16.09.2021 | 
Հասարակություն
ԵՊՀ-Ն ՇԱՐՈՒՆԱԿՈՒՄ Է ՀՅՈՒՐԸՆԿԱԼԵԼ ԴՊՐՈՑԱԿԱՆՆԵՐԻՆ. ԹԻՎ 105 ԱՎԱԳ ԴՊՐՈՑԻ ԱՇԱԿԵՐՏՆԵՐԸ՝ ԵԼՀ ՖԱԿՈՒԼՏԵՏՈՒՄ
ԵՊՀ-Ն ՇԱՐՈՒՆԱԿՈՒՄ Է ՀՅՈՒՐԸՆԿԱԼԵԼ ԴՊՐՈՑԱԿԱՆՆԵՐԻՆ. ԹԻՎ 105 ԱՎԱԳ ԴՊՐՈՑԻ ԱՇԱԿԵՐՏՆԵՐԸ՝ ԵԼՀ ՖԱԿՈՒԼՏԵՏՈՒՄ
ԵՊՀ մինչհամալսարանական կրթության վարչության նախաձեռնությամբ այսօր մասնագիտական կողմնորոշման նպատակով Եվրոպական լեզուների և հաղորդակցության ֆակուլտետ էին այցելել Երևանի թիվ 105 ավագ դպրոցի հումանիտար հոսքի աշակերտները:

Ֆակուլտետում աշակերտներին դիմավորեց Անգլիական բանասիրության ամբիոնի վարիչ, ԳԱԱ թղթակից անդամ Սեդա Գասպարյանը: Հանդիպմանը ներկա էր նաև ԵԼՀ ֆակուլտետի դեկանի տեղակալ Մանե Յաղուբյանը:

 

Սեդա Գասպարյանը, ողջունելով աշակերտներին, նախ խնդրեց խոսել նրանց ձգտումների, հեռահար նպատակների, դեպի ԵՊՀ ձգտելու պատճառների մասին:

 

10-րդ դասարանի աշակերտուհի Նոնա Մանուկյանն ասաց, որ ցանկանում է ստանալ արդի ու պահանջարկ ունեցող մասնագիտություն, ապա՝ աշխատել այդ մասնագիտությամբ. «Նպատակ ունեմ ընդունվելու համալսարան, կարծում եմ՝ այսօրվա հանդիպումից հետո կկողմնորոշվեմ մասնագիտության ընտրության հարցում»:

 

Ամբիոնի վարիչն իր հերթին դպրոցականներին պատմեց, թե ինչպես է առաջին անգամ լսել ԵՊՀ-ի մասին. «Երբ ես դեռ 2-րդ դասարանի աշակերտ էի, մի առիթով հորս հետ անցնում էինք համալսարանի առջևի փողոցով, հայրս մատնացույց արեց համալսարանի շենքը և մեծ ակնածանքով ու պատկառանքով, որի մեջ խորը գնահատական կար համալսարանի նկատմամբ, ասաց. «Եթե ընդունվես այստեղ, ուրեմն ինձ համար ամենաընդունելի զավակը կլինես»: Այդ խոսքերի մեջ այնքան հարգանք ու վստահություն կային, որ դաջվեցին իմ մտքում ու առ այսօր չեն ջնջվել»:

 

Սեդա Գասպարյանը հումանիտար հոսքի աշակերտներին պատմեց բանասիրության՝ որպես գիտության ծագման, սահմանման, նշանակության մասին. «Բանասիրությունն անհատի, հասարակության վերաբերմունքն է բառի նկատմամբ»:

 

«Յուրաքանչյուր ազգ ունի իր յուրահատկությունը, որը ձևավորվել և ամրակայվել է, դարձել է նաև մտածողություն տվյալ ազգի համար հենց լեզվի միջոցով»,- ընդգծեց տիկին Գասպարյանը՝ փորձելով բացատրելով, թե ինչ շատ կարևոր մասնագիտության արահետի վրա են ուզում դպրոցականները կանգնել, և դա որքան անհրաժեշտ է ու օգտակար:

 

Ապա ամբիոնի վարիչը ներկայացրեց ֆակուլտետի պատմությունը, կառուցվածքը, մասնագիտությունները, ընձեռած հնարավորություններն ու միջազգային համագործակցությունը, արտերկրում իրենց ուսանողների գրանցած հաջողությունները:

 

10-րդ դասարանի դասղեկ, աշխարհագրության ուսուցչուհի Անուշ Գրիգորյանը մեզ հետ զրույցում ասաց, որ աշակերտների մեծ մասը նպատակ ունի ընդունվելու Մայր բուհ և մասնագիտանալու լեզուների ուղղությամբ. «Աշակերտներն այստեղ են եկել որպես ապագա դիմորդ՝ ծանոթանալու այն տեղին ու պայմաններին, որտեղ ապագայում ցանկանում են սովորել»:

 

Հասմիկ Ասլանյան

Այլ նորություններ
ԿՅԱՆՔԻՑ ՀԵՌԱՑԵԼ Է ԵՊՀ ԵՎՐՈՊԱԿԱՆ ԼԵԶՈՒՆԵՐԻ ԵՎ ՀԱՂՈՐԴԱԿՑՈՒԹՅԱՆ ՖԱԿՈՒԼՏԵՏԻ ԳԵՐՄԱՆԱԿԱՆ ԲԱՆԱՍԻՐՈՒԹՅԱՆ ԱՄԲԻՈՆԻ ՎԱՐԻՉ, ՊՐՈՖԵՍՈՐ ՅՈՒՐԻԿ ԳԱԲՐԻԵԼՅԱՆԸ
Երևանի պետական համալսարանը կրել է ցավալի կորուստ: Կորոնավիրուսի հետևանքով մահացել է ԵՊՀ եվրոպական լեզուների և հաղորդակցության ֆակուլտետի գերմանական բանասիրության ամբիոնի վարիչ, պրոֆեսոր Յուրիկ Գաբրիելյանը:
ՀԱՅԿԱԿԱՆ ԱՐՏԱԴՐԱՆՔՆԵՐԻ ԱՐՏԱՀԱՆՄԱՆ ՀՆԱՐԱՎՈՐՈՒԹՅՈՒՆՆԵՐԸ. ՀԱՆԴԻՊՈՒՄ-ՔՆՆԱՐԿՈՒՄ ՏՆՏԵՍԱԳԻՏՈՒԹՅԱՆ ԵՎ ԿԱՌԱՎԱՐՄԱՆ ՖԱԿՈՒԼՏԵՏՈՒՄ
ԵՊՀ կառավարման և գործարարության ամբիոնի նախաձեռնությամբ այսօր Տնտեսագիտության և կառավարման ֆակուլտետի ավարտական կուրսի ուսանողները հանդիպել են «ՌեԱրմենիա» հարթակի տնօրեն Գևորգ Պողոսյանի հետ և քննարկել ստարտափերի ձևավորման ու զարգացման հեռանկարները և համաշխարհային շուկայում ներկայանալու հնարավորությունները: