Օրացույց

Հեղինակի որոնում

Ա | Բ | Գ | Դ | Ե | Զ | Է | Ը | Թ | Ժ | Ի | Լ | Խ | Ծ | Կ | Հ | Ձ | Ղ | Ճ | Մ | Յ | Ն | Շ | Ո | Չ | Պ | Ջ | Ռ | Ս | Վ | Տ | Ր | Ց | ՈՒ | Փ | Ք | Օ | Ֆ

Նորություններ

Ծրագրի նպատակներն էին ուսանողների և աշակերտների համար մանրէաբանությունը համակողմանի ուսումնասիրելու հնարավորություն ստեղծելը, մանրէների դրական հատկություններին և առօրյա կյանքում ու արտադրության մեջ դրանց հնարավոր կիրառություններին ծանոթացնելը, ինչպես նաև բիզնես մտածողություն, թիմում աշխատելու հմտություններ սովորեցնելը։

 

 

Կենսաբանության ֆակուլտետի ասպիրանտ, ծրագրի պատասխանատու Հռիփսիմե Պետրոսյանը, մեզ հետ զրույցում խոսելով ծրագրի ձևաչափից, ասաց, որ 33 մասնակիցների համար կազմվել էր սեմինար-քննարկումներով և գիտափորձերով հագեցած ծրագիր: Նա հատկապես կարևորեց այն, որ մասնակիցները ծրագրի շրջանակում այցելել են արտադրական գործարաններ, ինչպես նաև շփվել ոլորտի հմուտ մասնագետների հետ՝ խորացնելով տեսական և պրակտիկ գիտելիքները։

 

 

 

«Այս ծրագրի շնորհիվ ընդգծվում է մանրէաբանների մեծ դերն աշխարհում, ուստի այս առումով ծրագիրը նպաստեց աշակերտների մասնագիտական կողմնորոշմանը»,- նշեց Հ. Պետրոսյանը։

 

Ժյուրիի կազմում էին ԵՊՀ կենսաբանության ֆակուլտետի կենսաքիմիայի, մանրէաբանության և կենսատեխնոլոգիայի ամբիոնի վարիչ, կ.գ.դ., դոցենտ Աննա Փոլադյանը, կ.գ.թ, ասիստենտ Հեղինե Գևորգյանը, «Impact Hub Yerevan» հետազոտական ծրագրի ղեկավար Անաշե Հաղվերդյանը, «Start-Up» դպրոցի կրթական ծրագրերի ղեկավար Արտակ Խաչատրյանը:

 

 

Ծրագրի բանախոս, ժյուրիի անդամ, կ.գ.դ., դոցենտ Աննա Փոլադյանի խոսքով՝ թիմերի ներկայացրած գաղափարները համապատասխանում էին ժամանակակից աշխարհի հրամայականին և լինելով իրատեսական՝ կարող են կյանքի կոչվել:

 

 

«Դասախոսությունները հիմնականում վերաբերում էին առողջությունը բարելավող նոր սննդամթերքի պատրաստման գաղափարներին, գլոբալ տաքացմանը և քաղցկեղի բուժմանն ուղղված նոր քայլերին»,- ընդգծեց Ա․ Փոլադյանը:

 

 

Վանաձորի «Էվրիկա» դպրոցի աշակերտ, «CasBac» հաղթող թիմի մասնակից Մարիամ Յարիբեկյանը, պատմելով թիմի առաջարկած գաղափարի մասին, նշեց. «Նպատակ ունենք ստեղծելու աղեստամոքսային հիվանդությունները կանխարգելող, իմունիտետը բարձրացնող կաթնաշոռային պանրիկներ, որոնք պետք է հագեցած լինեն բիֆիդոբակտերիաներով: Կաթնաշոռային պանրիկները կունենան մրգային համեր»։

 

 

Շարունակելով դասընկերուհու խոսքը՝ նույն թիմի անդամ Գայանե Ղազարյանը նշեց, որ գաղափարն առաջացել է՝ աղեստամոքսային թունավորումների թվի աճով պայմանավորված: «Նախորդ տարիների համեմատ՝ աղեստամոքսային հիվանդություններով տառապողները շատացել են: Լսելով այս միջոցառման մասին՝ որոշեցինք մեր գաղափարը ներկայացնել գիտական հանրույթին և ոլորտի առաջատարներից լսել մասնագիտական կարծիքներ ու խորհուրդներ»,- ասաց Գ. Ղազարյանը:

 

 

Վանաշենի միջնակարգ դպրոցի աշակերտ, հաղթող թիմի անդամ Մանվել Հարությունյանն ասաց, որ ծրագիրը նպաստել է նոր գիտելիքներ ստանալուն: Մանրամասնելով իրենց գաղափարի հիման վրա ստեղծվող արտադրանքի նկարագրությունը՝ նա նշեց. «Ուսումնասիրություների վերջում՝ հաշվարկներից հետո, պարզվել է պանրիկի ընդհանուր կշիռը. այն լինելու է մոտավորապես 300-350 գրամ»:

 

 

Երկրորդ հորիզոնականը զբաղեցրած «Լակտոբացիլներ» թիմը մրցույթին ներկայացրել էր քաղցկեղածին բջիջների դեմ պայքարի միջոց՝ լիստերիա բակտերիայով: Թիմի անդամ, «Հերացի» ավագ դպրոցի աշակերտ Տաթև Գևորգյանը, խոսելով ծրագրի ընձեռած տպավորություններից և իր մասնակցությունից, ասաց. «Այս մրցույթի շնորհիվ ծանոթացանք հմուտ մասնագետների հետ, լսեցինք նրանց դասախոսությունները, այցելեցինք լաբորատորիաներ, կատարեցինք հետազոտություններ, ապա, լինելով տարբեր արտադրական գործարաններում՝ էլ ավելի ամրապնդեցինք մեր գիտելիքները»: Խոսելով հաղթանակից՝ թիմի անդամները նշեցին, որ այն սպասված էր:

 

 

«Մասնակցությունը կարևոր է, իսկ հաղթանակը՝ հաճելի»,- ժպիտով ասաց Տաթևը:

 

 

Նշենք, որ մրցանակաբաշխության շրջանակում թիմերի մասնակիցներն այցելել են նաև ԵՊՀ պատմության թանգարան։

Կենսաքիմիայի, մանրէաբանության և կենսատեխնոլոգիայի ամբիոնի դոցենտ, կ.գ.թ. Լիլիթ Գաբրիելյանը, մեզ հետ զրույցում անդրադառնալով միջազգային գիտաժողովներին հայ գիտնականների, հատկապես երիտասարդների մասնակցության կարևորությանը, նշեց. «Երիտասարդ գիտնականները հնարավորություն են ստանում գիտական հանրույթին ներկայացնելու իրենց հետազոտական աշխատանքները, շփվելու օտարերկրյա գիտնականների հետ, ինչն էլ նպաստում է մտքերի փոխանակմանը և հետագա համագործակցությունների զարգացմանը»,- ասաց Լ. Գաբրիելյանը:

 

 

Դոցենտը փաստեց, որ ֆակուլտետի գիտնականների հետազոտական աշխատանքները մեծ հետաքրքրություն են առաջացրել օտարերկրյա գիտնականների շրջանում, քննարկումների ընթացքում եղել են համագործակցության առաջարկներ, որոնք կնպաստեն Հայաստանում կենսաքիմիայի ոլորտի զարգացմանը:

 

ԵՊՀ հիմնարար և ախտաբանական կենսաքիմիայի լաբորատորիայի վարիչ Նիկոլայ Ավթանդիլյանը հատկանշական է համարում համալսարանական գիտնականների մասնակցությունը գիտաժողովի հատուկ նիստերին, որտեղ ներկայացվել են կենսաքիմիայի նորագույն ուղղությունները, ապագա քայլերը, գիտական դրամաշնորհները, գիտական հոդվածներ գրելու հմտությունները, կարճաժամկետ ու երկարաժամկետ ուսուցման հնարավոր տարբերակներն ու մեթոդները:

 

 

«Ուրախալի է այն փաստը, որ յուրաքանչյուր օր մենք ունեցել ենք առնվազն մեկ զեկուցում: Դա վկայում է այն մասին, որ մեր ամբիոնի հետազոտական աշխատանքներն ընդգրկում են կենսաքիմիայի բոլոր բնագավառները»,- մեզ հետ զրույցում ասաց Ն. Ավթանդիլյանը։

 

Լաբորատորիայի վարիչը նույնպես գիտական հետաքրքրությունների շրջանակի և աշխարհայացքի ընդլայնման տեսանկյունից կարևորեց երիտասարդների մասնակցությունը միջազգային գիտաժողովներին:

 

 

Նշենք, որ ԵՊՀ կենսաբանության ֆակուլտետի գիտնականները ներկա են եղել գիտաժողովի բացման հանդիսավոր արարողությանը, ունկնդրել Եվրոպայի առաջադեմ կենսաբանների դասախոսությունները, մասնակցել պլենար քննարկումներին և ծանոթացել մի շարք հայտնի ընկերությունների գիտական նորարարություններին ու անալիտիկ մեթոդներին:

 

 

Լիսաբոնում կայացած գիտաժողովի ժամանակ ավելի քան 3000 գիտնականների ներկայացրած աշխատանքները, որոնք վերաբերում էին կենսաքիմիայի, մոլեկուլային կենսաբանության և հարակից ոլորտների արդի զարգացումներին, տպագրվել են «FEBS Open Bio» հեղինակավոր ամսագրի՝ գիտաժողովին նվիրված հավելվածում:

 

Եվրոպական կենսաքիմիական ընկերությունների ֆեդերացիայի 46-րդ գիտաժողովին հայ գիտնականների մասնակցությունը ֆինանսավորվել է FEBS-ի դրամաշնորհների կոմիտեն («Young Scientist- FEBS Sprinzl Scheme» bursary), ՀՀ ԿԳՄՍՆ գիտության կոմիտեի և «Գալուստ Գյուլբենկյան» հիմնադրամի միջոցներով:

Օպերայի և բալետի ազգային ակադեմիական թատրոնի հարակից տարածքը սեպտեմբերի 8-11-ը վերածվել էր գիտության ու տեխնոլոգիաների մասշտաբային կենտրոնի, որտեղ ներկայացվում էին գիտության նորագույն նվաճումներն ու ձեռքբերումները։

 

 

ԵՊՀ կենսաբանության ֆակուլտետի կենդանաբանության ամբիոնը «Գիտության ճամբարում» ներկայացրել է Հայաստանում տարածված և Կարմիր գրքում գրանցված ժայռային մողեսներ, փափկամարմիններ, սարդեր, թիթեռներ և այլ կենդանատեսակներ:

 

 

Կենսաբանության ֆակուլտետի ավագ լաբորանտ, կ.գ.թ. Ռուզաննա Պետրոսյանը, մեզ հետ զրույցում անդրադառնալով մողեսների վերոնշյալ տեսակների ցուցադրման կարևորությանը, ասել է. «ԵՊՀ-ում իրականացնում ենք բնապահպանական բազմաթիվ միջոցառումներ, այդ թվում՝ ստեղծել ենք լաբորատորիա, որտեղ բազմացնում ենք անդրկովկասյան բազմագույն մողեսիկներ, ապա դրանց բաց թողնում բարենպաստ բնակլիմայական պայմաններում»:

 

 

ԵՊՀ կենսաբանության ֆակուլտետի կենդանաբանության ամբիոնի աշխատակից Մերի Արզումանյանը, խոսելով փափկամարմինների, սարդերի և թիթեռների որոշ տեսակների վերաբերյալ տեղեկատվության հանրայնացման կարևորությունից, ընդգծեց. «Քանի որ ողնաշարավոր կենդանիներն առավել շատ են ուսումնասիրված, քան անողնաշարավորները, ուստի ճամբարը հնարավորություն է ստեղծում մարդկանց ուշադրությունը սևեռելու դեպի անողնաշարավոր կենդանիները: Սա կնպաստի դրանց ճանաչելիության բարձրացմանը և կրտսեր սերնդի շրջանում կենդանաբանության նկատմամբ հետաքրքրություն կառաջացնի, ինչը հետագայում կօգնի մասնագիտության ընտրության հարցում»:

 

 

ԵՊՀ ֆիզիկայի ֆակուլտետի ֆոտոնիկայի և արհեստական բանականության գիտահետազոտական լաբորատորիան «Գիտության ճամբարում» ներկայացրել է օպտիկական տարրեր, այդ թվում՝ բևեռացուցիչներ, զտիչներ, ալիքատարներ, հոլոգրամներ և այլն:

 

 

Ֆիզիկայի ֆակուլտետի ֆոտոնիկայի և արհեստական բանականության գիտահետազոտական լաբորատորիայի վարիչ, ֆ.մ.գ.թ. Մուշեղ Ռաֆայելյանը, անդրադառնալով ֆիզիկայի հանրայնացման կարևորությանը, փաստեց, որ ճամբարը գիտահանրամատչելի է և ներգրավում է թե՛ դպրոցահասակների, թե՛ ուսանողների և թե՛ հետազոտող-գիտնականների։

 

 

««Գիտության ճամբար»-ը, կարելի է ասել, երիտասարդների համար ոգեշնչման աղբյուր է և հետաքրքրություն է առաջացնում բարդ թվացող գիտության նկատմամբ»,- ասել է Մ. Ռաֆայելյանը:

 

 

ԵՊՀ ֆիզիկայի ֆակուլտետի միջուկային ֆիզիկայի ամբիոնը ներկայացրել էր Հեյգեր-Մյուլլերի հաշվիչ սարքը, սցինտիլյացիոն հաշվիչ սարքը, ինչպես նաև Ատոմային էլեկտրակայանների շահագործման հայկական գիտահետազոտական ինստիտուտի ներկայացուցիչների հետ՝ Ջրաջրային էներգետիկական ռեակտորի (ՋՋԷՌ 440) մանրակերտը և այլն:

 

Ֆիզիկայի ֆակուլտետի ուսանող Գոռ Մուրադյանն ընդգծեց, որ շատերը տեղեկացված չեն, թե ներկայացվող սարքերը կենսական ի՞նչ նշանակություն ունեն, և ճամբարը նաև ձեռք է բերում ճանաչողական բնույթ։ Ամփոփելով խոսքը՝ նա նշեց, որ մասնակիցների թիվը և հետաքրքրվածությունը գերազանցել են իրենց սպասելիքները:

 

 

Ֆիզիկայի ֆակուլտետի մեկ այլ ուսանող՝ Ալվարդ Մալխասյանը, մեզ հետ զույցում անդրադարձավ ճամբարի ընձեռած հնարավորություններին՝ նշելով. «Մարդկանց մեծամասնությունը ֆիզիկան համարում է բարդ գիտություն, բայց այս ճամբարն ապացուցեց, որ եթե գիտությունը հանրամատչելի ներկայացվի, շատերին կհետաքրքրի: Այս ճամբարը կարևոր է նաև նրանով, որ ներգրավել է ոչ միայն գիտության, այլև արվեստի բնագավառի ներկայացուցիչներին»:

 

 

 

Արմավիրի Մովսես Սիլիկյանի անվան N6 հիմնական դպրոցի աշակերտներին ուղեկցում էր ուսուցիչը, որը մեզ հետ զրույցում ասաց․ «Վերջին տարիների տեխնոլոգիական մեծ առաջընթացը նպաստել է մեխանիկական աշխատանքի կրճատմանը: Այսօր հետաքրքիր է տեսնել երիտասարդ սերնդի գիտական նվաճումները»:

 

 

Ճամբարի մասնակից Հասմիկ Գասպարյանը պատմեց, որ բազմիցս մասնակցել է նմանօրինակ միջոցառումների, սակայն «Գիտության ճամբարն» իր տեսակով տարբերվող էր և ներգրավել էր տարիքային տարբեր խմբերի ներկայացուցիչների:

Նշենք, որ տարբեր տաղավարներ ներկայացնում էին գիտության տարբեր ճյուղեր՝ աստղաֆիզիկա, ռոբոտաշինություն, տիեզերական և արհեստական արբանյակներ և այլն:

 

Հովհաննես Հովհաննիսյանը շնորհակալություն հայտնեց Գարիկ Իսրայելյանին «ԵՊՀ-Սթարմուս Նոբելյան շաբաթ» միջոցառման կայացման համար՝ ընդգծելով դրա կարևորությունը գիտության բնագավառի վերարժևորման և հասարակության ուշադրությունը գիտության կողմը սևեռելու տեսանկյունից։

 

 

«Շատերը չէին հավատում, որ «Սթարմուսը» կկայանա Հայաստանում, սակայն Դուք սովորեցրիք հավատալ երազանքների իրականացմանը և դրա համար անել հնարավոր ու անհնարին ամեն բան: Անհրաժեշտ է շատ աշխատել, ձգտել լավագույնին, ստեղծել կապեր և սովորել օտար լեզուներ։ Վստահ եմ՝ ցանկացած երազանք հնարավոր է իրականացնել, և այսօր դա ապացուցում են Գարիկ Իսրայելյանը, Ջիմ Բաղյանը և Դեյվիդ Ջոն Էյքրը»,- ասաց ԵՊՀ ռեկտորը։

 

Խոսելով Նոբելյան շաբաթվա ընթացքում գրանցված հաջողությունների մասին՝ ռեկտորն ընդգծեց, որ սա բացառիկ հնարավորություն էր գիտությունն ուսանողների և գիտնականների համար էլ ավելի հետաքրքիր դարձնելու:

 

«Հուսով եմ՝ աշխարհահռչակ գիտնականների ու արվեստի գործիչների հետ հանդիպումները, նրանց հաջողության պատմություններին ու գիտական նվաճումներին հաղորդակից դառնալը կոգևորի մեր երիտասարդներին՝ հավատալու իրենց ուժերին և նպաստելու մեր երկրում գիտության, արվեստի և տեխնոլոգիաների ոլորտների զարգացմանը»,- նշեց Հ․ Հովհաննիսյանը։

 

Ապա Հ. Հովհաննիսյանը ԵՊՀ շրջանավարտ Գարիկ Իսրայելյանին հանձնեց ԵՊՀ ոսկե մեդալ:

 

 

Մինչ բուն քննարկմանն անցնելը Գարիկ Իսրայելյանը ներկաներին պատմեց ԵՊՀ-ում անցկացրած ուսանողական տարիների մասին՝ վերհիշելով այն տպավորությունները, որոնք իր կյանքում մինչ օրս ունեն ազդեցիկ նշանակություն։

 

«Ինձ համար անչափ հաճելի է վերադառնալ սիրելի և հարազատ բուհ, որտեղ անցել է իմ ուսումնառության ամենակարևոր ժամանակահատվածը: Տարիներ անց, վերադառնալով Երևանի պետական համալսարան, ես ինձ կրկին ուսանող եմ զգում»,- ասաց ԵՊՀ շրջանավարտը:

 

 

«Սթարմուսի» համահիմնադիրը մեզ հետ զրույցում պատմեց, որ փառատոնի ստեղծման գաղափարը միանգամից չի առաջացել․ հիմնադրվել է 2007 թվականին, իսկ անվանումն ընտրվել է երկարատև քննարկումների արդյունքում։

 

Գ. Իսրայելյանը փաստեց, որ տիեզերագիտության արդիականությունն ավելի է ընդգծվում տեխնոլոգիական դարաշրջանում։

 

«Ես համոզված եմ, որ հետագա տարիներին այս ոլորտում սպասվում են չափազանց հետաքրքիր նորարարություններ, դրանով պայմանավորված՝ փառատոնի կարևորությունը տարեցտարի մեծանում է: Հատկանշական է, որ փառատոնի ընթացքում մենք շնորհում ենք նաև Սթիվեն Հոքինգի անվան հուշամեդալ։ Ս․ Հոքինգը հաջողության է հասել իր գիտահանրամատչելի աշխատությունների շնորհիվ՝ գրելով ռեկորդային ցուցանիշ գրանցած «Ժամանակի համառոտ պատմություն» գիրքը։ «Սթարմուս» փառատոնը նույնպես գիտահանրամատչելի է և նախատեսված տիեզերագիտությամբ հետաքրքրվող բոլոր մարդկանց համար»:

 

 

Հաջորդիվ ելույթ ունեցավ հայազգի առաջին տիեզերագնաց Ջիմ Բաղյանը՝ հայտնելով, որ առաջին անգամ է եկել Հայաստան և իր համար մեծ պատիվ է լինել Հայաստանում, մասնավորապես Երևանի պետական համալսարանում:

 

«Իմ ծնողները հայ են, ես իմ կյանքի ողջ ընթացքում լսել եմ Հայաստանի մասին և միշտ ցանկացել եմ լինել այստեղ»,- ասաց Ջ․ Բաղյանը:

 

 

«Տիեզերք և ներշնչանք» խորագրով պանելային քննարկման ընթացքում Ջիմ Բաղյանը ներկայացրեց տիեզերքը՝ պատմելով ներկաներին ամենից շատ հետաքրքրող՝ դեպի տիեզերք թռիչքի, դրա ընթացքում ստացած տպավորությունների և զգացողության մասին։ Տիեզերագնացն անդրադարձավ նաև Երկրից դեպի Մարս ձգվող ճանապարհին արևի ճառագայթահարման վտանգի առկայությանը՝ նշելով. «Հավանականությունը, որ մարդը տիեզերքից հետ չի վերադառնա կամ վերադառնալուց հետո քաղցկեղ կունենա, 5-10 տոկոս է, սակայն չափազանց կարևոր է հաշվի առնել անգամ այդ քիչ տոկոսը, և ես կարծում եմ՝ մարդկությունը դեռևս պատրաստ չէ այդ վախը հաղթահարելուն»:

 

 

«Տիեզերանավից հստակ տեսանելի է Երկիրը, երևում է ամեն բան, նույնիսկ ֆուտբոլի դաշտը: Կարծում եմ՝ պատկերացնում եք, թե որքան հետաքրքիր և տպավորիչ է տիեզերանավի պատուհանից ողջ տիեզերքը տեսնելը»,- պատմեց Ջ. Բաղյանը:

 

Ամերիկացի գրող, աստղագիտությունն ու տիեզերքը հանրայնացնող գործիչ Դեյվիդ Ջոն Էյքրը նշեց, որ ինքը 2002 թվականից եղել է աստղագիտությանը վերաբերող ամսագրի գլխավոր խմբագիրը։ Վերջինս գիտության և Ամերիկայի պատմության վերաբերյալ 23 գրքի հեղինակ է, համահեղինակ կամ խմբագիր։ 15 տարեկանում հիմնադրել է աստղագիտությանն առնչվող ամսագիր՝ «Deep Sky Monthly»-ն։

 

 

Ներկաներին հետաքրքրեց նաև այն, որ Դ. Էյքրը հաճախ է ճամփորդում՝ անցկացնելու զրույցներ՝ աստղագիտության վերաբերյալ, ինչպես նաև զբոսաշրջիկների հետ դիտելու արևի խավարումը: 

 

Քննարկման ունկնդիր, ԵՊՀ կիսահաղորդչային սարքերի և նանոտեխնոլոգիաների կենտրոնի հաշվարկային նյութագիտության լաբորատորիայի ղեկավար, ռադիոֆիզիկայի ֆակուլտետի դասախոս Հայկ Զաքարյանը մեզ հետ զրույցում ընդգծեց, որ այս շաբաթվա ընթացքում համալսարանականներին շնորհվել է բացառիկ հնարավորություն լսելու աշխարհահռչակ գիտնականներին և ծանոթանալու գիտության բնագավառի նորարարություններին։

 

 

«Նոբելյան մրցանակակիրների և հանրաճանաչ գիտնականների՝ Հայաստան, մասնավորապես Երևանի պետական համալսարան այցելելը չափազանց կարևոր է մեզ համար։ «Սթարմուս» փառատոնը նաև ստեղծեց հասարակությանը գիտությանն ավելի մոտեցնելու հնարավորություն: Անչափ կարևորում եմ այն, որ մեր ուսանողները լսում են գիտության մեջ մեծ վաստակ ունեցող մարդկանց դասախոսությունները՝ ծանոթանալով նրանց փորձին և գիտության տվյալ ոլորտի նորարարություններին»,- ասաց Հ. Զաքարյանը:

 

ԵՊՀ ֆիզիկայի ֆակուլտետի ուսանող Մարինե Տոնոյանը ներկա է եղել «ԵՊՀ-Սթարմուս Նոբելյան շաբաթ» միջոցառման շրջանակում կազմակերպված բոլոր դասախոսություններին և անչափ տպավորված էր դրանցից։ Մ. Տոնոյանը փաստեց, որ այս շաբաթն իր համար առանձնահատուկ նշանակություն է ունեցել՝ նպաստելով գիտելիքների հարստացմանը։

 

 

«Երկար ժամանակ անհամբեր սպասում էի հենց այսօրվա քննարկմանը: Ցանկանում էի տեսնել հատկապես Գարիկ Իսրայելյանին, որովհետև նրա գործունեությունն ինձ ոգեշնչում է՝ մղելով ավելի լավ սովորելու, իմ մասնագիտության մեջ կատարելագործվելու, որպեսզի իմ բոլոր երազանքներն իրականություն դառնան: Այդ երազանքներն իհարկե ուղղված են գիտության, հատկապես աստղագիտության զարգացմանը»,- մեզ հետ զրույցում ասաց Մ. Տոնոյանը։

 

ԵՊՀ ֆիզիկայի ֆակուլտետի ուսանողներից Նունե Բադալյանը հավելեց, որ երիտասարդ գիտնականների ու ֆիզիկոսների համար այսպիսի միջոցառումների նախաձեռնումն անչափ կարևոր է, որովհետև յուրաքանչյուր դասախոսություն ոգեշնչման աղբյուր է։

 

«Այսօրվա քննարկումը շատ հետաքրքիր էր, որովհետև առնչվում էր նաև իրական կյանքին, ցույց տալիս, թե ինչքան կարևոր է աստղագիտությունը մեր կյանքում, և թե ինչպես պետք է երեխաներին ու հասարակությանը կրթենք, որպեսզի գիտությունն ավելի շատ ուշադրության արժանանա»:

 

 

Ն. Բադալյանին տպավորել էր Ջիմ Բաղյանի պատմությունը, որին ճանաչում է դեռ փոքր տարիքից՝ հետևելով նրա գործունեությանը։

 

«Ջիմ Բաղյանը պատմեց, թե ինչպես է փոքր տարիքում, նայելով աստղերին, հետաքրքրվել գիտությամբ։ Զարմանալի կթվա, սակայն այդ պատմությունը շատ նման է իմ պատմությանը․ փոքր տարիքում ֆիզիկոս պապիկս ինձ ցույց էր տալիս աստղերը, ուսումնասիրում էինք քարտեզը ճիշտ այնպես, ինչպես Ջ․ Բաղյանն էր պատմում։ Այսպիսով՝ ինձ համար այս օրն անչափ նշանակալի էր»,- պատմեց Ն․ Բադալյանը:   

 

Հիշեցնենք, որ սեպտեմբերի 5-10 ՀՀ-ում առաջին անգամ անցկացվող Starmus VI միջազգային փառատոնը նվիրված է Մարսի վրա առաջին վայրէջքի 50-ամյակին։ ԵՊՀ-Սթարմուս համագործակցության շրջանակում Երևանի պետական համալսարանում դասախոսությամբ հանդես են եկել Նոբելյան մրցանակի դափնեկիր աստղաֆիզիկոսներ Քիփ Թորնը, Միշել Մայորը և մանրէաբան Էմանուել Շարպենտիեն։

 

Դպրոցի նպատակ ուեներ ուսանողներին ծանոթացնելու էքստրեմոֆիլ մանրէների կենսաբանությանն ու կենսատեխնոլոգիայում դրանց կիրառմանն առնչվող արդի հիմնախնդիրներին:

 

ԵՊՀ կենսաբանության ֆակուլտետի դոցենտ Հ. Փանոսյանի կարծիքով՝  այսպիսի նախաձեռնությունները կարևոր են ոչ միայն մասնագիտական գիտելիքների ամրապնդման և համալրման տեսանկյունից, այլև ստեղծում են միջմշակութային երկխոսությունների և ապագայում նոր ծրագրերի իրականացման հնարավորություն։

 

 

Հովիկ Փանոսյանը, կարևորելով այսպիսի նախաձեռնությունները, մեզ հետ զրույցում ընդգծեց. «Եթե տարիներ առաջ Հայաստանում գիտությունն առավելապես միջազգային փորձի հիման վրա էր զարգանում, ապա այսօր գիտական աշխարհում մենք կայուն դիրք ենք գրավում։ Ասվածի լավագույն վկայությունն է այն, որ Ալմաթիում կազմակերպված միջազգային ամառային դպրոցի երեք դասախոսություններից մեկը ներկայացրել է ԵՊՀ կենսաբանության ֆակուլտետի դոցենտ Արմինե Մարգարյանը»:

 

 

Ա. Մարգարյանը մեզ հետ զրույցում նշեց, որ արդեն երկրորդ անգամ ինքը հնարավորություն ունի իր գիտելիքներն ու հմտություններն օտարերկրացի ուսանողներին փոխանցելու։

 

Անդրադառնալով դասախոսության բովանդակությանը՝ ԵՊՀ դոցենտն ասաց․ «Օտարերկրացի ուսանողներին ներկայացրել եմ մոլեկուլային մեթոդների հետ աշխատանքը՝ փոխանցելով տեսական գիտելիքներ և կատարելով պրակտիկ հետազոտություններ»:

 

 

Ա. Մարգարյանը հավելեց, որ ԵՊՀ ուսանողները քաջ ծանոթ են թեմային, քանի որ ԵՊՀ կենսաբանության ֆակուլտետում կան անհրաժեշտ սարքերը՝ հետազոտություններ իրականացնելու համար:

 

ԵՊՀ ուսանողներ Րաֆֆի Շահմուրադյանը, Սոնա Հովհաննիսյանը, Մանե Թադևոսյանը և ասպիրանտ Սոնա Նիկոլյանը դպրոցի շրջանակում ներկայացրել են իրենց գիտական հետազոտությունների արդյունքները՝ ստանալով մասնագիտական խորհուրդներ։

 

Դպրոցի մասնակից Րաֆֆի Շահմուրադյանը, ընդգծելով հետազոտություններ իրականացնող ուսանողների փորձի և գիտելիքների փոխանակման կարևորությունը, նշեց․ «Ես և մի ղազախ ուսանող ուսումնասիրում ենք բիոպլաստիկան: Քննարկումների ընթացքում ակնհայտ դարձավ, որ իմ փորձնական գիտելիքներն ավելի շատ են: Իմ գիտական ղեկավար Հ. Փանոսյանը նրան խորհուրդներ տվեց՝ ինչպես զարգացնել աշխատանքի փորձնական հատվածը»:

 

 

ԵՊՀ կենսաբանության ֆակուլտետի ասպիրանտ Սոնա Նիկոլյանը հետազոտում է բույսերի և մանրէների հարաբերությունները։ Նրա համար այս ծրագիրը մտահորիզոնն ընդլայնելու, օտարերկրյա գիտական նախասիրություններին ու ազգային առանձնահատկություններին ծանոթանալու հնարավորություն էր:

 

 

«Օտարերկրյա դասախոսները, մեծ հետաքրքրությամբ լսելով իմ զեկուցումը, խորհուրդ տվեցին ուսումնասիրելու մանրէի ազդեցությունը բույսի աճի վրա, և ես պատրաստվում եմ իրականացնել այդ հետազոտությունը»,- պատմեց Սոնան:

 

Դպրոցին մասնակցել են նաև պատվիրակություններ՝ Նորվեգիայից, Վրաստանից, Ուզբեկստանից, Ղազախստանից, Ղրղզստանից և Տաջիկստանից:

 

Նշենք, որ օգոստոսի 8-18-ն անցկացված ամառային դպրոցը կազմակերպվել էր Բարձրագույն կրթության բնագավառում միջազգային գործակցության նորվեգական կենտրոնի տրամադրած «Մանրէների կենսատեխնոլոգիայի բնագավառում գիտահեն բարձրագույն կրթության կրթական ցանց» դրամաշնորհի շրջանակում: