ԵՊՀ ռեկտոր Հովհաննես Հովհաննիսյանը, ողջունելով աշակերտների ակտիվ մասնակցությունն ու նախորդ տարիների համեմատ առավել լավ պատրաստավածությունը, ընդգծեց. «Շատ ուրախ եմ, որ օլիմպիադան անցկացվում է հենց ԵՊՀ-ում, քանի որ համալսարանում կարևորվում է քիմիայի զարգացումը, ներդրվում են նոր հետազոտական ուղղություններ, պարբերաբար թարմացվում են առկա կրթական ծրագրերը»:
ԵՊՀ ռեկտորը հույս հայտնեց, որ օլիմպիադայի ընթացքում աշակերտների ձեռք բերած փորձն ու գիտելիքը կունենան գործնական կիրառություն։
ԵՊՀ քիմիայի ֆակուլտետի դեկանի տեղակալ, օլիմպիադայի համակազմակերպիչ Արմեն Գալստյանը, կարևորելով առարկայական օլիմպիադաների անցկացումը և ներուժ ունեցող աշակերտների բացահայտումը, շեշտեց. «Քիմիայի օլիմպիադայի նպատակն է ոչ թե ստուգել աշակերտների՝ դպրոցական ծրագրի գերազանց իմացությունը, այլ քիմիայի վերաբերյալ խորքային գիտելիքները, տրամաբանությունը, ճկունությունը, խնդիրներին այլ մոտեցում ցուցաբերելու և նոր լուծումներ գտնելու կարողությունը»:
Առաջին կարգի մրցանակակիրներից Մանե Ստեփանյանը (Դիլիջանի կենտրոնական դպրոց, 9-րդ դասարան) առաջին անգամ է մասնակցում հանրապետական օլիմպիադային և շեշտում է, որ աշխատասիրությունը միշտ դրական արդյունքներ է տալիս: Նրա խոսքով՝ օլիմպիադային մասնակցությունը հնարավորություն տվեց բացահայտելու քիմիան այլ տեսանկյունից, ձեռք բերելու նոր գիտելիքներ ու հմտություններ:
Նշենք, որ մարտի 4-6-ն անցկացված օլիմպիադայի հանրապետական փուլում աշակերտները մասնակցել են երկու ենթափուլի՝ տեսական և փորձնական: Տեսական փուլի ընթացքում աշակերտներին տրվել են հարցեր և խնդիրներ, իսկ փորձնական փուլի ժամանակ մասնակիցները ԵՊՀ քիմիայի ֆակուլտետի և ֆարմացիայի ինստիտուտի ուսումնական լաբորատորիաներում կատարել են պահանջվող քիմիական փորձերը և ներկայացրել համապատասխան եզրահանգում:
Оլիմպիադայի շրջանակում կազմակերպվել են նաև ուսուցիչների հետ հանդիպումներ, որոնց ընթացքում քննարկվել են ինչպես տեսական և փորձնական փուլերի առաջադրանքները, այնպես էլ կազմակերպական և բնագավառին առնչվող մի շարք այլ հարցեր:
Հիշեցնենք, որ օլիմպիադայի կազմակերպիչներն են ԵՊՀ քիմիայի ֆակուլտետը, ֆարմացիայի ինստիտուտը և «Քիմիա» առարկայի հանրապետական օլիմպիադայի կազմկոմիտեն:
