14.04.2009 | 
Ուսանողական, Գիտություն
ՕՏԱՐ ԼԵԶՈՒՆԵՐ. ԱՐԴԻԱԿԱՆ ԽՆԴԻՐՆԵՐ, ՆՈՐ ՄՈՏԵՑՈՒՄՆԵՐ
ՕՏԱՐ ԼԵԶՈՒՆԵՐ. ԱՐԴԻԱԿԱՆ ԽՆԴԻՐՆԵՐ, ՆՈՐ ՄՈՏԵՑՈՒՄՆԵՐ
Երիտասարդ հետազոտողների գիտաժողովը նվիրված է Երևանի պետական համալսարանի 90-ամյակին:

Այսօր ԵՊՀ ռոմանագերմանական բանասիրության ֆակուլտետում մեկնարկեց «Օտար լեզուները Հայաստանում. նոր մարտահրավերներ, նոր մոտեցումներ» խորագրով երկօրյա գիտաժողովը, որին մասնակցում են 43 ուսանողներ եւ երիտասարդ դասախոսներ:

 

Մինչ բանախոսների զեկուցումները գիտաժողովի մասնակիցներին ողջունեցին եւ հաջողություն մաղթեցին Ռոմանագերմանական ֆակուլտետի դեկան Կարո Կարապետյանը, ԵՊՀ ՈՒԳԸ նախագահ Կառլեն Խաչատրյանը, Անգլերեն լեզվի թիվ 2 ամբիոնի վարիչ Ելենա Երզնկյանն ու Գերմանական բանասիրության ամբիոնի վարիչ Յուրա Գաբրիելյանը: «Այս գիտաժողովի նպատակն է անդրադառնալ ՀՀ-ում օտար լեզուների ուսումնասիրության հետ կապված տեսական եւ գործնական խնդիրներին:

 

Այսօր հասարակությունը զգում է օտար լեզուների որակյալ մասնագետների խիստ պահանջ, ովքեր պետք է տիրապետեն ոչ միայն օտար լեզուների, այլեւ հարմարվեն ժամանակակից աշխատաշուկայի արագ փոփոխվող պայմաններին»,- ասում է Անգլերեն լեզվի թիվ 2 ամբիոնի վարիչ Ելենա Երզնկյանը: Գիտաժողովի առաջին պլենար նիստի առանցքն էր «Օտար լեզուների դերը Բոլոնիայի գործընթացի համատեքստում» թեմայով զեկույցը, որը մասնակիցներին ներկայացրեց ֆակուլտետի ՈՒԳԸ նախագահ, մագիստրատուրայի 2-րդ կուրսի ուսանողուհի Լենա Ղազարյանը:

 

«Օտար լեզուների, հատկապես անգլերենի իմացությունն այսօր դարձել է ոչ միայն առավելություն, անհրաժեշտություն, այլև արդի աշխարհում հաջողության հասնելու գրավական: Ժամանակակից պայմաններում կրթական համակարգերի փոփոխությունները ենթադրում են նաեւ օտար լեզուների ուսուցման հետ կապված նոր համակարգային մոտեցումներ ու լուծումներ»,- նշում է Լենա Ղազարյանը: Զեկույցներից հետո գիտաժողովի մասնակցիները բաժանվեցին մի քանի խմբերի, որոնք տարբեր լսարաններում քննարկումներ անցկացրին «Իմաստաբանություն եւ գործաբանություն», «Տարբեր մշակույթներ, տարբեր լեզուներ», «Ոճագիտություն» եւ «Կիրառական լեզվաբանություն» թեմաներով: Վաղը նույնպես նախատեսվում են մի շարք քննարկումներ` «Իմաստաբանություն եւ գործաբանություն», «Թարգմանության տեսություն եւ պրակտիկա» եւ «Ոճագիտություն» թեմաների շուրջ: Իսկ վերջում գիտաժողովը կամփոփի «ՀՀ աշխատաշուկան եւ օտար լեզուների մասնագետները» թեմայով կլոր սեղան-քննարկումը:

Այլ նորություններ
ԵՊՀ ԻՐԱՎԱԳԻՏՈՒԹՅԱՆ ՖԱԿՈՒԼՏԵՏԻ ԻՐԱՎԱԲԱՆԱԿԱՆ ԿԼԻՆԻԿԱՅԻ ՈՒՍԱՆՈՂՆԵՐՆ ՍՏԱՑԱՆ ՎԿԱՅԱԿԱՆՆԵՐ
ԵՊՀ իրավագիտության ֆակուլտետի դատական նիստերի դահլիճում տեղի ունեցավ ֆակուլտետի իրավաբանական կլինիկայում որպես կամավոր ընդգրկված 28 ուսանողների վկայականների հանձնման արարողությունը:
 «YSU-KRISP AI LAB» ՀԵՏԱԶՈՏԱԿԱՆ ԿԵՆՏՐՈՆԻ ԲԱՑՄԱՆ ԱՐԱՐՈՂՈՒԹՅՈՒՆԸ ԵՎ «AI CONF ARMENIA 2022» ԿՈՆՖԵՐԱՆՍԸ ԵՊՀ-ՈՒՄ
«YSU-Krisp AI Lab» («ԵՊՀ-Կրիսպ ԷյԱյ լաբ») գիտակրթական հետազոտական կենտրոնը մեծ նվաճում է ՀՀ-ում արհեստական բանականության ոլորտի զարգացման գործում։ Կենտրոնի բացման շրջանակում կազմակերպվեց նաև «AI Conf Armenia 2022» խորագրով կոնֆերանս, որին մասնակցում էին ոլորտի հմուտ մասնագետներ։