09.07.2009 | 
Ուսանողական
ՆՈՐ ԾՐԱԳԻՐ ԵՊՀ ՇՐՋԱՆԱՎԱՐՏՆԵՐԻ ՀԱՄԱՐ
ՆՈՐ  ԾՐԱԳԻՐ ԵՊՀ ՇՐՋԱՆԱՎԱՐՏՆԵՐԻ ՀԱՄԱՐ
Այսուհետ ԵՊՀ շրջանավարտները հնարավորություն ունեն իրենց մասնագիտությամբ պրակտիկա անցկացնել տարբեր գերատեսչություններում:

«Ինտերնշիպ» ծրագիրը նախաձեռնել է Երեւանի Վ. Բրյուսովի անվան պետական լեզվաբանական համալսարանը` Եվրասիա համագործակցության հիմնադրամի ֆինանսական աջակցությամբ: Այս դեպքում ԵՊՀ շրջանավարտների եւ կարիերայի կենտրոնը հանդես է գալիս որպես ծրագրի գործընկեր եւ ներկայացնում է համալսարանի ուսանողներին ու շրջանավարտներին:

 

«Ծրագրի հիմնական նպատակն է գործատուներին ապահովել համապատասխան մասնագիտական պատրաստվածություն ունեցող աշխատակիցներով: Սա նաեւ լավ հնարավորություն է ընձեռում որոշ չափով լուծելու մեր շրջանավարտների զբաղվածության խնդիրը»,- ասում է ԵՊՀ շրջանավարտների եւ կարիերայի կենտրոնի աշխատակից, ծրագրի պատասխանատու Մարատ Հովհաննիսյանը:

 

Ծրագիրը նախատեսում է պրակտիկայի կազմակերպում եւ իրականացում կրթական հաստատություններում, լրատվամիջոցներում (կառավարական եւ ոչ կառավարական կազմակերպությունների տեղեկատվական եւ հանրային կապերի բաժիններում), տուրիստական գործակալություններում եւ սպասարկման այլ ոլորտներում եւ գործարար կառույցներում (բանկերում, միջազգային կազմակերպություններում):

 

«Ինտերնշիպ» ծրագիրն իրականացվում է երեք հիմնական ուղղություններով` դասավանդում, հանրային կապեր` օտար լեզուների կիրառությամբ, հանրային եւ քաղաքագիտական- վերլուծական լրագրություն: Ծրագիրը փորձնական է եւ մեկնարկել է այս տարվա ապրիլին: Պարբերաբար կազմակերպվում են հանդիպումներ կազմակերպիչների եւ համալսարանականների միջեւ, որոնց ընթացքում հնչում են տարաբնույթ առաջարկություններ ծրագրի անցկացման վերաբերյալ:

 

Կազմակերպիչներն արդեն պայմանավորվածություն են ձեռք բերել մի շարք նախարարությունների, կրթական կազմակերպությունների եւ թանգարանների հետ: Արդեն օգոստոսին նրանք պատրաստ կլինեն ընդունելու նորավարտ մասնագետներին: Ինչպես տեղեկացնում են կազմակերպիչները, պրակտիկայի ընթացքում մասնակիցների ծախսերը հոգալու են հենց իրենք: Օրինակ` որոշ ուսանողներ ստիպված կլինեն գնալ մարզեր` այնտեղի կազմակերպություններում աշխատելու համար: Առայժմ ԵՊՀ շրջանավարտների եւ կարիերայի կենտրոնը ներկայացրել է շուրջ 50 ուսանող եւ շրջանավարտ:

Այլ նորություններ
ՈՒՍԱՆՈՂՆԵՐՆ ԻՐԵՆՑ ՈՒԺԵՐՆ ԵՆ ՉԱՓՈՒՄ ԲԱՆԱՎԵՃԻ ԱԿՈՒՄԲԱՅԻՆ ԱՌԱՋՆՈՒԹՅՈՒՆՈՒՄ. ԸՆԹԱՆՈՒՄ Է ԱՇՆԱՆԱՅԻՆ ՄՐՑԱՓՈՒԼԸ
ԵՊՀ ՈՒԽ բանավեճի ակումբը կազմակերպել է բանավեճի ակումբային առաջնություն, որի 1/8-րդ եզրափակչի շրջանակում այսօր մրցել են երկու թիմ՝ իրենց կողմ և դեմ դիրքորոշումները հայտնելով «Հայերը չպետք է անցկացնեն իրենց հանգիստը Թուրքիայում» թեմայի վերաբերյալ:
«ԻՐԱՎԱԿԱՆ ԻՐԱԶԵԿՈՒՄ ՄԱՐԶԵՐՈՒՄ». ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ՈՒՍԱՆՈՂՆԵՐԸ ՄԱՐԶԵՐՈՒՄ ՍՈՎՈՐՈՂ ԱՇԱԿԵՐՏՆԵՐԻՆ ԾԱՆՈԹԱՑՆՈՒՄ ԵՆ ԻՐԵՆՑ ԻՐԱՎՈՒՆՔՆԵՐԻՆ
«Իրավական իրազեկում մարզերում» ծրագրի ընթացքում Իրավագիտության ֆակուլտետի ուսանողները հանդիպում են մարզերում սովորող աշակերտներին, նրանց ներկայացնում իրավական տարբեր թեմաներ՝ այդկերպ հաղորդակից դարձնելով իրավական մշակույթին ու բարձրացնելով իրավագիտակցության մակարդակը: