«ՀԱՄԱԼՍԱՐԱՆՈՒՄ ՈՉ ՄԻԱՅՆ ԴԱՌՆՈՒՄ ԵՍ ՈՐԱԿՅԱԼ ՄԱՍՆԱԳԵՏ, ԱՅԼԵՎ ԱՆՑՆՈՒՄ ԵՍ ԿԱՐԵՎՈՐ ՇՐՋԱՓՈՒԼ՝ ՁԵՎԱՎՈՐՎԵԼՈՎ ՈՐՊԵՍ ՔԱՂԱՔԱՑԻ». ՄԻԼԵՆԱ ՄԿՐՏՉՅԱՆ
10.03.22
«ՀԱՄԱԼՍԱՐԱՆՈՒՄ ՈՉ ՄԻԱՅՆ ԴԱՌՆՈՒՄ ԵՍ ՈՐԱԿՅԱԼ ՄԱՍՆԱԳԵՏ, ԱՅԼԵՎ ԱՆՑՆՈՒՄ ԵՍ ԿԱՐԵՎՈՐ ՇՐՋԱՓՈՒԼ՝ ՁԵՎԱՎՈՐՎԵԼՈՎ ՈՐՊԵՍ ՔԱՂԱՔԱՑԻ». ՄԻԼԵՆԱ ՄԿՐՏՉՅԱՆ
ԵՊՀ ժուռնալիստիկայի ֆակուլտետի ուսանողուհի Միլենա Մկրտչյանը հաղթող է ճանաչվել «ՀՀ լավագույն ուսանող» հանրապետական մրցույթի հասարակագիտության ոլորտում ՝ գրավելով 1-ին տեղը: Միլենայի հետ զրուցել ենք մասնագիտության ընտրության, մրցույթի մասնակցության, ուսանողական կյանքի, ապագա ծրագրերի ու երազանքների մասին:

- Միլենա, ինչպե՞ս ընտրեցիք լրագրողի մասնագիտությունը և ինչո՞ւ որոշեցիք այն ձեռք բերել ԵՊՀ-ում:

 

- Դեռ մանկուց բազմաթիվ առիթներ եմ ունեցել մասնակցելու տարատեսակ նկարահանումների, հեռուստահաղորդումների, թղթակցել եմ դպրոցական պարբերականներին: Միշտ մի յուրատեսակ հետաքրքրությամբ և հիացումով եմ հետևել կադրից դուրս աշխատանքին: Բացի դրանից՝ շատ եմ սիրել գրել. դպրոցական տարիներին գրում էի հիմնականում իմ սիրելի գրական հերոսների մասին: Հետագայում՝ ավագ դպրոցին զուգահեռ, հաճախել եմ նաև Հայաստանի ժուռնալիստների միության պատանի ժուռնալիստի դպրոց: Այդ ժամանակահատվածում սկսեցի բացահայտել ժուռնալիստիկայի բազմակողմ և ուշագրավ աշխարհն արդեն ավելի հասուն մոտեցմամբ:

 

Թյուր կարծիք կա, թե ժուռնալիստիկան միայն լուր գրելու արհեստն է: Այս մասնագիտության յուրօրինակ առավելություններից է այն, որ աշխատանքդ կապված է շատ տարբեր ոլորտների հետ՝ բժշկությունից մինչև իրավագիտություն, մշակույթ, սպորտ.... Օրեցօր զարգացող աշխարհում հենց սա է այն մասնագիտությունը, որը, դառնալով ապրելակերպ, ոչ միայն չի ձանձրացնում, այլև օգնում է ամեն օր նորովի բացահայտել աշխարհն ու մարդկանց:

Բուհի ընտրության հարցում ևս չեմ երկմտել: Ամեն օր մեր տան պատուհանից տեսնելով ԵՊՀ-ի կենտրոնական մասնաշենքը՝ միշտ ներքին համոզմունք եմ ունեցել, որ ուսանողական տարիներս անցնելու են հենց այստեղ: Դե իսկ հետագայում՝ դիմորդ լինելու շրջանում, որոշումս հիմնավորվեց, երբ ուսումնասիրում էի բուհերը, ֆակուլտետները և կրթական ծրագրերը: Այսօր հետահայաց նետելով՝ վստահաբար կարող եմ ասել, որ ճիշտ որոշում եմ կայացրել և՛ մասնագիտության, և՛ բուհի ընտրության հարցում:

 

 

- Երբ ընդունվում էիք բուհ, ի՞նչ ակնկալիքներ ունեիք։ Կպատկերացնեի՞ք, որ մի օր դառնալու եք հանրապետության լավագույն ուսանող:

 

- Բուհ ընդունվելիս ունեցել եմ այն գիտակցումը, որ ուսանող դառնալուց զատ՝ ձեռք եմ բերում նաև համալսարանականի կարգավիճակ: Համալսարանական լինելը մեծ պատասխանատվություն է ինձ համար, քանի որ շատ լավ գիտեմ, թե ինչպիսի դժվարին ժամանակներում է հիմնադրվել այս կրթօջախը, ինչ մեծանուն հայորդիներ, մտավորականներ են ուսանել Մայր բուհում, անցել այն նույն սրահներով և սովորել այն նույն լսարաններում, որտեղ մենք ենք ուսումնառում: Յուրատեսակ մի զգացում ես ունենում, երբ հասկանում ես, որ արժեքավոր այդ պատմության մի մասնիկն էլ դու ես դառնում:

 

Ակնկալիքներն ու սպասումները շատ էին՝ մասնագիտական մրցակցային կրթություն ստանալուց մինչև հագեցած, հիշարժան և հետաքրքիր ուսանողական կյանք:
Երբևէ չէի մտածել հանրապետության լավագույն ուսանող դառնալու մասին. իմ սովորելու, եռանդուն ուսանողական կյանք սկսելու և շարունակելու համար մոտիվացիան արհեստածին չի եղել: Մասնագիտությունս ընտրել եմ սիրով, սիրով եմ հաճախել համալսարան, ակտիվ ուսանողական կյանքով եմ ապրել, ոչինչ պարտադրված չեմ արել, հակառակը՝ ամեն ինչում փորձել եմ գտնել հետաքրքրություն, և ինձ հաջողվել է:

 

 

- Ինչպե՞ս որոշեցիք մասնակցել մրցույթին։ Ինչքանո՞վ է կարևոր Ձեզ համար այս մրցանակը։

 

- Մասնակցությունը շատ պարզ և արագ ստացվեց: Ընթերցեցի մրցույթի մասին հայտարարությունը, հավաքեցի անհրաժեշտ փաստաթղթերը և դիմեցի:
Այս մրցանակն ինձ համար յուրատեսակ արժևորում է և ձեռքբերում, որի հետևում ուսանողական երկար տարիներն են՝ լի դժվարություններով, հիասթափություններով, դրանք հաղթահարելու համար անսահման աշխատասիրությամբ, նպատակասլացությամբ, կամքի ուժով և սկզբունքայնությամբ: ՀՀ լավագույն ուսանողի կոչմանն արժանանալը մեծ պատիվ է: Կարծում եմ, որ այս կոչումը պետք է վերարժևորեմ մասնագիտական, գիտական և գիտակրթական ոլորտներում նորանոր ձեռքբերումներով և հաղթանակներով:

 

 

- Ըստ Ձեզ՝ ԵՊՀ-ում կա՞ն հարթակներ, որոնք օգնում են ուսանողին ինքնադրսևորվել ու լրացնել ավանդական կրթության բացերը:

 

- Նախ նշեմ, որ համալսարանում ոչ միայն դառնում ես որակյալ մասնագետ, այլև անցնում ես կարևոր շրջափուլ՝ ձևավորվելով որպես քաղաքացի: Այս հանգամանքն առանցքային նշանակություն ունի: Ակադեմիական կրթությանը զուգահեռ ես օգտվել եմ ուսանողներին ընձեռվող գրեթե բոլոր հնարավորություններից: Ինքս եղել եմ նախաձեռնող և պատրաստակամ: Անդամակցել եմ ուսանողական կառույցներին, ներֆակուլտետային և համալսարանական մեծ ակտիվություն եմ ցուցաբերել: Գտնում է նա, ով փնտրում է, իսկ փնտրելու համար ցանկություն է պետք: Ուսանողներն ունեն ինքնադրսևորվելու հնարավորություն ոչ միայն ֆակուլտետում, բուհում, հայրենիքում, այլև միջազգային հարթակներում, տարբեր երկրներում:

 

Ուսանողական տարիներին ես, օրինակ, եղել եմ Լիբանանում, որտեղ անցել եմ մասնագիտական պրակտիկա, Մոսկվայում, մասնակցել եմ միջազգային մրցույթի, անցնելով եզրափակիչ փուլ՝ երկու անգամ մասնակցել եմ մեդիաֆորումի, Վրաստանում՝ սեմինարների և այլն: Համալսարանը հնարավորությունների աղբյուր է ուսանողի համար, պետք է կարողանալ դրանք ճիշտ օգտագործել և ծառայեցնել մասնագիտական զարգացման և ինքնակատարելագործման համար: Այդ դեպքում շահում ես և՛ դու, և՛ համալսարանը:

 

 

- «Հանրապետության լավագույն ուսանող» մրցույթին մասնակցելու չափորոշիչներից մեկը գիտական աշխատանքների առկայությունն է: Ինչպե՞ս ստացվեց, որ որոշեցիք հեղինակել գիտական հոդվածներ:

 

- Ուսումնական նյութերը յուրացնելուց, հիմնարար գիտելիքներ ձեռք բերելուց հետո նեղ մասնագիտական թեմաների շուրջ առաջացան հարցեր, որոնց պատասխանները գտնելու համար սկսեցի ուսումնասիրություններ անել: Գիտական հետազոտություններ կատարելու առանձնահատկություններին ծանոթանալուց, մասնագիտական ուսումնասիրություններն ամփոփելուց հետո դրանք ներկայացրել եմ գիտական հոդվածների տեսքով: Բացի դրանից՝ մասնակցել եմ նաև աշխատաժողովների, գիտաժողովների՝ հանդես գալով զեկուցումներով: Այս առումով հատկանշական է ԵՊՀ ուսանողական գիտական ընկերության դերը, որը ուսանողներին տրամադրում է գիտական առաջին քայլերն անելու կարևոր հարթակ: Այսօր էլ շարունակում եմ գիտահետազոտական աշխատանքները, քանի որ վստահ եմ՝ միայն գիտության և կրթության շնորհիվ կարող ենք կառուցել իմ, մեր պատկերացումների անկախ և զարգացած Հայաստանի Հանրապետությունը:

 

- Իսկ Ձեզ համար ժուռնալիստիկան այսօր գրավի՞չ մասնագիտություն է:

 

 

- Այո, ժուռնալիստիկան գրավիչ և մեծ պահանջարկ վայելող մասնագիտություն է: Ապացույցն ամեն տարի աճող դիմորդների թիվն է: Մասնագիտական, ակադեմիական կրթություն ստացած ժուռնալիստների, որակյալ լրագրության կարիք եղել է, կա և կլինի նաև ապագայում: Համակարգչային զանազան տեխնոլոգիաները չեն կարող փոխարինել հմուտ և փորձառու լրագրողի մասնագիտական հմտություններին, վերլուծական մտքին և մասնագիտական շատ այլ նրբություններին: Տեղեկատվական և հաղորդակցական տեխնոլոգիաների զարգացումը նպաստում և նոր գործիքներով, հնարավորություններով ու տեխնիկաներով օժանդակում է մեզ՝ իրականացնելու մասնագիտական գործունեությունը:

 

 

- Ի՞նչ երազանքներ ու նպատակներ ունեք:

 

- Երազում եմ նորից վայելել ազատ և անկախ Արցախի չքնաղ համայնապատկերն անառիկ հայոց բերդաքաղաք Շուշիից: Երազանքներս դարձնում եմ նպատակներ:

 

- Ի՞նչ կմաղթեք դիմորդներին, որոնք նոր են ոտք դնելու ուսանողական կյանք:

 

- Ապագա ուսանողներին մաղթում եմ աշխատասիրություն և նպատակասլացություն: Ցանկանում եմ, որ նրանք գնահատեն իրենց ժամանակը և օգտագործեն ուսանողական տարիները, որոնք իրապես բացառիկ են և անփոխարինելի: Ուսման ընթացքում այսօր ներդրած իրենց ջանքերի պտուղները վստահաբար քաղելու են ապագայում:

 

Քնար Միսակյան

Կրթական որակի շարունակական բարելավման նպատակով ԵՊՀ-ն ցանկանում է պարզել, թե, ընդհանուր առմամբ, որքանով եք գոհ ձեր ուսումնասիրած դասընթացներից և այն կրթական ծրագրերից, որում ընդգրկված եք:

Կոնտակտներ

Կենտրոնի տնօրեն՝ Արմեն Բուդաղյան 

Հասցե՝ 
Ալեք Մանուկյան 1, ԵՊՀ կենտրոնական մասնաշենք, 402 սենյակ

 

Հեռ.՝ (+374 60) 710121,
11-21 (ներքին), quality_center@ysu.am