05.04.2013 | 
Հասարակություն
ՍԿՍՎԵԼ Է ՄԵՐՕՐՅԱ ԳՐԱԿԱՆՈՒԹՅԱՆ ՀԱՄԱԿԱՐԳՈՒՄԸ
ՍԿՍՎԵԼ Է ՄԵՐՕՐՅԱ ԳՐԱԿԱՆՈՒԹՅԱՆ ՀԱՄԱԿԱՐԳՈՒՄԸ
ԵՊՀ-ում այսօր մեկնարկել է «Ժամանակակից հայ արձակի հիմնախնդիրները» խորագրով գիտաժողովը:

ԵՊՀ-ի, Հայաստանի գրողների միության ու Համազգային հայ կրթական և մշակութային հիմնադրամի համատեղ կազմակերպած գիտաժողովի առաջին օրն անցավ համալսարանում, իսկ 2-րդ օրվա զեկուցումները կներկայացվեն Ծաղկաձորում` Գրողների ստեղծագործական տանը: Նմանօրինակ միջոցառում կազմակերպվում է արդեն 6-րդ անգամ:

 
Ինչպես նշում է Համազգային հայ կրթական և մշակութային հիմնադրամի նախագահ Լիլիթ Գալստյանը, նախկինում անդրադարձել են կոնկրետ հեղինակների, իսկ այս անգամ թեման ավելի ընդգրկուն է` դաշտն ավելի լավ տեսնելու համար: «Դասական գրականությանն ընթերցողը շատ թե քիչ ծանոթ է, իսկ ընթացիկ գրականությանը քիչ են առնչվում: Նպատակն է զրույց բացել, քննարկել, գնահատականներ ու պարզաբանումներ լսել: Շատ դժվար է գնահատել ժամանակակից գրականությունը, որովհետև այն ընթացքի մեջ է: Հետևաբար զեկույցները չեն կարող 100%-անոց պատասխաններ պարունակել, բայց որոշ երևույթներ, որոնք ընդհանրական են դարձել, կմեկնաբանվեն»,- ասում է Հայ բանասիրության ֆակուլտետի դեկան Արծրուն Ավագյանը:


Գիտաժողովին մասնակցելու հայտ է ներկայացրել 40 հոգի. երկու օրերի ընթացքում կհնչի 22 զեկույց: Իրենք` մասնակիցներն էլ են կարծում, որ այսօրվա գրողների և նրանց ստեղծած գրականության սպառողների միջև բաց տարածություն է առաջացել: Ուստի նպատակներից մեկն էլ նոր ընթերցողներ գտնելն է. ի վերջո, գիտաժողովի դահլիճում ներկա էին ուսանողներ, ովքեր նոր են ծանոթանում արդի գրականությանը: Մեկ վայրում էին հավաքվել այն մարդիկ, ովքեր ևս ներգրավված են գրականության ստեղծման գործընթացում` գրականագետները, գրաքննադատները, ինչու չէ` նաև ընթերցողները:


«Հուսով եմ` կծավալվի իրական բանավեճ, բայց` ոչ այն բանավեճը, որն առկա է այսօրվա գրական մամուլում, և որը դառնում է հայհոյախոսություն: Ամեն բանախոս փորձում է իր հայհոյանքով ամփոփել բանավեճը: Ուզում եմ հավատալ, որ մեր երկօրյա քննարկումները տալու են և՛ մերօրյա արձակի պատկերը, և՛ մատնանշելու են հիմնախնդիրները, և՛ լուծումները»,- բացման խոսքում նշեց Հայաստանի գրողների միության նախագահ Լևոն Անանյանը:


Կազմակերպիչների հավաստմամբ` առաջին օրը ներկայացվելու են գրականագիտական տեսական հարցեր, իսկ երկրորդ օրը` կոնկրետ հեղինակների ստեղծագործություններ ու գրական երևույթներ, քանի որ վերջին 20 տարիների ընթացքում ստեղծված գրականությունը համակարգման կարիք ունի:

Այլ նորություններ
ՀԱՄԱԼՍԱՐԱՆԱԿԱՆՆԵՐՆ ԱՄՓՈՓՈՒՄ ԵՆ ԱՆՑՆՈՂ ՏԱՐԻՆ․ ՄԱՍ 2-ՐԴ
Համալսարանականները շարունակում են ամփոփել անցնող տարվա ընթացքում կատարած աշխատանքներն ու գրանցած հաջողությունները։ Տարին մշակութային էր, ԵՊՀ ուսանողների և շրջանավարտների համար՝ հագեցած աշխատանքի առաջարկներով։
ՀԱՄԱԼՍԱՐԱՆԱԿԱՆՆԵՐՆ ԱՄՓՈՓՈՒՄ ԵՆ ԱՆՑՆՈՂ ՏԱՐԻՆ. ՄԱՍ 1-ԻՆ
Ավարտվում է 2022 թվականը, և համալսարանականները ներկայացնում են անցնող տարվա ընթացքում գրանցված հաջողություններն ու ձեռքբերումները, ինչպես նաև անդրադառնում ապագայի ծրագրերին։ Հաջողությունները եղել են բոլոր ուղղություններով՝ գիտականից մինչև ֆինանսական։