12.05.2007 | 
Կրթություն
«ՀՆԵՐԸ» ԽՐԱԽՈՒՍՈՒՄ ԵՆ «ՆՈՐԵՐԻՆ»
«ՀՆԵՐԸ» ԽՐԱԽՈՒՍՈՒՄ ԵՆ «ՆՈՐԵՐԻՆ»
«Բեմի մի կողմից բարձրանում եք, մյուսից` իջնում եւ «հարստացած» զբաղեցնում ձեր տեղերը»:

Հումորով ասված այս տեխնիկական հրահանգը վերաբերում էր ուսանողներին, ովքեր մայիսի 11-ին հավաքվել էին Երեւանի պետական համալսարանի մեծ դահլիճում: Հայ օգնության ֆոնդը դրամաշնորհ էր նախատեսել Հայաստանի եւ Լեռնային Ղարաբաղի բուհերի 100 լավագույն ուսանողների համար:

ՀՕՖ-ի իրականացրած կրթական բարեգործական ծրագրերից մեկը` «Կրթական դրամաշնորհ» կոչվող ծրագիրը, իրականացվում է ԵՊՀ շրջանավարտ Աշոտ Հայրապետյանի նախաձեռնությամբ եւ հովանավորությամբ: Վերջինս 1996-99թթ. գերազանցությամբ ավարտել է ԵՊՀ ինֆորմատիկայի եւ կիրառական մաթեմատիկայի ֆակուլտետը, այնուհետեւ մեկնել ԱՄՆ` ուսումը շարունակելու: 1999-ին Աշոտ Հայրապետյանը մասնակցել է Սան Ֆրանցիսկոյի մի կազմակերպության հայտարարած նմանատիպ մրցույթին եւ հաղթել:

«Տարիներ հետո, ահա, հենց Աշոտ Հայրապետյանն է մեր ուսանողների համար նման մրցույթ նախաձեռնում: Հուսանք, որ այսօր մրցանակի արժանացած ուսանողները տարիներ հետո իրենք կսատարեն երիտասարդներին, ուսանողներին»,- ասաց ՀՕՖ-ի հայաստանյան մասնաճյուղի տնօրեն Բագրատ Սարգսյանը:

Նա տեղեկացրեց, որ մրցույթին հայտ է ներկայացրել 650 ուսանող: Նրանք հարցաթերթիկ են լրացրել, իրենց մասնագիտության եւ ապագայի մասին շարադրություն են գրել, հետո մասնակցել են հարցազրույցին: «Հաղթողներն, իրոք, տաղանդավոր ուսանողներ են. բոլորի միջին գնահատականը 4,5-ից ավելի է: Կան հանրապետական եւ միջազգային օլիմպիադաների բազում հաղթողներ, 5-6 գիտական հոդվածներ ունեցող ուսանողներ,- ասաց ծրագրի հեղինակ Աշոտ Հայրապետյանը:- Այսքանով ծրագիրը չի ավարտվի, եւ մենք նախատեսում ենք հաղթող ուսանողների հետ պարբերական հանդիպումներ կազմակերպել»: 

Մրցույթի հաղթող են ճանաչվել 45 ուսանողներ ԵՊՀ-ից, 15-ը` ԵրՊՏՀ-ից, 15-ը` Արցախի պետական համալսարանից, 12-ը` ՀՊՃՀ-ից, 4-ը` Ռուս-հայկական (Սլավոնական) եւ 4-ը` Գավառի պետական համալսարաններից, 3-ը` Երեւանի պետական մանկավարժական համալսարանից, 1-ը` ԵրՃՇՊՀ-ից եւ 1 ուսանող ՀՊՃՀ-ի Գյումրու մասնաճյուղից: 

«Շատ ուրախ եմ... Բայց ուրախ եմ ոչ այնքան դրամական պարգեւի (50 հազար դրամ), որքան այն բանի, որ իմ աշխատանքը, ձգտումները եւ նպատակները կիսում են այլ մարդիկ, օգնում են ինձ: Բացի այն, որ գերազանցիկ եմ, նաեւ օլիմպիադայի հաղթող եմ, “Երիտասարդ տնտեսագետ” պարբերականի գլխավոր խմբագիրն եմ եւ ուսխորհրդի անդամ»,- ասաց ԵՊՀ տնտեսագիտության ֆակուլտետի հաղթողներից մեկը` Տիգրան Աբովյանը: 

ԵՊՀ ռեկտոր Արամ Սիմոնյանը վստահ է, որ բարեգործությունը մեր երկիր թեեւ դանդաղ, բայց հաստատուն քայլերով է մուտք գործում: «ՀՕՖ-ի հետ ԵՊՀ-ի համագործակցությունը արդեն երկար պատմություն ունի: Բայց խնդիրը միայն նյութական օժանդակությունը չէ: Երեւույթը շատ կարեւոր է, քանի որ գնահատվում է մարդու ձիրքը, կարողությունը, աշխատելու ունակությունը»,- նկատեց ԵՊՀ ռեկտորը:

Այլ նորություններ
ԵՊՀ ՌՈՒՍ ԲԱՆԱՍԻՐՈՒԹՅԱՆ ՖԱԿՈՒԼՏԵՏՆ ԱՆՈՒՄ Է ԱՄԵՆ ՀՆԱՐԱՎՈՐԸ՝ ՀԵՌԱՎԱՐ ՈՒՍՈՒՑՈՒՄԸ ՊԱՏՇԱՃ ԻՐԱԿԱՆԱՑՆԵԼՈՒ ՀԱՄԱՐ
ՀՀ տարածքում արտակարգ դրություն հայտարարելու որոշմամբ պայմանավորված՝ ԵՊՀ ֆակուլտետներն իրականացնում են առցանց ուսուցում՝ ուսումնական գործընթացի երկարատև ընդհատումից խուսափելու համար։
«ՖԱԿՈՒԼՏԵՏՈՒՄ ԱՄԲՈՂՋ ԾԱՎԱԼՈՎ ԻՐԱԿԱՆԱՑՎՈՒՄ ԵՆ ՆԱԽԱՏԵՍՎԱԾ ԲՈԼՈՐ ԴԱՍԵՐԸ». ԻՐԱՎԱԳԻՏՈՒԹՅԱՆ ՖԱԿՈՒԼՏԵՏՆ ԱՄՓՈՓԵԼ Է ՆԱԽՈՐԴ ՇԱԲԱԹՎԱ ԸՆԹԱՑՔՈՒՄ ԻՐԱԿԱՆԱՑՎԱԾ ՀԵՌԱՎԱՐ ՈՒՍՈՒՑՄԱՆ ԳՈՐԾԸՆԹԱՑԸ
Այսօր տեղի է ունեցել ԵՊՀ իրավագիտության ֆակուլտետի դեկանատի ընդլայնված հեռավար նիստ՝ դեկանի, դեկանի տեղակալների, ամբիոնների վարիչների, լաբորանտների, առկա և հեռակա ուսուցման բակալավրիատի և մագիստրատուրայի բոլոր կուրսերի ու խմբերի ավագների մասնակցությամբ։