Շուրջ 15 տարի անցկացվող ամառային հեղինակավոր այս դպրոցին համալսարանականները մասնակցում են արդեն երրորդ անգամ: Այս անգամ մեր պատվիրակությունն ընդամենը երեք հոգուց էր բաղկացած (նախորդ երկու տարիներին մասնակցածների թիվը 16-ն է), սակայն դա չխանգարեց, որ մասնակցության արդյունքները տպավորիչ լինեն:

Ամառային դպրոցի կազմակերպիչը Դոնեցկի ազգային համալսարանն է, իսկ իբրեւ դպրոցի անցկացման վայր ընտրվել էր Սվյատոգորսկ քաղաքը, որը մասնակիցներին գրավել էր հատկապես իր գեղեցիկ բնությամբ: Ընդհանուր առմամբ, ամառային դպրոցին մասնակցել են 15-ից ավելի երկրներ (Բուլղարիա, ԱՄՆ, Եգիպտոս, Վրաստան, Լատվիա եւ այլք):

2010 թվականին փոքր-ինչ փոփոխվել էր նաեւ դպրոցի անցկացման ձեւաչափը, եւ ներկայացվել են նաեւ թեմային առնչվող զեկուցումներ: ԵՊՀ-ից զեկույցով հանդես է եկել ՈՒԽ փոխնախագահ Նարեկ Մելքոնյանը: Նրա «Մաթեմատիկական մոդելավորման տարրերը տնտեսագիտության մեջ» գիտական զեկույցը լավագույններից մեկն է ճանաչվել: «Այս թեման բավականին նոր է եւ երեւի դրա համար էլ այդքան հետաքրքրեց մյուս մասնակիցներին: Շատերը տեղյակ չէին այն նյութերին, որոնք ես էի ուսումնասիրել, ու փորձեցին իմ միջոցով պարզել դրանց աղբյուրները»,- նշում է Նարեկ Մելքոնյանը:

Ի դեպ, տնտեսագիտական կրթությունը մասնակցության պայմաններից չի եղել, ուստի համալսարանական երեք մասնակիցները տարբեր ֆակուլտետներից են (Հարություն Ազգալդյան` Տնտեսագիտության ֆակուլտետ, Նարեկ Մելքոնյան` Մաթեմատիկայի եւ մեխանիկայի ֆակուլտետ, Ալեքսանդր Սարգսյան` Միջազգային հարաբերությունների ֆակուլտետ):

Բացի տնտեսագիտական քննարկումներից ու զեկույցներից, մասնակիցները նաեւ ազգային մշակույթի երեկոներ էին կազմակերպել: Հայկական երեկոն ամենասպասվածն է եղել, որի կազմակերպման աշխատանքներին միացել են նաեւ մյուս երկրների պատվիրակությունների հայ մասնակիցները: