոր է բոլորիս համար: Աշխարհի առաջատար բոլոր բուհերն ունեն նման փաստաթուղթ, մենք էլ պետք է ուսանողի իրավունքների եւ պարտականությունների մասին այս փաստաթղթի մշակմանը լուրջ վերաբերվենք»,- ասաց ուսխորհրդի փոխնախագահը:

Դասընթացի ավարտին մասնակիցները գնահատման թերթիկներ են լրացնում, ուր գնահատում են թիմակիցներին ու դասախոսներին, դիտողություններ ու առաջարկներ անում: «Առաջին անգամ մշակութային մասի կազմակերպման գործում բացթողումներ ունեինք, բայց երկրորդին կարողացանք պայմանավորվել Հայաստանի կոմպոզիտորների միության նախագահ Ռոբերտ Ամիրխանյանի հետ, ով հաճույքով հանդիպեց մասնակիցներին»:

Դասընթացի արդյունքում ձեւավորվում է թիմային մտածելակերպ, ու մասնակիցները պատրաստ են միմյանց հետ աշխատել անգամ ծաղկաձորյան պայմաններից դուրս:

Այլ նորություններ
«ՏԱՐԱԾԱՇՐՋԱՆԱՅԻՆ ԱՆՎՏԱՆԳՈՒԹՅՈՒՆ. ՀՀ ՍՊԱՌՆԱԼԻՔՆԵՐԸ ՀԵՏՊԱՏԵՐԱԶՄՅԱՆ ՇՐՋԱՆՈՒՄ» ԽՈՐԱԳՐՈՎ ՀԱՆԴԻՊՈՒՄ ՏԻԳՐԱՆ ԱԲՐԱՀԱՄՅԱՆԻ ՀԵՏ
ՈՒԽ Լ. Ազգալդյանի անվան մարտական ակումբն այսօր ԵՊՀ գիտխորհրդի նիստերի դահլիճում կազմակերպել էր հանդիպում «Հենակետ» վերլուծական կենտրոնի ղեկավար Տիգրան Աբրահամյանի հետ:
ԵՎՐՈՊԱՅԻ ՉԵՄՊԻՈՆՆԵՐԸ՝ ԵՊՀ ԺՈՒՌՆԱԼԻՍՏԻԿԱՅԻ ՖԱԿՈՒԼՏԵՏՈՒՄ
Երևանի պետական համալսարանի Չարենցի անվան դահլիճում այսօր տեղի է ունեցել հանդիպում Եվրոպայի չեմպիոններ, վերջերս Բուդապեշտում ընթացող ազատ ոճի ըմբշամարտի վարկանիշային մրցաշարի ոսկե մեդալակիրներ և այս տարվա ամռանը Տոկիոյում կայանալիք 32-րդ ամառային օլիմպիական խաղերի ուղեգրեր նվաճած ազատ ոճի ըմբիշներ Արսեն Հարությունյանի և Վազգեն Թևանյանի հետ։