23.04.2014 | 
Ուսանողական
ՀԱՅՈՑ ՄԵԾ ԵՂԵՌՆԻ 99-ՐԴ ՏԱՐԵԼԻՑԻՆ ԸՆԴԱՌԱՋ
ՀԱՅՈՑ ՄԵԾ ԵՂԵՌՆԻ 99-ՐԴ ՏԱՐԵԼԻՑԻՆ ԸՆԴԱՌԱՋ
Այսօր ԵՊՀ կենտրոնական մասնաշենքի ճեմասրահում տեղի ունեցավ Հայոց ցեղասպանության 99-րդ տարելիցին նվիրված մոմավառություն՝ ի հիշատակ 1.5 միլիոն անմեղ զոհերի։

Արդեն 6 տարի է, ինչ ԵՊՀ ուսանողական խորհրդի նախաձեռնությամբ մի շարք համալսարանականներ, իրենց ձեռքերով վառելով մոմերը, աստիճանների վրա կազմում են Եղեռնի համապատասխան տարելիցի թվանշանը։ Այս տարի նույնպես ուսանողները ոչ միայն մոմերով գրել էին 99 թիվը, այլև ստեղծել էին յուրօրինակ խաչ։

 

«Միջոցառման հիմնական խորհուրդը ևս մեկ անգամ ոգեկոչելն է Ցեղասպանության զոհերին։ Յուրաքանչյուր տարի, երբ ուսանողներն ընդունվում են համալսարան, հենց առաջին կուրսում փորձում են յուրովի մոտենալ այս խորհրդին։ Մոմավառությունից անմիջապես հետո մենք կուղևորվենք Ազատության հրապարակ, այնուհետև կքայլենք դեպի Ծիծեռնակաբերդ մեր բողոքի ձայնը բարձրացնելու Թուրքիայի այն քաղաքականության դեմ, որը վարվում է առ այսօր ու շարունակությունն է Հայոց ցեղասպանության»,- ասաց ԵՊՀ ուսանողների հետ տարվող աշխատանքների բաժնի վարիչ Վահագն Վարագյանը։

 

Մոմավառությանը մասնակցում էին ոչ միայն համալսարանական կառույցների ակտիվ մասնակիցները, այլև տարբեր ֆակուլտետների ուսանողներ, պրոֆեսորադասախոսական անձնակազմի ներկայացուցիչներ։

 

Մոմավառությունից հետո համալսարանականները մասնակցեցին նաև ամենամյա ջահերով երթին։ Այս տարի ևս ԵՊՀ-ականները առանձնահատուկ էին պատրաստվել։ Նրանցից շատերն անձամբ էին պլաստմասե շշերից մոմակալներ պատրաստել, պաստառներ գրել և մեծ ու փոքր դրոշներ կարել։

 

Ակտիվ համալսարանականները Ազատության հրապարակից ջահերով քայլեցին դեպի Ծիծեռնակաբերդի հուշահամալիր ու միացան հայության այն մեծ խմբին, ովքեր տարիներ շարունակ ապրիլի 23-ը օգտագործում են որպես մի առիթ իրենց ձայնն ու կարծիքը լսելի դարձնելու համար։

 

Հայ բանասիրության ֆակուլտետի մագիստրատուրայի 2-րդ կուրսի ուսանողուհի Անի Աբրահամյանը նշեց, որ իր համար այս նախաձեռնությունը փոքրիկ քայլ է «ցեղասպանություն» երևույթը մոռացության չտալու հարցում. «15 տարի առաջ ոչ ոք չէր էլ պատկերացնում, որ ջահերով երթը համահայկական բնույթ է կրելու։ Եռագույնն ու դատապարտման պաստառները ձեռքերին՝ ազգային երգերի ուղեկցությամբ հաճախ վառվող ջահերով ու բողոքի անդադար վանկարկումներով այսօր նաև աշխարհի շատ երկրներում կարող ենք տեսնել երիտասարդների, որոնցից շատերն օտարության մեջ են ծնվել»։

 

Նշենք նաև, որ վաղը՝ ապրիլի 24-ին, վաղ առավոտյան Մայր բուհի ղեկավարությունը, ուսանողությունն ու պրոֆեսորադասախոսական կազմի ներկայացուցիչները, ավանդույթի համաձայն, կայցելեն Ծիծեռնակաբերդ՝ ծաղիկներ և ծաղկեպսակներ դնելու հուշարձանի մոտ` ի հիշատակ անմեղ նահատակների:

Այլ նորություններ
«ԱՅՍՕՐ ԱՄԵՆ ԻՆՉ ՊԵՏՔ Է ԱՆԵՆՔ, ՈՐ ԱՐԵՎԱՅԻՆ ԷՆԵՐԳԵՏԻԿԱՆ ՀԱՅԱՍՏԱՆՈՒՄ ԶԱՐԳԱՆԱ». ՀԱՅ-ՌՈՒՍԱԿԱՆ ՀԱՄԱԼՍԱՐԱՆԻ ԴՈՑԵՆՏ ՎԼԱԴԻՄԻՐ ԳԵՎՈՐԳՅԱՆ
ԵՊՀ ռադիոֆիզիկայի, ֆիզիկայի ու տնտեսագիտության և կառավարման ֆակուլտետների ուսանողներն այսօր այցելեցին Հայ-ռուսական (Սլավոնական) համալսարան:
ԲԱՐՁՐԱՁԱՅՆԱԾ ԽՆԴԻՐՆԵՐ, ԴՐԱՆՑ ԼՈՒԾՄԱՆ ՄԵԽԱՆԻԶՄՆԵՐ ԵՎ ՆՈՐ ԱՌԱՋԱՐԿՆԵՐ. ԻՆՖՈՐՄԱՏԻԿԱՅԻ ԵՎ ԿԻՐԱՌԱԿԱՆ ՄԱԹԵՄԱՏԻԿԱՅԻ ՖԱԿՈՒԼՏԵՏԻ ԴԵԿԱՆԸ ՀԱՆԴԻՊԵԼ Է ՈՒՍԱՆՈՂՆԵՐԻ ՀԵՏ
ԵՊՀ ինֆորմատիկայի և կիրառական մաթեմատիկայի ֆակուլտետի ՈւԽ-ի նախաձեռնությամբ այսօր տեղի ունեցավ ուսանողների հանդիպումը ֆակուլտետի դեկան Վահրամ Դումանյանի հետ: